純粹標題黨，香港人應該唔止覺得匪夷所思，係發夢都唔駛旨意，原因一係讀書唔成打緊份牛工而收入唔多，一係就啱啱U-grad，入咗啲所謂大企業「7-11」，唔係便利店收銀，係朝七晚11有如奴隸得嗰雞碎咁多人工而仲要還 Grant Loan，唔好話生仔，結婚都唔好諗。
不過，歐洲國家盃進入淘汰賽前夕，英格蘭隊中前場嘅科頓 (Phil Foden) 突然臨時「因家中有事」要離隊，幾日之後返德國歸隊報到。到底所謂何事，英國傳媒日前報導原來係再任老豆。
2000年出世，現年24歲嘅 Foden 响15歲嘅時候加入曼城青訓，2017年首次以後備上陣，2020年8月轉入「正隊」展開職業球員生涯。佢同現任女友 Rebecca Cooke 响 2019年生咗第一個仔。你無睇錯，19歲做老豆。比著响香港一定係話 Foden 係一個曾經「衰十一但好彩無俾人拉」、無教養嘅衰仔！跟住到2021年就誕下個女，再跟住就到日前趕返英國，就係第三仔出世。
相信大多數香港人跟住嘅反應就會同錢有關。無錯，根據 Transfermarkt.com 嘅資料，Foden 响2019年已經身價值 2000萬英鎊，到今年3月左右，其「估值」已經升穿 1億英鎊，最新「叫價」1.3億英鎊。講「身價」或者只係一個數字，「人工」先至夠反映現實，現時 Foden 週薪 £ 225,000，即係兩個禮拜就夠買香港嗰啲「唔L係俾人住」嘅納米樓。
跟住呢，擅於「憎人富貴厭人貧」嘅香港人必定會話「唓，踢英超嘛，梗係大L把錢任生唔嬲啦」。的確，呢個講法可以話一啲都無錯。但我就反問返「如果你個仔話要去踢波」會乜嘢反應吖？
或者先公平啲講，香港嘅所謂職業足球運動，唔好話生仔，俾家用老母都好似唔係好得。所以真係要响香港做職業球員真係一如啲豐田打手話用三菱嗰句「聽揸兜乞食」。但就假設月入五萬銀，你自己或作為老豆嘅你，又有幾大意欲真係會去做 / 俾個仔去做職業球員吖？恐怕十居其九只會一句「踢到三十零歲要收山之後咪又係要去揸的士，讀好啲書好過啦」。
曾經响 HK Bus Channel 網站寫過篇文章講歐洲嘅職業足球運動造就咗歐洲嘅巴士製造工業，已可見足球於經濟嘅實效。而降低返啲層次同範圍响例如球會所在嘅社區而言，唔係可以俾人早啲生仔，或者具體啲講，第一，俾一啲未必適應到一般教學制度而又對足球有啲興趣嘅細路有一個出路選擇；第二，套用返香港嘅思維都可以講得通嘅情況，所謂讀書唔成淪為街童、童黨四圍蝦蝦霸霸，帶佢哋去踢波，起碼有得宣洩精力同有教練睇住。前晚助攻俾 Harry Kane 入波嘅 Ivan Toney (下圖) 就係例子之一。佢曾經接受專訪時講過佢初中時响 Northampton 就係街童四圍打交，老母見佢好似鍾意踢波就送咗佢去球會。
仲有第三點就係維持社區凝聚力，不過呢樣嘢正正就係支那匪最唔會要見到嘅事情。或許解釋得到點解香港做職業運動員會連老母都養唔到。再又不過，政府成日話人口老化要鼓勵啲人生仔，但係另一邊廂鼓吹學歷崇尚，加諸於小農基因「萬般皆下品，唯有讀書高」，老虎魚蝦蟹都要個仔女讀埋個大學學位，然後呢，計吓條數，U-grad 已經22/23歲，十個有九個一定孭住 Grant Loan，再然後的，十間公司最少七間係仆街 ─ 雞碎咁多人工，當啲員工係奴隸，無償OT係老馮，搵埋都根本掹掹緊夠使。
再跟住呢，搞啲乜叉「結婚產業鍊」出嚟，唔理好醜，總之要結婚就準備起碼六位數。呢樣都事少，正所謂扑嘢都要地方，公屋輪候？無四十歲唔駛旨意排得到；租樓？租約「一生一死」要做「現代遊牧民族」；買樓？還 Grant Loan 同進貢結婚產業鍊都使鳩晒，唯有睇吓老豆老母响銀行戶口甚至翻按層舊樓做首期啦。
响以上呢啲條件之下，根本無可能唔好話 Phil Foden 咁 24歲生三件，1991年出世，28歲先至生第一個小朋友嘅比利時隊長狄布尼 (Kevin De Bruyne) ，有邊個港燦可以從容不迫咁做得到吖？
所以呢，乜叉鼓勵香港人早啲結婚生仔嘅 idea 根本嘥9氣，唔止係支那匪，就是香港人自己都係，因為一日仲係抱住「讀書先至有前途」嘅諗法，根本就無可能做得到。或是現實啲講，要唔參與「結婚產業鍊」而唔會俾親戚埋怨恥笑，先至再講啦。不過咁，香港人就係又要馬兒好又要馬兒不吃草….
不過，呢篇文絕對唔係嘥氣，至少有點出個問題吖！我唔寫出嚟，你哋啲港燦會諗得到咩?!
Be the first to comment