台灣今日舉行「四大公投」投票，在 16:00 投票截止隨即點票，到大約19:00 四個公投議案發起人，除咗江啟臣潛水之外，全部宣佈承認失敗，「萊豬」發起人中國國民黨林為洲並宣佈辭去黨務。
先簡單解釋「遊戲規則」── 全台灣合資格選民人數約1980萬，最少1/4選民即495萬張「同意」選票先至再「分勝負」。如今結果唔夠數，即使多過「不同意」都係當輸。更何況「不同意」大過「同意」，就更加唔駛講。
事前我擔心中國國民黨又再使出「土包戰術」會湊效，尤其是「萊豬」，結果「唔夠數」兼夾 20萬票差距，總算大步檻過。其中一個因素來自台灣親藍營商界幾乎全面倒戈，原來唔是得把聲。據昨晚周玉蔻在民視主持節目時透露，有唔少公司老闆以放假或提早收工，動員員工返鄉投票，甚至出錢買高鐵車票。
另外，核四的勝負差距近50萬票，而「三接」差距約26萬票，當中亦好肯定有商界因素响當中。事關做生意的，尤其是台灣仲係傳統工業為主嘅經濟結構，其中一樣最著重嘅就係供電穩定。「核四」比「三接」嘅不同意票多十三萬，幾可肯定就係「核能安全」嘅加持。
呢三條 Bills 嘅投票結果現象當然抵消咗老K「土包戰術」鐵票，更是反映中國國民黨近乎徹底失去台灣商界支持，可以話 Total Lost。
至於「公投綁大選」，票數差距僅約17萬票，可算是對民進黨一個警號。原因之一乃其餘三條議案都係「大是大非」，縱對民進黨有所不滿都唔好攞自己條命仔 and/or 台灣前途「教飛」，但「公投綁大選」相比之下彷彿無關痛癢，用作發洩或「懲戒」民進黨政府也許無傷大雅。而「同意」還未過400萬，算係不幸中之大幸。
雖然四條 Bills 「不同意」票數多過「同意」，但分拆各縣市嘅點票結果，其實幾驚嚇。傳統「藍營」鐵票倉嘅花蓮、台東、南投、苗栗、澎湖、金門、連江 「同意」多過「不同意」就必然，但是，你以為「高度文明」而懂明白事理嘅台北，近年多接觸「高科技」嘅新竹市 (連埋縣)，或是民進黨經營有道嘅基隆、桃園，竟然四條 Bills 都係「同意」多過反對！新北亦只有燒到埋身嘅「核四」先至係「不同意」多於「同意」。
呢個情況正正反映台灣人嘅政治智慧仍然係一堆土包，仍然只會以傳統「藍綠分野」去了解或參與政治，唔會點用腦，總之「睇顏色投票」。反映台灣嘅民智水平仍「有待發展」並同時解釋得到老K點解仲有空間使出「縮春袋」呢啲荒謬至極嘅爛招。其中基隆 及 桃園 嘅結果更反映當地人存在對民進黨執政嘅不滿，與及新竹縣市合併「唔撚駛諗」。難怪總統蔡英文响1930 開記招時臉色「唔係幾好睇」。
呢個情況係導致我遲遲未能出文 & 出片嘅原因，因為要重新做分析。
無錯，高雄、台南、屏東嘅票數係導致公投結果嘅關鍵，但根本都係傳統「藍綠分野」嘅基礎。唯獨傳統上認為係偏藍嘅雲林縣，四條議案都係「不同意」佔多數。但要知道雲林係台灣養豬場集中地，而台灣嘅養豬業早已明言唔怕萊豬入口嘅挑戰，且希望盡快可以出口到日本、歐洲等地「賺外匯」。
至於中國國民黨當然大撚鑊啦。商界與其割蓆除咗肯定「金流」出代誌之外，亦反映老K 們完全錯判形勢，以為「台商」二字就是同「大陸」掛鈎，以為繼續「國共合作」就無往而不利。然後就以為「高雄發大財」嘅愚民可以再次湊效，可是連柯文哲、時代力量都幫埋拖仍然動員唔到25%選民，從選舉戰略方面去睇老K 嘅動員能力見頂，「土包戰術」嘅威力亦開始收縮。還有的是，公投投票前夕，美國已多次直接或間接指斥中國國民黨於公投的不是，加諸台灣商界嘅立場表態，中國國民黨 Total Lost 就係咁解。
雖然如此，但估計朱立倫在趙少康垂簾聽政之下嘅中國國民黨嘅大方向唔會有變，甚至為求向共匪就今次公投贖罪，搗亂將變本加厲。黨內派系鬥爭勢必惡化，侯友宜必定成眾矢之的，于北辰等「正藍派」亦必成目標，泡沫化，甚至分裂勢所難免。
公投已塵埃落定，接續下來嘅就係供電基建規劃、豬肉進出口以至整體貿易政策制訂等實務執行。亦當然台灣局勢有可能急速惡化，呢個不厭其煩嘅再講一次，點解我會叫大家多留意台灣政局嘅原因。
相關嘅影片節目已經上載至 Jacky Lim Channel YouTube頻道
歡迎收睇。睇完記得 Like 同 Share
Be the first to comment