英超降班之局差唔多已定

先啟：靜咗好一段時間無寫文、無出片，係因為要處理屋企啲私務。如今已經搞得七七八八，開始可以咇到啲時間，會陸續寫返文、出返片，同埋處理返 HK Bus Channel & HK Car Channel 嘅內務。總之，幾邊channels 都陸續會有嘢畀返大家睇㗎啦。

入正題。可能好多讀者朋友都覺得奇怪點解近期無啦啦會講英超，其實就唔係冇嘢搵嘢講，只不過係一方面我認為唔好一味講政治，唔同嘅範疇都有好多 insight；另一方面，我冇話特別捧邊一隊，覺得好睇就會睇，唔好睇嘅就唔會睇，而由此引伸出嚟其實做到好多觀察，拎出嚟講當係擴闊下大家嘅視野、刺激下各位嘅思維咁解。

先從開季開始講起

一如以往，三隊由英冠升上嚟嘅球隊，富咸、般尼茅夫，同諾定咸森林，都係被睇低一線，尤其是森林，因為大部分球員係 Loan 返嚟拉雜成軍，加埋領隊 Steve Cooper 俾人感覺「游下游下」，所以相信都好多人會認定森林都係「搭𨋢」㗎啦。

但其實響我個人情感上，我幾想森林可以踢得好，因為森林事隔廿幾年升返上頂級聯賽，勾起返我好多童年回憶。冇錯我真係冇睇開波，但係好耐好耐之前，講緊 TVB 仲會偶爾直播英國波嘅時候，我都叫做會睇吓嘅。記憶中，「森林」就係其中一支強隊而經常會睇得到。但之後要俾錢 CABLE 或者 NOW 先有得睇我就冇再睇，頂多偶爾去一個朋友開嘅間酒吧先至會睇吓。我響 Facebook 出 post成日講嘅「童年回憶」其實就係咁樣嚟。

狂炒領隊，於事無補

去到世界盃、聖誕前後，幾支傳統強隊嘅成績都好似滑雪咁，例如最多香港人追捧嘅曼聯、利物浦，甚至跌咗落去下半版以至例如「西火腿」直落榜尾排第20，真係嚇死好多人。

而响差唔多同一時間發生嘅，就係接連有領隊被炒。今個年度總共有24名領隊被解僱，係英超史上最多嘅一個年度。最多人談論嘅莫過於車路士搞掂咗蘇聯普癲大帝老友阿巴莫域治啲蘇州屎，新班主Todd Boehly 一嘢就兜咗 Thomas Tuchel 走，撬咗白禮頓嘅 Graham Porter 過檔之後輸到仆街就再「兜」；仲有阿士東維拉炒咗上季護級有功嘅「謝老四」，仲有熱刺炒咗「乾地」Antonio Conte。

不論响香港抑或英國，一直好多人認為換領隊就可以改善球隊嘅表現，但係車路士前後換咗三個領隊而成績都無改善，以至愛華頓呢隊响 Tier-1 聯賽留得最耐嘅球隊，自 Farhad Moshiri 2018年入主以嚟幾乎一年換一個領隊，結果越踢越沉，今季仲陷入降班旋渦且無跡象顯示可以成功護級，其實已經引證換領隊嘅作用唔係必定。直到响林柏特被炒之後，英國當地嘅球迷已經將矛頭直指向班主 Farhad Moshiri，認為係佢搞爛隊球隊，甚至近期更加出現認為愛華頓降班等Farhad Moshiri 輸錢輸到仆街而嘔返隊波出嚟然後砍掉重練好過。

車路士同樣出現類似情況，球迷圍攻班主 Todd Bohley 搞亂檔。多少都證明搵領隊做代罪羔羊根本於事無補，英國嘅球迷亦似乎意識到再遷怒於領隊亦唔係辦法。

包尾嗰五隊逐隊「數」

你話領隊有冇責任，呢個我有時間會另外寫一篇文章去分享我嘅睇法。只不過而家响榜尾頂盡得30分嘅五隊，修咸頓都無乜嘢好評㗎喇；至於愛華頓，你話林柏特廢咩？我响季中已經私下同啲朋友傾計講，亦响 Facebook 出過 post 講過，愛華頓千錯萬錯最錯就係舊年暑假賣走 「巴西街童」Richarlison，成對波嘅攻擊力大幅削弱，就算後防唔係一盤散沙都好難贏波，「林伯」根本可以話「巧婦難為無米炊」。英國嗰邊嘅球迷輿論唔止有同一個講法，仲有狠批 Farhad Moshiri 搞爛塊老招牌，甚至以 IT 術語 Garbage in Garbage out 替林伯辯護之餘直斥 Farhad Moshiri 攞咗啲錢去「洗」而唔係去買球員搞好對波，根本請邊個教都係無用。雖則 the latest 有 32分排第17，得失球輸李斯特城 6 粒，若最終降班成局，其實一啲都唔意外，只不過的確感到有啲可惜。

至於森林，正如文章開首所講，今年係拉雜成軍，加上波衫心口開天窗 (依家個 UNCHR 廣告只係純粹擺啲嘢响心口咁解)，即係唔夠商業贊助，因此公道啲講 Steve Cooper同林伯一樣，好聽啲講「限米煮限飯」，如果最後留得低响英超就好彩，要搭𨋢返落去英國就正常。

至於分別李斯特城同列斯聯，坦白講悠久以嚟都被認為係魚腩部隊。雖然李斯特城响2015-16年度搞到連尼加要淨係著住條底褲做節目，但始終都唔可以話係一隊似樣嘅波。

至於列斯聯，我嘅印像，第一係 just a little bit better than 狼隊嘅爛仔，第二係我睇見個正選龍門 Illan Meslier 碌竹兼碌杉咁樣，正所謂打又唔得睇又唔得，唔好講話沙拿、山曹、Rashford、KDB呢啲咁堅抽嘅球員，是但一個表現稍為正常少少嘅中前場球員，例如維拉嘅Watkins、Newcastle 嘅 Callum Wilson，見到佢都覺得「唓，冇料到嘅，駛乜驚呀」，列斯聯留到响英超幾年可以話算係執到㗎啦。

臨尾四場又炒領隊，搵個所謂護級專家嘅大SAM 返嚟又如何呢？用返車做比喻 ~ 一部 1.0L 嘅 OPEL Corsa ，唔好話對住法拉利嘅所謂 Big 6，就是對住一部英國周街都係嘅 family car Skoda Octavia，冼拿翻生都追唔到啦！

最後預測

雖然公平啲講，仲有一場甚至兩場先可以對修咸頓作判決，但我睇應該都係「係咁先」㗎啦。愛華頓好彩就第18名降落英冠，排第19落去亦正常不過。至於第三隊會係邊一隊，情感上我就想列斯聯，但現實可能真係諾定咸森林落返去英冠操多一兩屆先。

後記：英冠升班可能有睇頭

詳細嘅就梗係睇下完埋附加賽之後有冇時間另文詳述。但般尼提前七場確定可以升班，而且如無意外會繼續係由甘賓尼主教，係值得期待。以一丁點政治觀察角度去睇，比利時人嘅膠力+執著+賭撚特性，甘賓尼由決定執教般尼開始歐洲球評已經認為佢攞自己嘅事業前途「豪賭」，提前七場確定升班而最終分數101分，亦證明佢唔係「亂鳩咁賭」同似係有啲實力。

我對甘賓尼領軍仲有一個考慮，就係2019年5月7日，曼城要贏李斯特城先至仲有機會攞聯賽冠軍，但哥狗竟然勒令任何球員都唔可以射波入龍門但甘賓尼偏偏「抗旨」，我認為「公司佬」因為呢件事而對住哥狗一定有啲嘢想做。當然仲要睇般尼埋班嘅球員嘅實力啦。順便講，我懷疑哥迪奧拿「打假波」，呢單嘢係其中一個主要因素。

至於排第二鐵定升班嘅錫菲聯，我初步觀察評估係由班主到領隊到球員都有團火，而班主係沙地王子 Abdullah bin Musaid Al Saud。正所謂要同曼城鬥燒銀紙都仲得。但當然要睇吓有無亂使錢亂買人、買錯人，甚至一個唔該買咗件有如丙朗返去搞到成個更衣室天下大亂，咁就幫佢哋唔到。