Kieran McKenna 何許人也？無睇開足球嘅一定唔會知，就算有睇開波嘅都未必知，因為佢係來自香港人幾乎唔會留意嘅第二級職業足球聯賽 – 英格蘭冠軍聯賽 EFL Championships 嘅球隊葉士域治 Ipswich Town Football Club 嘅現任主教練 / 領隊嘅仁兄。
或許唔少資深英國波 Fans 會即刻破口大罵「乜嘢唔識葉士域治呀細路你咪鳩噏喎」無錯，如果由郭家明搭陳譚新旁述開始睇到 Cable 直播的話就一定知道呢支球隊，但2002年起消失於第一級別賽事之後先至睇波的話，又有邊位會留意呢？
無錯，5月4日香港時間晚上，葉士域治以2:0擊敗排响尾二嘅哈特斯菲 (Huddersfield FC) ，以第二名「自動升級」資格而會响8月底新球季開始踢第一級嘅英超賽事，亦成為英國職業足球史上第12隊「連續升班至第一級聯賽」嘅球隊。
有咁嘅成績，球員同領隊當然應記一功。但原來响2021年12月麥建拿接手執教時，葉士域治霉到跌至第三級聯賽嘅英甲，踢咗23場7勝8和7負得29分，McKenna 縱算不上接手一個爛攤子，但點都唔係容易做嘅工作。最終以18勝16和12負70分，第11名完成該季賽事。跟住到2022-23年度就以98分，第2名直升英冠。就咁睇麥建拿嘅功力都唔可以睇少。
不過咁，McKenna 原來從未踢過職業聯賽，極其量只係踢過北愛爾蘭青年軍。本是熱刺嘅青訓球員，仲要係獎學金學員，但盤骨傷患持續，22歲仔就要退役。跟住就去咗讀書 Sports Science，畢業後就返去熱刺教 U18 青年軍，一年後過檔曼聯，都係教U18，季終攞到北部錦標。然後就跟住摩連奴做教練，再到蘇斯克查被炒埋之後，11月亦離開曼聯，接受葉士域治會方嘅羅致加盟。
以葉士域治連續兩季嘅成績而言，McKenna 嘅表現的確受到肯定嘅，只不過睇晒佢成個 profile，恐怕香港人第一反應會係「吓？波都無踢過就做教頭？乜春英冠呢啲霉揼墮嘅聯賽佢就仲可以死好彩，上到英超食得屎啦」
大家或者又想話我偏激之詞，但細心 track record 香港人習性之一就係見高拜見低踩，正所謂「葉士域治又唔係Big 6」，點會唔出現呢啲反應呀。
或者可能因為 McKenna 係响英國，所以香港人都唔會睇低佢。但如果佢真係响香港呢處生存的話，就算唔咁樣踩佢兩腳攞吓彩，都必定恥笑佢當年離開曼聯之舉「有樹大好遮蔭唔做走去間乜鬼爛鳩英甲喎…..」「今鋪俾佢搏到好彩咋，下年踢英超睇吓輸俾Big 6 輸到仆街降班返落去」
不過咁，依家英超仲有一隊嘅教頭同樣都係無踢過職業賽，甚至乎根本無做過球員，講緊嘅係賓福特嘅 Thomas Frank。賓福特今年嘅成績真係強差人意，但 Ivan Toney 停賽，Yoane Wissa 同 Bryan Mbeumo 兩箭頭同時傷晒，唔係排第17位算執到喇。另外，英格蘭國家隊有兩名球員都係 Thomas Frank 嘅門生，Ivan Toney 之外仲有現效力維拉嘅 Ollie Watkins。咁想請問無踢過職業賽做教頭嘅問題何在呢？或者衰啲講，可謂曼聯名宿中之名宿嘅蘇斯克查做曼聯教頭嘅時候，你哋啲港燦又講乜呢???
無錯，唔可以一竹桿打一船人，但仔細回顧同反思一吓近呢十年八載香港人嘅修為表現，尤其是 FB 之類 social media 盛行之後嘅言行，真心好難怪我對住葉士域治升班一事會諗到啲咁嘅嘢寫出嚟。單是我曾經公開讚賞2015-16年度英超冠軍李斯特城前鋒、當年賽會 Player of the Year 嘅馬列斯 (Riyad Mahrez，下圖) 近年响曼城嘅表現，都惹來所謂球迷網民嘅批評，認為我亂鳩咁噏，請問我點可能唔會有呢啲屌鳩香港人嘅諗0法出嚟吖?!
後記：單睇英冠兩隊升班馬，李斯特城擺明王子復仇記，葉士域治並不如般尼咁多「窿」，下季英超應該惡鬥連場。相對地，諾定咸森林、愛華頓、水晶宮同賓福特呢四隊都真係要講句「醒定啲」。
Be the first to comment