銅鑼灣世貿中心三級大火

原本準備緊節目講台灣，但突如其來銅鑼灣世貿中心三級大火，只好快快手手評咗呢一單先。

截至撰文為止，五樓平台約100人被困而消防員已陸續將佢地救落地面，但39樓天台就有約350人被困，暫時仍未能拯救。呢堆數字反映呢場火警嘅危機程度比1997年油麻地嘉利大廈嚴重得多。

被困於天台嘅三百多人確實使人擔心，雖然火場在最底嘅幾層，理論上蔓延到高層嘅可能性唔大，但始終未能返回地面就是風險。拯救困難在於天台離地高度152m，而消防處現有嘅鋼梯車，最勁嘅一款嘅雲梯攀升嘅高度只有56m，但出動直升機又可能引起其他風險…..

可能大家即刻問有無需要買能攀升得更高嘅消防車。或者先咁講，起樓無限高，無可能完全追得到。美國紐約市目前升得最高嘅消防升降台車嘅攀升高度係137呎，即係41.8米，香港已經好勁。香港消防車嘅主要「裝斗佬」Rosenbauer 最高規格嘅鋼梯車攀升高度係64米。芬蘭Bronto Skylift 有一款「斗」型號F-HLA 112 「升降台」車，攀升高度係112米，應該係目前全球升得最高嘅消防車。

根據報導，地下至五樓嘅商場正進行裝修，懷疑有人為免裝修機械濺出火花觸發消防灑水系統而將之關閉。假如屬實，就同當年嘉利大廈五級大火嘅肇因幾乎完全相同，真心想問大業主新鴻基郭氏家族 and/or 世貿嘅管理處 係咪真係唔識汲取歷史教訓?!

唔想扯咁遠批鬥新鴻基呢間「賣香港」嘅公司，但撇除2019年「反送中」時期該集團嘅所作所為，旗下商場根本真係服務「同胞」，目的當然係為賺錢啦。但古語有云「君子愛財，取之有道」，自從「自由行」出現，新鴻基就採取有如殺雞取卵嘅方式改建商場，其中沙田新城市廣場由「街坊生意」mixing with 名牌商舖變成全部「賣名牌」，可以話最顯然易見嘅例子。

新鴻基响1994年從怡和手上買入世貿中心之後，隨即將碧麗宮戲院關閉，然後改建商場。貪錢就梗㗎啦，更大嘅問題係變相摧毀咗香港同世界各地藉著電影嘅文化交流平台。想當年 (1996年) 剛剛完成改建商場之後，都仲會去蒲下，尤其是五樓嘅機舖，但搞搞吓又係「為人民幣服務」。

另一點要指出嘅係裝修工程係可以撥入會計賬目的經營開支項目，簡單啲講即係將盤數嘅利潤降低，從而交少啲利得稅，只不過稅務局唔容許將裝修花費嘅錢一筆過撥入一個財政年度嘅賬目，而要攤分若干年份 (由核數師評估後決定) 入賬。意即一次裝修所花費嘅成本，可以用作未來幾年嘅賬目預備。這就解釋到點解世貿中心以至新鴻基旗下嘅商場好似「永續大裝修」。

依家只期望火勢盡快撲熄，所有被困嘅人陸續平安，唔好有嚴重傷亡。

後記：好多人話新鴻基嘅樓係質素保證，但近年都每況愈下。郭家搵錢不擇手段都可以話鐵證如山，下面呢張1976年航拍圖，更見證住新鴻基為發展地產破壞環境所做過嘅仆街事其實遠超大家想像

紅色標記範圍係現今一個私人屋苑「星堤」嘅大約範圍，望真啲原本係平地嚟㗎 (可以點擊圖片放大嚟睇)，但點解依家個屋苑好似响一座山丘上面？自己諗吓郭得勝呢家人做過啲乜啦。