曼城三冠王 So What

先啟：本來準備咗英超後續同其他Topic，但公務繁忙，故請稍候，文章將陸續登場

英超球隊曼城星期六晚凌晨終於以1:0 贏咗意甲嘅國際米蘭，取得史上首次歐聯錦標，亦取得所謂「三冠王」榮譽。純粹於競技成績的確相當巴閉，但睇返今年所謂「三冠」嘅結果如何達成，與及成隊波近年响哥迪奧拿 (Pep Guardiola) 領軍下嘅踢法表現，以至尤其是自2012年「9320」以嚟嘅歷史，根本真係 So What！

贏歐聯根本死好彩

當晚 (香港時間) 0200 公佈雙方陣容之後，我即刻嘅反應係「可以 all-in 國米捧杯」，原因係正選陣容前鋒只得夏蘭特 (Erling Haaland) 而無「蜘蛛仔」艾華利斯 (Julián Álvarez) 。

事關今季我睇咗咁多場賽事夏蘭特呢個所謂「入球機器」嘅入波方法幾乎獨沽一味 ── 响禁區等隊友交波俾佢篤或頂入 (頂多加埋十二碼囉)。去到舊年聖誕節左右我已經同朋友講「要破佢呢個『布歐神功』簡直易如反掌，只要守方有球員迫到佢走錯半個身位就 bye bye」，亦事實跟住好多場賽事佢都因為咁而無波入。

無錯，雖然佢攞到英超神射手，但唔好意思，英國 Sky Sports 嘅 Goals of the Seasons，35個入球無一粒係佢嘅。夏蘭特嘅「戰績」根本 Just a number，甚至再講得難聽啲就「唔撚入流」。

對應返當晚歐聯決賽，既然「布歐神功」係咁易破，只要國際米蘭嘅防守得法令到中場無計可施或兩翼好難交波入中路的話，夏蘭特唔好話入波，根本連波皮都掂唔到。

相反地，艾華利斯有速度有技術，而且扭波、單刀走線出神入化到真係好難捉得佢住，如果當晚佢打正選我幾敢肯定上半場唔會係 0:0，不過仲有一個涉及到領隊哥迪奧拿嘅關鍵因素。

哥狗式鳩搓嘥時間浪費精力

之前我已經寫過一篇文講呢個問題。响競技角度其中關鍵疑點之一嘅「有得起腳唔起腳」，正如香港俗語有所謂「有得食唔食，罪大惡極」，真係唔知乜嘢道理 (更唔好講 Kompany no shoot 啦)。面對密集防守都仲係要 “Tiki taka” 小組短傳根本唔駛旨意有波入，甚至好似剛呢一季「雙殺曼城」嘅賓福特，雖然領隊法蘭克 (Thomas Frank) 嘅防守策略唔係「鐵血長城」，而係大約半隊人「齊上齊落」mark 實幾個曼城响中路嘅「目標人物」，縱使兩側嘅防守好似鬆咗啲，但曼城球員就算攞到波都好難交去中間。

歐聯決賽當晚國際米蘭可以話將賓福特嘅嗰一套 Copy & Paste ，而且再「加料」箝制埋兩邊攞到波嘅賓拿度施華 (Bernardo Silva) 、加利殊 (Jack Grealish)、 迪布尼 (Kevin DeBruyne) / 霍頓 (Phil Foden) ，曼城就算過到中圈都入唔到30碼射程範圍，即使艾華利斯落場都好難有波到，更唔駛旨意入到波。

之前嗰篇文另有提過前年 12月15日曼城對列斯聯 與及 12月19日對紐卡素，曼城嘅入波都係一反傳統，快放長傳外圍遠射結果大勝。而响上星期FA Cup Final，根度簡 (İlkay Gündoğan) 入嘅兩粒都係禁區外一腳抽埋去，歐聯決賽亦係洛迪高 (Rodrigo Hernandez) 廿幾碼一腳冷箭搞掂，再進一步證明哥狗嘅鳩搓式戰術絕對可以受到質疑。加埋贏紐卡素之後佢竟然屌鳩班球員表現未如理想，就算唔懷疑哥狗勾結賭波集團打假波，都必定認定佢套所謂戰術！

哥迪奧拿同球員嘅不和陸續浮上水面

首先，睇返呢幾年曼城奪標頒獎儀式前後，啲球員同哥狗之間嘅互動，唔好話相比 2012年「9320」後文仙尼 (Roberto Mancini)，就連球員同佢之間嘅互動縱使未形同陌路，都好似「Just say hi then say bye」嗰種。咁嘅表現真係唔好話佢哋關係好好。

第二，根度簡約滿未續，但英國傳媒報導佢一直未有決定。球員 free agent 續約或轉會通常都係錢嘅問題。以曼城「無限財力」加諸於根度簡一直以嚟嘅表現去評斷，即係續約與否唔係錢嘅問題。以一個32歲嘅考緊教練牌又並非貪錢有如丙朗嘅中場球員，想要嘅可能係競技場上的最後光輝、為自己事業路途做好部署準備。

考教練牌，任何一間球會都可以安排同協助；至於「最後光輝」，涉及到正選次數、落場時間同臨場技術發揮，但淨係睇今季哥狗對佢嘅上陣安排，加諸於「鳩搓戰術」嘅要求，恐怕都唔駛我再多講。

即係話根度簡續約與否嘅 key facts 應該响哥狗身上，能否解決真係好難講。但上星期英國傳媒訪問哥狗關於根度簡續約一事，哥狗竟然話同佢住响同一楝 apartment building, we are good friend。心諗，真係老友有計傾呀，駛撚對住傳媒講啲咁嘅嘢咩！

也許根度簡嘅性格比較內歛，比較難察覺到佢係咪同哥狗有過節，但曾經公開屌鳩摩連奴「你唔俾我落場然後話我表現唔好都痴膠花」嘅迪布尼，英國當地早有流傳佢同哥狗「扎行馬」，之前篇文講嘅兩場賽事就有傳係佢同其他唔妥要「鳩搓」嘅球員同哥狗「打大交」之後嘅傑作。今年二月，英國傳媒報導 KDB (通常對迪布尼嘅簡稱) 响 Twitter 向哥狗開大炮，直指佢某啲要求毫不合理。雖然傳媒追問 KDB 而佢三緘其口，但多數嘅分析都估計就係「鳩搓」vs. 球員臨場執生有關。

仲有响歐聯決賽前夕，CBS Sports 搵亨利 (Thierry Henry) 去曼城總部同哥狗做訪問。亨利本已有如 BBC Hardtalk 係咁 grill 哥狗，仲要 “I think that Kevin (DeBruyne) is the most important player (of Manchester City)” 去問哥狗對KDB嘅睇法，哥狗塊臉即刻黑過鑊撈同擰歪臉。然後，佢嘅回答完全九唔搭八，迴避亨利提問嘅重點。即係話 KDB 同哥狗之間嘅不和係確實存在，隨住亨利呢個訪問亦正式浮上水面。

加埋歐聯決賽當晚「一箭定江山」嘅洛迪高响賽後嘅訪問坦白承認一直好介懷被受壓制，雖然佢嘅個性表現好明顯响度「爭功」，耐唔時見到有機會就廿幾三十碼「放冷箭」，但亦都可以話响宏觀上同「哥狗式鳩搓」可衍生嘅問題係吻合。

仲有曼城今季唯一一封收嘅「利是」嘅簡些路 (João Cancelo)，我一直睇到佢有著一個後防球員需要嘅冷靜同「沉得住度氣」，踢得相當稱職。但11月5日對富咸「收利是」，連埋再之前兩三場賽事，佢竟然「燥底王」！一個人「性格突變」總會係「受咗刺激」，到底發生過乜嘢事無人知，英國傳媒亦「索唔到料」。但今年1月借調去德甲拜仁慕尼黑，球會放出佢報到嘅影片，佢成個人「四萬咁嘅口」，因此亦好難排除佢又係同哥狗嘈過嚟。

呢一切爭拗源頭都好大可能同哥狗嘅「戰術」有關，延伸返到去球賽，亦影響到球員表現以至賽果。

哥迪奧拿不過是「有無盡銀彈下只會乘涼的後人」

曼城自2002年升返上 Tier 1 英超之後，一直只算係一支中下游球隊，即使到阿布扎比皇室2008年入股之後，都要去到2011/12年阿古路 (Sergio Agüero)「9320」先至捧杯奪取頂級聯賽冠軍，並開始一直不缺席歐聯。

可以話曼城呢隊波由文仙尼到柏歷堅尼 (Manuel Pellegrini) 同一班呢個時空叫做老臣子嘅球員所建立，哥迪奧拿做教頭只係延續呢股輝煌，加上阿布扎比皇室有無限銀彈，淨係買球員都好似「唔駛睇銀碼」甚至「高追」都無問題，例如2018年以6780萬英鎊由李斯特城買入當時「估值」約5000萬嘅馬列斯 (Riyad Mahrez)，更當然唔少得英國當地認為「痴鳩線交易」嘅逾1億英鎊從阿士東維拉羅致嘅加利殊。另外仲有英國江湖傳聞，原本曼聯以大約2500至3000萬英鎊由德國多蒙特收購夏蘭特，成交前夕曼城話「我出多一倍價錢」截糊。正所謂「彈藥無限任得你揈」，Mini Cooper 塞副法拉利引擎落去都改得到，哥狗要延續輝煌根本零難度。

英國鏡報响歐聯決賽前席唔知攞景定贈慶，考古返佢做領隊以嚟嘅隊伍全部都係「要錢有錢，要人有人」，一方面諷刺佢由巴塞隆拿就「順風順水」，另一方面恥笑佢帶領曼城彈藥更盛但偏未贏過歐聯。

引伸出嚟，唔好話「限米煮限飯到幾乎煲無米粥」嘅諾定咸森林，就算係「有錢但唔會無限供應」由沙地皇室持股嘅紐卡素，撇除佢應該因為錢而唔會去教，佢會唔會好似 Eddie Howe 咁教得到 Qualify UEFA Champions League 吖? 如果拍埋將曼城「雙殺」嘅賓福特領隊法蘭克，由副領隊起計花咗五年時間英冠升上英超，我話哥迪奧拿根本係一件死好命嘅垃圾絕不為過。

下一年度曼城會係點，先等待根度簡同兩位後年約滿老將 KDB 同馬列斯嘅去向。但正如蔡楓樺嗰句「剎那光輝唔代表永恆」，就算無英格蘭足協嘅賬目審查醜聞，亨利嘅訪問話唔埋「引爆」啲大鑊嘢而一蹶不振都唔係無可能。