低地台小巴，圍困死局

上個月撰文講過部 平治 Sprinter 低地台小巴未出到牌，到今日仍然停响廠，亦真係仲未知道幾時搞得掂。事實上，單係响呢接近兩個月，攔阻不減反加，甚至運輸署「大石責死蟹」處理同呢部車有關嘅事情。再加埋過去發生嘅一切，唔好話公共小巴實現「無障礙運輸」，單係呢部車能否為市民服務，我感到非常悲觀。

前文提及成件事黑幕重重，但其實連同再之前嘅撰文與及 Live Video 節目提過嘅事，只係冰山一角。我可以講，運輸署今次係採取全方位大包抄形式阻撓呢部車嘅「出現」，甚至到近期發生嘅事，就係希望做到「滴水不漏」完成佢哋應該早已編撰好嘅「劇本」，不容差錯地達成佢哋要嘅目標。

背景一：運輸署壓根兒就唔想有低地台小巴

唔少人認為「低地台小巴」只係同「豐田霸權」有關，但其實响公共行政角度，運輸署已經唔想呢款車出現。事關單純法例關於車輛尺寸、重量限制，已經有一堆行政工作要處理，要修改法例、寫「薯仔文」俾署長簽 exemption，更是輪椅停泊區 (Wheelchair Bay) 衍生關於載客量限制嘅問題屬「致命級」。因為如何確保一部低地台小巴唔會違法超載又能善用運載力資源同減少乘客不便，响原有嘅公共小巴政策之下處理所涉及嘅法律問題，複雜程度係近乎 mission impossible。Optare Solo 上面嗰個「隨意欄」either 輪椅 or 19th seat，只係解決咗唔會超載嘅法律問題，浪費資源及乘客不便嘅問題係無解決到。「陳帆叫讓坐俾輪椅乘客」就係呢個嘅癥結所在。

無錯，對運輸署職員嚟講，理論上無違法問題等如完成工作，但陳帆嗰鑊响立法會當住幾十個記者出醜，就仍然係一個問題。

點解咁複雜？因為即使响歐洲，歐盟法規 Wheelchair Bay 本來係一個可容納3-5個企位乘客嘅空間。即使個別車廠會响 Wheelchair Bay 裝上2-4張 fold-up seat (如下圖)，

當有輪椅乘客上車，不論坐响 fold-up seat 或企响度嘅乘客全部都要讓出空間。 然後的，企响車廂，而法律上容許企位就無違法嘅問題。

但原有嘅小巴政策係唔容許企位，要改法例就觸及全盤嘅公共運輸政策同管理，又最起碼觸及專利巴士嘅利益問題，已經見到工作量將會係痴總制。仲有周街唔識車嘅輿論問題呢？

呢個正正係點解運輸署嘅「低地台小巴試驗計劃」只設(未必有人應機)「預約」而唔係好似巴士咁可以睇住時間表就等車到揮手截車然後上車。因為只有透過預約，先可以理論上確保 18 seated + 1 wheelchair 而唔會違法超載。

2015年立法會「公共運輸策略研究」我提交嘅意見書寫得好清楚我嘅立場 ── 參照外國嘅例子，香港嘅專利巴士及公共小巴該納入同一個管理制度之下。小巴企位嘅問題，我給嘅答案係去台北上陽明山，你乘搭嘅 Toyota Coaster 係有企位。安全問題係另外一個範疇，但當年我提交嘅意見書，亦有寫到呢個方面。

對於悠久以來習慣咗「多做多錯，少做少錯，唔做唔會錯」嘅政府職員嚟講，免得過唔想做就搵辦法唔做。運輸署以至運房局或許意識到呢個超級巨大嘅問題，所以，撇除「利益」仲有「政治成果」嘅因素，都要千方百計要阻擋我有份策劃引入嘅呢部低地台小巴，以免我能「操盤」至佢哋既要做到仆街又會無晒面子。

背景二：低地台小巴 vs 豐田霸權 ??

由「加座位」開始，我一直都想剔除「豐田霸權」呢個因素，事關客觀上好容易被「入位」話都係利益嘅問題。但單純 19 vs 20，相信各方都會同意真係好難搵到「利益輸送皇冠車行可恥」以外嘅理由。

皇冠車行唔係無低地台小巴賣，係有 Toyota 响日本屬同集團嘅 Hino 的 Poncho 低地台巴士仔 (如下圖)，但據悉車價比 Optare Solo 更貴。


仲有，依家啲 Coaster 小巴係「齋殼」運抵香港，然後再安裝座椅、路線牌、落車鐘等設備。再加埋所謂「小巴三寶」── 限速器、黑盒、車速顯示器，通通都係班 Sales 嘅「下欄錢」。亦好大可能係向運輸署職員「回水」嘅來源。而 Poncho 預計好大可能要「成架原裝」運嚟香港，即係無咗堆「額外收入」……

但撇除以上嘅一切「利益」甚至可能的不法行為，還原基本步，對於運輸署嚟講無低地台小巴就可以省去額外工作量，可以一如 LMF 首《大懶堂》「有野唔想做，老細又吹我唔漲；日日等出糧，無乜野需要緊張」，相信大家會同意「唔想低地台小巴計劃成事」嘅動機係確實地存在。

驗車 N 項 defects 阻撓之外……

前文提及，運輸署驗車組提出 (佢哋認為) 唔符合法例的規格設備數量多達 37項，另外講到運輸署响舊年10月由原本死拖爛拖突然催促安排驗車。响舊年10月25日同運輸署嘅會議，當時嘅首席運輸主任潘志文 (現已退休) 提出訂立 working schedules plan，以今年1月10日完成驗車及出牌為目標，雙方同意呢項共識。部車早在12月初已經 完成最後嘅工作，可以隨時出去九龍灣，並已通知潘志文、崔振輝及驗車組嘅梁儉強。不過，到12月31日都無回音，呢個係我撰寫前一篇「爆料」嘅導火線。

「爆料」之後幾日，運輸署有職員來電，話「三寶」嘅審批手續未完成…… 平心而論，搵到「搵個新藉口嚟拖」之外嘅講法嗎？

簡單比喻講解吓「三寶」嘅審批手續 ── 茶記早餐 腿通搭雙蛋方包，你想改為 沙嗲牛麪搭腸仔蛋，個企堂話要問廚房佬俾唔俾改……
前幾日終於知道「廚房佬」點解仲未俾改份「早餐」── 仲响雪櫃摷緊包日本A3級和牛……
實際情況係運輸署响舊年下半年修改咗「三寶」一啲細微技術規格要求，即係我安排裝咗上去嘅設備「唔啱口味」。但最重要嘅係無通知我或協助辦手續嘅仁孚。

相信大家都會同意，運輸署一而再、再而三地提出新嘅「唔合要求」，好難唔會認為「擺明有心『拖死』部車嘅驗車」，並同意唔係我「諗多咗」。

催驗車，但迫遷新路線總站，一切只為「顧問報告」的劇本

又係上一篇撰文提過，運輸署早已聘請顧問公司就「低地台小巴試驗計劃」撰寫研究報告，預計今年(2020年) 第一季公佈。而因為當初公佈試驗計劃將會有三部車，仲爭一部就好難埋尾，所以就三催四請叫我「快手搞掂」。

前文另外提到原訂嚟緊星期日(3月2日)開辦嘅413號專線 (青衣碼頭 – 瑪嘉烈醫院)嘅總站位置變更，我同營辦商與及好幾位區議員都認為就係為咗目的壓低使用量，以使「劇本」擬好「低需求、低效益」結局能夠完成。

營辦商為咗總站位置持續同運輸署交涉，而响過程當中發現運輸署職員謊稱有同議員聯絡商討此事，然後就梗係有議員介入事件。結果不單係「睬你都傻」，甚至連同青衣碼頭總站越搬越遠 ── 瑪嘉烈醫院總站改至專科門診大樓「後欄」葵涌醫院日間康復中心；青衣總站由近碼頭海傍改在翠怡花園側。

呢部份嘅「故事」仲未完…..

運輸署對新開辦路線作「強姦式」處理

營辦商數週前通知運輸署司機擔憂武漢肺炎响瑪嘉烈工作嘅風險而辭職，打算押後413線開辦 (但維持同一牌照於大埔區的806A, 806B如期開辦)，並以過去幾十年N咁多個「分期開辦」嘅案例，請運輸署批准。運輸署嘅回覆係「要開一齊開，要押後就一齊押後，淨開大埔唔開青衣就搣你牌」。對於「案例」不作任何解釋。

表面上，運輸署一邊廂催促 413開辦，但另一邊廂阻撓部 Sprinter 低地台小巴驗車出牌，份顧問報告無法完成。但如果份報告咁樣改寫
「第三部車未有參與試驗計劃，故只以第一、二部車嘅數據為基礎」
係唔會影響「低需求、低效益」嘅結論。

與此同時，一定有傳媒追問點解無咗第三部車嘅時候，運輸署仲可以話係車輛供應商唔合作而導致，即係將所有責任推晒落我身上，將我徹底 dis-credit 於「低地台小巴」呢個項目，仲有，香港傳媒普遍對交通運輸公共行政零認識，即係就算訪問我，我講幾多幾淺白易明都無用，必定千錯萬錯都係我林鴻達嘅錯，甚至全盤抹煞我一直於交通運輸政策嘅工作，廢晒我嘅武功。

近乎完美「圍剿」佈局……..

相信大家睇到呢度，該明白文章開頭為何不是我一貫風格，寫到咁灰。試想想…… 413嘅營辦商信任我先至同意用呢部低地台小巴，在公在私在情在理，我必須保住佢檔生意 (十幾部車，千幾萬呀！)，但同時地見到「屈服就範」於運輸署嘅「強姦」的話，即係運輸署嘅「劇本」能如願以償的完成，並可能我嘅聲譽被毁。根本我是在被運輸署(甚至運房局) 全方位大圍捕，目標係要將我徹底滅聲。我可以唔灰咩?!!!!

但換另一個角度去睇，2017年6月，楊何蓓茵成功誘使「濕鳩CEO」進智公交陳文俊表態「袋住先」，就使 張炳良 可以用「收回法案」攬炒迫到 尹兆堅將「19變20」嘅修訂就算「數夠票」都要收回。但今次，陳美寶疑似未能對 413營辦商重演當年歷史，就唯有「出硬功」要全民大攬炒，迫使營辦商屈服並隔絕我對「劇本」嘅說三道四、指手畫腳。

我想徵詢大家意見，面對呢個局面應該點做。但大前題係必須保證大埔區的806A, 806B 如期3月2日開辦。呢個唔係利益唔利益嘅問題，而係運輸署發爛咋「搣牌」，就連 413 都會告吹 / 保住 806A 806B，先可以保證 413 在疫情過後能夠開辦。我初步有三個諗法方向：

1. 有得佢運輸署想點玩就點玩，與及目的，照跟佢劇本完成就算 (所謂歷史自有公論)。

2. 維持 413 與 806A, 806B 同期開辦嘅安排，然後聯同有關嘅區議員「砌」運輸署「跟返招標條款」做嘢，當然仲有 平治 Sprinter 低地台小巴嘅驗車。
但我幾乎100%肯定運輸署睬你都有味，即係結果同1. 唔會有分別，只不過懶係「繼續跟進」

3. 堅持只開806A, 806B / 押後 413 嘅計劃。 反正依家「揚晒」，又有咁多議員昅實 。再者「無司機願意上醫院」真係天大個合理嘅理由。
另外就要求運輸署署長陳美寶人頭擔保某個合理日子完成架 平治 Sprinter 低地台小巴 所有手續 可以準備出牌。
但我幾乎100%肯定以依家 港共軍政府 嘅脾性，一定「搣牌」搵營辦商墊底同我及全世界攬炒

大家可以用呢度嘅留言功能，或去我 Facebook Page 留言你認為1, 2, 3 邊個合適一啲，或者你有更加好嘅提議。多謝晒咁多位。