香港夜市唔止老早瓜晒救唔返

政府無啦啦話要搞乜叉夜市，仲要講明賣熟食，坊間嘅反應一係趟平 WFC，一係都唔可以話正面。其中來自飲食業的，認為晚市生意已經唔好，夜市有如「乞兒兜中嗱飯食」；另外就不論行業的有話「都無人出街或出晒去第二度，搞嚟把閪」，當然仲有「政治上腦」講返2016年大年初二。

香港嘅經濟狀況差到一個點就係事實，若翻開歷史 of about「地攤經濟」，更加會推算得到葫蘆裡賣甚麼藥。事實上，香港嘅經濟狀況之差，直接講近乎無藥可救，原因之一，本已疲弱不堪嘅樓市隨住長實新盤親海駅大劈價必骨牌效應的倒冧；第二，其他所有「資產投資」嘅東西，唔止股票，仲有的士、小巴牌之類，通通都「流血不止」。總之難以繼續以炒賣「錢搵錢」或 easy money 可以過到活。第三，香港老早無晒實業，或是剩低嘅工廠都只算係苟命殘存。情況比起1990年代嘅日本更加之差，真係可以話翻身無望。

晚市市道之差較集中於中上價食肆，尤其是中式酒樓確係重災區；但就算「茶記」都無話2018年之前咁墟冚。聽到身邊唔少人話「北上消費平夾抵」，可以解釋到中式酒樓點解出晒事，「茶記」亦受到拖累。引伸出嚟，香港搞夜市，平得過深圳嗎？

雖然香港搞夜市總會有一啲本地特色元素而深圳好難抄得到，但香港人近呢十幾年慣咗响深圳河以北「地踎價錢做大爺」，已經係一個負面因素。再者，就算香港本地，所謂「鹹魚」思維肆虐，從最基本嘅「俾一蚊想得十蚊嘅嘢」到「個個都係劉德華」，以至動輒以為靠惡而蠻不講理；或是營商嘅，同樣都係只想一蚊嘅貨賣十蚊，只圖「扑傻瓜」。根本上客觀條件無嘢可以認為「夜市」可以帶動經濟。

再甚至乎撇開七年前農曆新年嘅事，由英國殖民走狗時期都已經扭盡六壬對熟食小販污名化，由嘢食唔乾淨到整到條街污糟邋遢，再到「唔駛交租唔駛交稅搵埋大把」，更加睇唔到「地攤經濟」响香港有何作為。

講晚間市道再放闊一啲去講，不得不提鄧小平講嘅「舞照跳」~ 夜總會、舞廳、桑拿骨場。無錯，的確「傷風化」，但循經濟學角度，呢啲「夜場」確係帶動晚間市道嘅因素之一。好多人認為東莞係「致命一刀」，响經濟學角度係不爭嘅事實，但根源正正在於所謂「道德批判」去睇呢啲行業，令到無法一如荷蘭，或新加坡芽龍咁「規範化」，同時使執法行動有所謂群眾基礎。

要知道所謂嘅執法準則，例如近年常見嘅「一樓一」掃黃，唔一定係「捉姦在床」that 一男一女衣衫不整，可以只係見到廣告疑似提供色情服務，然後响單位內搵到 Condom 咁就可以認為「色情場所」；俗稱「魚蛋檔」嘅舞廳，或是骨場，只要有一個男人無著褲，咁又可以認為係「色情場所」而拉人封艇。以返普通法原則，只要唔係註咗冊結婚嘅夫婦嘅住宅都可以被界定為色情場所！正所謂「玩都玩得諸多顧忌」，已成香港嘅「舞照跳」遲早消失嘅客觀條件，然後的至到深圳、東莞「要幾癲有幾癲」，只不過成為最後一根稻草而已。

再講一次，如果硬要「道德批判」去睇剛呢兩段的話，我就回應「無視人類與生俱來的根本是偽君子。」

所謂經濟學上嘅客觀條件「夜市」極其量只能短期「止咳」，就是香港人嘅人性本質亦提供唔到條件令經濟學嘅客觀條件可以扭轉，更可以預計「夜市」註定最終只會失敗收場，甚至整個香港經濟環境只會一去不復返。唔想咁樣可以點樣？Cover Photo 係台灣夜市 (正常係無香港人去嘅內湖區。特登揀呢張)，該會是最多人拎嚟做對比嘅例子。除咗兩地政府响規劃同管理上大徑迴異之外，肯好似台灣嘅攤販咁捱，唔會只圖一蚊嘅嘢賣十蚊扑傻瓜，做食客嘅唔再繼續「一過關做上賓」總想俾一蚊得十蚊貨嘅心態，先至再問有乜實際建議啦。