新加坡58週年國慶，咪又係繼續得個亂字

好耐無出文，但新加坡國慶日，又咇到啲啲時間，一於趁網站完成砍掉重煉 restart 呢個我N年嚟嘅傳統。

唔少人一見到新加坡呢三個字，腦海多少都會泛起 HK Bus Channel EP08 新加坡 SBS Transit Volvo B10TL Volgren CR222LD body 雙層巴士 飄洋到香港 開場嘅配樂 1992年新加坡航空公司廣告主題曲《那裡會是個天堂》，諗到新加坡住屋又大間 (最細組屋面積45sq.m，單身都可以申請；政府訂定最多住4人)，生活開支(好似)好平，社會環境又穩定 (無人「搞事」???)。或者「政治上腦」就諗到「李光耀專制獨裁可恥」(李光耀都死咗8年喇)，仲有啲乜嘢「唔俾食香口膠」「唔俾飲可樂」….. 但新加坡較為真實嘅一面，恕我坦白兼囂張，香港評論人 (不論身在何處) 無一個可以做到我講得咁實在，準確性無十足都起碼有70-80%。最重要嘅係大家好容易睇得明，相信呢個係大家一直期待我寫/講新加坡嘅原因，並因而成為我仍然會想寫/講南洋政治評論嘅動力來源。

但事實上，自李光耀2015年離世之後，不論社會、經濟、政治，新加坡都係得個亂字。唔好話去新加坡旅遊都係吃喝玩樂而且都只係出沒旅遊區 (相信剩係我响 HK Car Channel 講 ERP 嗰個路口都無乜香港人真係去過)，根本 zero idea of 當地社會狀況，就算移民咗去當地嘅大多因為滿腦子「PAP一黨專政無言論自由」而無真正了解，所以真心唔好駁咀話無亂過。

剩係响過去呢一年，PAP 竟然爆出涉貪醜聞，外長維文 (Vivian Balakrishnan) 同內政部長尚穆根 (K. Shanmugam) 涉嫌以權謀私以低於市值租住官批土地嘅豪宅。涉事嘅屋宇位於女皇鎮 (Queenstown) / 荷蘭村 (Holland Village) 貴價地段，以香港類比相當於西半山干德道，甚至梅道、舊山頂道地利根德閣。

涉貪本身已經大問題，人民行動黨建黨本身就係打著「廉潔」口號，李光耀亦因此「一統天下」幾十年。如今竟然鬧出涉貪醜聞，我真係諗起李光耀一句明言「如果有人搞亂新加坡，我就算死咗都會從墳墓裡面跳出嚟」然後好想睇李光耀「復活」。

另外，工人黨「女神」佘雪玲同國會議員貝理安（Leon Perera）爆出婚外情而辭職並退黨，「小農基因」也許認為理所當然，但撇除「拋棄糟糠淫慾幼女嘅孫中山竟然係所謂國父」嘅荒謬，純粹响新加坡當地社會而言，男歡女愛合則來不合則去嘅嘢响坊間其實無乜咁大不了，只不過始終仲有唔少年紀同我差唔多 (我就嚟「知天命」㗎喇) 以至更年長嘅，仍然係「小農基因」古老石山思想，於是乎呢單桃色新聞成功被炒大。

單係呢兩件事其實睇到 PAP 已經進入腐化，涉貪本身已經唔駛再加料講，針對工人黨嘅所為可以用「簡直無所不用其極」去形容。就以返佘雪玲單婚外情風波，承如上段所述，呢類事情响性質上於一般新加坡人眼中其實不足為外人道，雖然能夠「放大炒作」都有來自坊間嘅因素，但「炒」嘅程度在我嘅角度其實誇張得過份。如果睇返2020年大選，工人黨派出佘雪玲領軍出選東海岸集選區，雖然落敗，但得票比率只係53:47，票數 61000 vs. 53000，差距唔夠一萬票，對比埋選民人數12萬，PAP 絕對只係險勝。甚至再睇返歷史數據，PAP 一直响呢個選區攞到60%選票，更可以話險過剃頭。佘雪玲本身可以話係「吸票機器」，尤其是於40歲以下年輕選民嘅威力，相對於 PAP 頂盡「見到尾燈」，可以話一個極具威脅嘅政治人物。

原本我嘅預計如果無提前解散國會，2025年大選佘雪玲真係有機會為工人黨勝出一個集選區。正常而言，民主制度之下政黨當加倍努力爭取選民支持，但今次佘雪玲被「搞」，我只睇到不過是 PAP 「使橫手」。事關 PAP「搞」工人黨屢有前科，包括針對工人黨「根據地」後港及阿裕尼集選區嘅鎮理事會帳目問題，PAP 响2011年大選落敗要撤出，但留低一盤混亂不堪嘅爛帳簿，亂到劉程強、林瑞蓮等人跟咗好多年跟到「嘔泡」都未完全釐清啲數，政府竟然起訴工人黨帳目混亂！

另外仲有 2020年大選，工人黨「唔覺意」勝出盛港集選區之後，PAP 先叫囂要選舉呈請推翻選舉結果，跟住打算將阿裕尼嘅嗱喳招故技重施，只不過今次遇上本身從事金融業嘅蔡慶威，正所謂「佢唔係食齋」PAP 先至唔敢過份張揚去「搞」；奈何辣玉莎 (Raeesah Begum) 把口唔收，又俾位 PAP「入」。

加埋新加坡前進黨 (PSP) 堀起嘅背景 (2020年大選雖然全部候選人/名單落敗，但平均得票率剛逾10%；其中根據憲法獲委為「非選區議員」嘅梁文輝及潘群勤來自嘅西海岸集選區嘅得票比例52:48，14萬選民vs票數差距只有4600)，連同李二世顯龍胞弟李顯揚當日高調入黨前後嘅言論，其實可以歸納一點，人民行動黨已經淪為一個不務正業嘅政治組織。尚且不在此分析 PAP 班政客咁「搞」工人黨嘅動機，但有一個客觀環境就係 PAP 執政得太耐 ~ 响新加坡有一個政治冷笑話「若想做MP，只需加入PAP」，套用香港流行講法即係「加入人民行動黨，瞓响度選都贏」。唔駛點，SEARCH 吓陳佩玲呢條o靚妹嘅「威水史」就會明。

正所謂「無敵是最寂寞」，但相反角度引伸出嚟就係養咗一班只會食政治殘廢餐嘅生物，要佢哋落區楝 0800-2359 坐响議辦可能「一刀殺咗佢好過」。呢班滿腦子精英主義掛帥嘅老海鮮，monkey see monkey do 嘅陳振聲當然係香港人熟悉嘅典型例子，even 篤定做「李顯龍過繼子」嘅黃循財，或王瑞傑之類，全部都無好似 Pioneer Generation 咁經歷過「政治打鬥」，全部都真係「瞓响度選」而做到 MP，試問 PAP 會有邊個想真係同工人黨甚至 PSP 正面鬥撼?! 搵啲旁門左道「搞」走啲對手，可能就係佢哋個腦入面所諗嘅事。剩係睇李顯龍為咗保住歐思禮路38號「李光耀神廟」幾乎迫死個親細佬，都唔可以話我老作老屈。

而既然某程度上都只係「揸流攤」做 MP (甚至 PM)，社會上好多事情亦唔會認認真真去妥善處理。撇除武漢肺炎，過去多年我响各平台講過嘅社會亂象，根本無好過，甚至進一步惡化當中。只不過李二世「死好命」如今食正香港「全面回歸」條水有機會旺返，表面太平而風光，但我都係絕不盲目地維持由8年前開始講嘅嗰句「新加坡繼續得個亂字」。只不過，純粹論生活，新加坡點都好啲，甚至乎只要知道條底線係乜，日日去芳林公園做返維園阿伯直線屌鳩李顯龍陳振聲黃循財王瑞傑傅海燕………..做嘢有幾廢柴都仲得。

後記：COVER PHOTO 係有意思嘅！珍珠坊曾經係新加坡人嚮往同感到自豪嘅大型商場，如今….. 用返香港例子比喻，好過葵涌廣場咁囉