的士商會黃保強你要「擸水」都唔係咁呀嘛

小啟：原本打算寫返噚晚上架 YouTube 頻道節目嘅文字版，但今早一起身收到更爆嘅料，就先寫咗呢一篇。

政府因為唔夠救護車接載確診武漢肺炎人士前往求醫，就向的士業界招手。的士商會主席黃保強日前接受傳媒訪問時表示，始終存在極大風險故此政府得須「重償招勇夫」。而响噚日，佢嚴重誇大旅遊巴司機月入達 $58,000 疑作為向政府討價還價嘅籌碼，我就即晚錄節目同佢開拖，事關嚴重失實之餘仲可能影響政府對旅遊巴業嘅資助。另一邊廂，有業界消息指黃保強或其關連人士以日薪 $3000 招攬司機，工作時間08-19 但清潔消毒 (甚至「中獎」)「食自己」(未有講要唔要交返車租)，除咗引起我同「巴士台」嘅譁言 (and 怨聲「點解我哋無的士牌」)，今早我收到接近業界嘅爆料，茅頭直指黃保強出賣的士業界。

先此聲明，我收到嘅爆料係二手料，但一手來源乃認識多年友人，且過去俾嘅料都有返咁上下「堅」。我再睇埋啲字裡行間、前文後理，先至決定寫出嚟。

爆料指黃保強以所謂業界代表就「抗疫的士專隊」同政府磋商，內容包括需要車數、人手，當然仲有錢啦。當與政府接近傾掂數，黃保強 and/or 其關連人士就開始放風招兵買馬「日薪二千蚊包底再加錶頭」，就有車主行家去問黃保強「派車」安排，即俗語所謂「分莊派餅仔」，點知一直無收到進一步安排嘅消息。及後前晚到噚日朝早「日薪三千」版本，仲話「剩低唔係好多個位」。行家們就無明火三呎起，指黃保強「食夾棍」。

爆料直斥黃保強「以往要搞遊行慢駛就 call 行家出車造聲勢，依家有著數攞就自己即刻衝出去擸晒」，而且每次慢駛遊行車主仲要蝕起碼一更車租，猶如黃保強「慷他人之慨」。再者，如今好多司機嫌無生意而又好多車「晾」(未能租出)，黃保強如果真係咁樣招攬司機，唔止「楝鳩業界」，更形同對其他車主「撬牆腳」。

爆料人另外認為容許「車跟司機」即司機可以揸埋架車返屋企，雖然話就話收車前一個鐘要做清潔消毒，但有無確切有效監督真係做足消毒，而且「病毒嘅嘢係預計唔到」，形同增加社區爆發危機，更直斥黃保強「搵仆街錢」。

事實係咪如此當然有待查證，但觀乎「旅遊巴搵五萬八」都講得出

有啲嘢唔好怪人「屈咗你先」囉，阿黃主席。因為即使2018年或之前嘅實數都唔過 $25000 呀 DLGH！