近日香港人人嗌掃貨，個個叫儲糧，深怕真係買唔到餸，甚至門口都唔俾出。但除咗價錢上漲，發覺好多人唔係好識「上倉」，講緊唔係俾錢買嘢，而係買咗返歸之後發覺「出事」，例如啲菜擺兩日就爛，唔嫌急凍肉「唔新鮮」但解凍出晒事… 再甚至我有留意到好多人剩係識儲「食落肚」嘅嘢，無為意其他嘅生活用品。住慣深山嘅我唔會日日出街買嘢，算有啲經驗同心得，姑且分享一吓。
蔬菜點買點儲
講緊唔係介紹去邊檔買、邊度團購好，而係要有乜留意。第一件事，唔理乜嘢菜種，見到檔口係咁淋水嘅即刻走人。一來呢啲係有如呃秤所為，二來係凡「濕水菜」都無可能擺過夜。要「儲」，乾水係Must。
第二，統稱中式葉菜，即生菜、菜心、芥蘭、白菜、波菜之類，頂盡擺兩晚，第三日唔食就準備掉，無得傾。我嘅處置方法係返到屋企，拎張報紙攤開地下或枱面，將啲菜散開放响報紙上「散水氣」，大約半個鐘至一個鐘，唔好擺太耐，然後排返稍為整齊就好似藥材舖掌櫃包藥咁包起佢，然後放入雪櫃保鮮格。如果嗰張報紙濕透就換另一張。唔好嫌老土，我實實在在的告訴你，係呢啲老土嘅方法先至Work，密實袋保證第二日已經「唔撚駛食」。買嘅份量要預有損耗，買一斤預最後得十至十二両食得落肚。
能夠擺得耐嘅一定係「包菜類」，即椰菜、黃芽白、紹菜 一類。就咁打開膠袋放入雪櫃保鮮格。雖然話擺得，但都只係可以一個禮拜。食嘅時候最外層一定要犧牲。西蘭花、椰菜花我都係咁處理，但頂盡三日。
「搭返條」嘅蔥、芫荽，仲有唐芹，基本上死咗條心，即晚唔食就係咁先。蔥花可以考慮 AEON 雪櫃嗰啲，我有用過 OK 方便，但無乜味㗎喇。
另外一個考慮係 Mark & Spencer「雪櫃菜」，有西芹、西蘭花、菠菜 (已摘好晒一塊塊葉)，仲有「京蔥炒羊肉」或日式拉麵嘅大蔥。唔好以為好貴 (except 你要同建華集團噪音檔比較，呢個係閣下嘅問題)。最大好處係「入開雪櫃」，堅唔怕擺，但都係頂盡一個禮拜多啲啲。AEON 嘅雪櫃菜都可以擺吓，百佳惠康嗰啲我中過伏，不過你哋想試嘅我唔會阻止。
鮮肉？凍肉？
好多人以為「儲糧」只能凍肉，某程度上正確。但我有幫襯開一檔豬肉檔，係可以冷藏成個月拎返出嚟煮都仲好似新鮮咁。關鍵係肉檔嘅入貨質素，仲有係返到歸嘅處理程序，一定要雙手洗乾淨，轉袋到劈入冰格嘅過程件肉/骨唔可以掂水。恕我自私，邊一度請自己發掘。
超市嘅冰鮮肉無話唔擺得，但有少少膽搏膽。冰鮮牛肉我試過擺十日拎返出嚟煮完食落肚都無攪腸沙。豬肉、雞肉我唔會搏，情願買冷藏。
好多人話凍肉唔好食其中一個因素係解凍過程，真係無得心急。我嘅做法係預早一晚由冰格轉上係「普通格」，即平時放汽水啤酒嗰度，用個不銹鋼碟裝住。第二日早上 may be 臨返工出門口就成隻碟攞出室溫再解凍。到傍晚就可以醃。如果要醃耐啲 (例如豬扒) 就照呢個概念推前時間。
其他食落肚嘅
好多人只係諗到即食麵，講真食得多真係會出事。又另外好多人會諗到買米，要嚟「儲」嘅一定要真空包裝未被篤穿。超市職員篤穿晒只係一個原因：為自己方便&所謂安全。但作為消費者，你有權要求一包無被篤穿嘅。篤穿咗只係唔擺得耐。
意粉類嘅堅可以儲，但又唔好瘋狂式掃貨，除咗要顧吓其他人，仲有嘅係如果儲存位置濕氣偏重的話係會出事。連埋米、麵之類一齊照計數夠冚家食一至兩個月，理論上應該足夠。
仲有鹽、糖、油、酒等醬料。我留意到其中一樣好多人遺忘嘅就係呢啲。但又唔駛刻意買過多，因為會過期、受潮、發霉。預計一個包裝食幾耐，就照計數儲一至兩個月嘅使用量，理論上應該足夠。
當然仲有藥物啦。又都係顧吓其他人，唔好瘋狂式掃貨。响屋企數人頭，touch wood 全屋人出晒事又夠一個療程嘅已經可以了。除咗傷風感冒頭痛藥，仲有胃藥、止疴藥之類都應該有適度存貨。又如果你有長期睇醫生配藥的話，盡早配定多少少可能係需要的。
Other than 食落肚嘅
講到藥物，就要提到其他急求用品，例如藥水膠布、紗布之類，就算平常日子都應該要儲定一啲响度啦。另外仲有牙膏、洗頭水、護髮素、皂液等個人清潔用品，都有需要 keep stocking。當然仲有廁紙啦！再仲有家居清潔用品，洗潔精、洗衣粉、柔順劑、地板清潔劑 etc.
另外有一樣好緊要而我發覺真係無人提過嘅物品 ─ M巾，女士們請叫屋企人讓出一定空間。至於 Condom 呢啲就自行決定啦。
如果你有寵物，記得訂夠糧餉同其他用品，例如貓砂之類。
綜合而言，要「儲」啲乜，就係假設有起碼十日八日唔出街嘅生活所需。但又不厭其煩嘅講 Please be considered the others，諗吓人哋呀！即唔好瘋狂掃貨，夠食夠用就算喇。
明白呢啲日子過得辛苦，但點都要捱落去，唔係點睇邪不能勝正嘅真理實現呢。
Be the first to comment