睇英超，同自己思考一下

我無睇開波，頂盡世界杯嘅時候會昅吓，只不過近兩年幾人生有咗啲變化，所以依家會睇吓。亦所以近期會出啲 Post 提及吓英超，同之前响 YouTube 有一集節目講吓波，延伸出支那共匪將香港嘅體育事業搞到一堆屎

再另外响 HK Bus Channel 寫過一篇文講歐洲巴士製造業同職業足球比賽嘅關連。

歐洲足球推動巴士行業發展

香港人睇波同睇明星 Artist 一樣都係跟紅頂白，邊隊猛料嘅睇邊隊。只不過足球同娛樂圈有少少唔同，「猛料」嘅嗰啲隊伍又真係通常好睇啲。例如好多人開口埋口「若要生活好，千祈咪買….」嘅利物浦，M. Salah 嘅爆炸力、扭得好兼有時踢得鬼馬 (以為佢漏但實際係有隊友「黃雀在後」)，又真係好好睇。

不過好多認為係強隊嘅又可能好垃圾，例如近期應該係球迷圈子熱門話題嘅 C朗拿度 重返娘家 曼聯，結果連輸三場搞到領隊蘇斯克查做代罪羔羊，再唔係就响「曼市打吡」以為睇緊榜尾嗰幾隊打爛仔波。又或者2012年以來四度奪冠嘅曼城，真心懷疑領隊哥迪奧拿根本利用所謂小組短傳戰術打假波，淨係睇噚晚對「典型爛仔」狼隊 打多一個都只係贏得粒12碼，都應該同意我嘅講法。

至於中游至榜尾嘅弱隊，通常認為對住強隊只係做魚腩，或者係「茅躉華」上身。但又係世事無絕對。好似噚晚阿士東維拉作客對利物浦，「血肉長城」地堅守，最終只係輸一球12碼而無被「大屠殺」，新任領隊謝拉德當然有功勞於佈陣，但都要班球員「生性」先可以踢到有咁嘅賽果。

仲有事隔70年今屆重返英超嘅賓福特，香港應該無乜人留意。但成績縱不算標青，但起碼迫和利物浦、曼聯，依家排名第9。

能夠成為一隊勁旅，當然受人注目，但即使中下游份子，努力於每一場賽事，亦係應有嘅表現。倒過來如果只會自暴自棄，莫講話成績，就是俾人噓甚至唾棄，亦係正常不過嘅事情。

依家我望住英超呢啲隊伍，以至球員，深深明白自己身處於一個乜嘢環境，可能只係熱刺、阿仙奴、愛華頓，唔知幾時可以再見輝煌。不過，我最少知道應該好似噚晚嘅阿士東維拉，同埋賓福特咁樣，在有限嘅空間繼續做好自己；千萬唔可以仿傚狼隊、白禮頓、般尼之類做「茅躉華」。就算他日有返一啲成績，絕對唔會丙朗咁一朝得志語無倫次。最想嘅可能係「西火腿」贏波完場咁與眾同樂。