香港人睇英超多數都係追所謂 Big 6 強隊，我本身就無特別捧邊一隊，但個人本身有鋪刨冷癮，所以會稍為留意啲中游隊伍。當然，多數都係「待宰的魚腩」，但總有奇芭，例如唔講應該無乜人會醒起目前英超史上射手榜No. 1 嘅舒利亞 (Alan Shearer)所屬球隊、上季 Qualified 踢歐聯嘅紐卡素，今季目前排第四嘅阿士東維拉，仲有响2021年相隔74年重返第一級別聯賽嘅賓福特 (Brentford) 更是我响呢兩年嘅目光所在。
也許香港球迷圈子真係甚少人談論呢隊今年踢得麻麻地哋球隊，頂盡都係講上一年度「唯一雙殺三冠王」嘅球隊，再極其量就係2021年8月13日揭幕戰2:0贏阿仙奴搞到真•全世界海量爛眼鏡，又或者就係Ivan Toney 成為上季射手榜第三，然後有知道佢因為賭波被罰停賽八個月。但佢點解會去賭波成癮，恐怕香港無幾多人了解過。
關於佢被罰停賽一事，的確好可惜。但停賽期間，接受咗英國「網紅」Steven Bartlett 响佢個 channel ” The Diary of A CEO” 專訪。節目全長近兩小時，我真係煲晒。
節目內，Toney 由佢响 Northampton 一個基層家庭嘅出生講起。十幾歲好似讀唔到書，徘徊响做街童邊緣時接觸到足球，加入咗 Northampton Town 青年軍開始踢波生涯。到19歲嗰一年，即係2015年，表面上獲當時仲响英超不過榜尾嘅紐卡素羅致，但點知「卡數」只係想賣佢豬仔 ─ 買返嚟係咁 loan out。先後外借過俾班斯利 (Barnsley)、梳士貝利 (Shrewsbury Town)、斯肯索普 (Scunthorpe United)、韋根 (Wigan Athletic)，一直到2018年，英甲嘅彼得堡 (Peterborough United) 同佢「贖身」。兩季上陣76場入40粒，先後獲得神射手及年度最佳球員，也許就被剛剛接任當時仲响英冠嘅賓福特領隊法蘭克 (Thomas Frank) 垂青而「收購」，勇猛表現射入31球，令球隊經附加賽而74年後重返頂級聯賽。
訪問入面，Toney 有提到紐卡素令到佢好沮喪，甚至真係懷疑人生，去到彼得堡先至叫做喘定落嚟。而加入賓福特並成功升上英超，彷彿好似達到了一啲人生目標。不過，加入賓福特之後其實有頗大心理壓力，一方面係自己對足球事業嘅渴望，另一方面係領隊法蘭克訂下要爭取升上英超嘅目標。
雖然Steven Bartlett 無直接問或加註評論 Toney 係咪因此而養成賭癮，但節目有1/4 air time 係講紐卡素賣佢豬仔時嘅心路歷程，明眼人點都會認為佢真係因此而搞成咁。FA 調查報告載述佢係2017年開始去賭波，因此某程度上可以話佢嘅賭癮問題紐卡素要負相當大嘅責任。
也許如此，並且 FA 响聆訊調查過程並未發現佢同不法集團有勾結，與及同意接受戒賭癮治療，故此只罰停賽八個月同罰款五萬英鎊。而英國球壇、球評圈子嘅輿論都近乎一面倒希望佢能經一事長一智，復賽後能重新振作。賓福特不單無同佢解約，仲為佢提供多方面嘅支援，包括額外聘請心理醫生等等。領隊法蘭克仲响多次扑咪被問及 Toney 嘅事的話都作出正面言論。
而去到舊年12月，停賽令嘅尾聲，英國傳媒都擺出「熱切期待出山」嘅姿態。到1月17日禁賽令正式結束，球隊、Sky Sports 、英超賽會都祭出 “The King is Back” 嘅調子。
結果香港時間上星期六深夜 2530 復出首仗主場對諾定咸森林，開賽19分鐘就入波 (雖然有「投訴」認為佢出茅招，但英格蘭女子足球名宿 Susan Smith 指有關做法係「灰色地帶」，當場無投訴就難以事後追訴) 。賓福特最終 3:2 勝出。引證住英國當地以「王者回歸」鋪陳佢復出真係言之成理，亦引證住Ivan Toney 嘅實力非等閒之輩。
賓福特成隊波响呢兩年响英超嘅表現同 Ivan Toney 嘅故事最值得細味之處在於「不認命」，無因為一般認為中下游球隊只求「輸少當贏」，而係有齊完整陣式防守並伺機進攻，上一季「雙殺曼城」與及同 Big 6 對戰12場共6勝3和3負。Toney 除咗每場都同隊友合作製造入球機會，自己亦成為射手榜第三名。
而對於賭波被罰停賽一事，佢坦然面對、勇於承擔後果。另一方面，响 Toney 停賽嘅期間，球會不單無同佢解約，提供支援之餘，領隊法蘭克多次面對傳媒都話球會等緊佢復出之日，仲字裡行間提到 Toney 係升班功臣而所以除非佢想離開否則唔會放棄佢。縱然 Toney 一直有話想過檔 Big 6，尤其是阿仙奴係人生目標，但賓福特既無特別阻撓，反之繼續重視佢甚至可謂重用佢，球會呢啲原則同精神，以純商業角度可能認為係憨鳩，但如果球會放棄佢，誰不會祭出見利忘義之類嘅批評?!
今季嘅表現確實差咗，Mbuemo 同 Wissa 兩大箭頭因傷缺陣到最快三月底先可以復出，Toney 加上 Jensen 同 Maupay 嘅進攻能力雖然還算可以，但始終都係爭咗啲，之後表現如何只能觀望。至於 Toney 嘅去向，我個人認為人望高處乃理想當然，但阿仙奴有「耶穌」、Saka 响度，幾時輪到佢 Start XI 吖。要摶「南閘」垂青嘅元素係上陣表現。或者理想啲咁講，與其想過 Big 6 搏捧杯，留低推動賓福特升到前六甚至前四，創造歷史可能有更大嘅尊崇地位未嘗不可。
Be the first to comment