四個半月以來，唔少人向表態支持政府嘅人物、商戶，作出各式各樣抵制行動，輕則例如譚詠麟嘅歌迷掟爛晒佢啲唱片，罷食美心、罷買360，重則召喚 神獸鶳，「裝修」、火攻、水灌、泥封……
又有唔少人認為，唔敢勇武就最起碼杯葛罷食罷買，更有人整咗 Apps 去搵「黃店」，確實使好多「藍店」生意下跌。「廿蚊張」條粉腸走出嚟話「唔介意商戶因為生意改變政治立場」，有啲人就拍爛手掌話「戰術成功」。但我嘅睇法係「Business is Business」，無嘢值得高興，頂多係唔駛去到拍掌尖叫歡呼嘅級數。
「你條仆街又潑冷水……」相信好多人又準備想咁抦我。我只知道作為評論人唔係要為保個人地位只講附和公眾嘅說話，係要講真實嘅嘢，甚至更應該提出一般人未必睇到嘅見解。
講返正題。我呢四個月其實唔係太在意「藍」定「黃」，原因就如之前我講「神獸鶳」提及「有無公開表態支持港共軍政府」做準則 ── 有嘅就係咁先；無嘅就當無嘢，但唔好辣著我；若肚餓得滯「為勢所迫」而附近得返大家所講嘅「藍店」…… 唔通唔撚食咩，胃痛頭痛我受咋，你老味！咪同我「原則塔利班」吖。
我不嬲都係實用主義，亦會懂得從商界角度去觀察分析，一早諗到一個可能好多人仲迴避緊嘅現實問題 ── 所謂「藍」定「黃」，縱有真心，亦有假意，甚至不懷好意，也有心有餘而力不逮。但歸根究底，都係同商戶嘅政治判斷能力有關。
真心的，箇之然係基於政治判斷認定某個立場。例如 360 嗰啲，真心愛国愛党，願意赴湯蹈火；又例如幾間我長年累月光顧嘅商號而早已知道東主嘅政治取態，或早在六月份已經公開表明立場嗰啲。
假意嘅，可以係「廿蚊張」口中嗰啲「無奈因為生意要改變政治表態」嘅「藍轉黃」，亦可以係早已判斷或預計 港共軍政府 將會冚家鏟「不如早啲向『暴徒』示好，保住個檔口要緊」。無錯，呢啲就係好多政客所講嘅「政治投機者」。雖然响大戰略角度，呢啲優勢梗係用住先啦，但亦要提防他日局勢逆轉時，呢啲投機份子就隨時帶頭由「黃」變「藍」。
我更有過親身遭遇係咁嘅。週前有友人「吹雞」去「懲罰」某間有人响網上宣稱店主係「黃」嘅食店。可是食品質素「又未至於唔擺得入口嘅……」，埋單計數人均消費係同類食店接近一倍。當刻我嘅下意識覺得呢間店舖似係「藉表態乘機發國難財」。可以話係「不懷好意」嘅例子之一。
再仲有一種「不懷好意」、而且極度危險嘅可能，就係不論「一直黃」還是「藍變黃」，想搵錢之餘順勢「刺探『暴徒』軍情」。又係嗰句，唔好覺得我講得太誇張，支那共匪 嘅鬥爭手段就係咁毫無底線。淨係噚日 譚仔米線 通告件事，就知道 共匪 真係可以乜嘢仆街嘢都做得出。
而我睇到嘅係，唔計「中立撚」，有更多商號不論乜嘢立場，都無做大家渴望 直咇腸 公開表態。原因可能怕被「裝修」，亦有可能「身在曹營心在漢」。「曹營」所指唔一定係 共产党，亦可以係 港共傀儡政權，或是其他勢力，例如福建幫。呢啲「心有餘而力不逮」嘅商號係好難辨認到出嚟，甚至因一個小職員「鬧曱甴」而被杯葛甚至 「裝修」都只能啞子吃黃蓮。
好坦白，今時今日Social Media 嘅氾濫程度加上其實乜都 Check 唔到嘅「Fact check 撚」，到底一間商號嘅真正政治立場係乜，係可以老吹老作，甚至不能排除有為求打擊對手將「黃」老屈變「藍」都得。呢個係我無好堅定不移睇「黃」定「藍」先去光顧嘅另一個主要原因。
從軍事角度去睇罷食罷買，確係取得一啲成果，應該繼續進行擴展，但既然仲有好多逃避唔到嘅風險可能，就唔可以盲目地進行，要避免誤中副車「有心，但唔做得」；更要提防假意、不懷好意所產生嘅潛在風險。
歷史唔係未發生過戰俘獲釋返回敵方陣營後…… 所以「藍變黃」係一定要做驗證。可以如何驗證？再次的Business is Business，做生意「睇風向」只係為賺更多錢 ── 之前堅定不移的「撐政府、撐警察」應該賺埋唔少嘛，「嘔返出嚟」捐俾星火同盟、醫療支援社工隊等支援抗爭嘅組織。更唔少得「跪玻璃」級數嘅道歉 ── 香港人眾籌登過幾次報紙廣告，一個起碼半版嘅公開道歉廣告絕對唔少得。而且，齋捐咗錢仲可以暗撐甚至明撐 軍政府，但一個廣告black & white確定無得「吃回頭草」，才是真正的投名狀。
Be the first to comment