李顯龍唔出聲無人話你啞

四個多月以來，馬來西亞狂鬧香港人大逆不道，搞到香港人非常憎恨馬來西亞呢個國家同啲人，尤其是華人；新加坡可能因為 Channel News Asia 一直有响香港做第一手採訪，甚至 Live 住 港共軍政府衛隊 做盡仆街嘢，整體就稍為好少少，但政府官員就屢次「辣著」香港人。

8月上旬，內政部長尚穆根 Kasiviswanathan Shanmugam 試圖扮演和事佬，但又強調「香港係中国一部份，北京有權指手劃腳」，甚至講到「中國經濟實力對新加坡非常重要」。香港人無乜邊個知道呢個人，但知道嘅而又有睇到個 Post，全部嬲到火山爆發。

跟住到李顯龍老婆何貞响 9月5日 Share 撐警大聯盟啲相，雖然個 Post 無加 Caption，但由於香港都多人知佢乜水，就「火勢迅速蔓延」，仲開始有網民、朋友私下問我「新加坡政府想點，係咪企共匪嗰邊」。當時我都無講得太多，只係話「新加坡成日想做和事佬，但又唔夠料」。

噚日 (17OCT)，李顯龍自己就衝出嚟柒，加埋香港傳媒為助 支那共匪 搞輿論所做嘅翻譯「推翻政府」(原文係 humiliate)，就全香港「著晒機」屌爆李顯龍以至新加坡政府。我亦唔再忍口，完全唔客氣响 FB 出 Post 串到「二世祖」爆機。

先扯開少少講，好多香港人成日認為新加坡唔可以鬧鳩政府、唔可以同行動黨作對。唔講 Progress Singapore Party 嘅出現擺明鬧到 PAP 爆廠咁高深，單係我個 Post 就係典型「坡式狂抦政府」風格，同示範新加坡政治嘅「江湖規矩」── 你要鬧政府一定唔可以老作鳩吹，否則告到你仆街；有齊足夠理據先可以鬧，仲可以當沙包咁打。我用李光耀嘅歷史屌柒李顯龍，直情係大絕！

有人問我，「扣留裝甲車」事件之後，新加坡政府無理由同港共政權同聲同氣，但响「反送中」問題竟然仲同 港共 講好話，係咪 Short 撚咗??!
甚至認為李顯龍、PAP 媚共，甚至懷疑投共。係唔係我唔夠膽講，但吳作楝出任總理之後嘅亞太區外交及經濟政策向 支那共匪 靠攏，就盲嘅都睇得到。是故之，有對 吳作楝為首嘅派系稱呼「親中派」。

而且，新加坡過去十幾年從中国得到唔少經濟好處，因而吳作楝嗰一派响 PAP 黨內把聲比較大，李顯龍就算坐正總理位都唔敢响涉及中国嘅問題有太多動作，即使來自中国嘅留學生、移民搞到新加坡國內充滿怨氣，都無採取行動，直至2013年 5000人示威，仲要打正旗號反對外來移民搶佔新加坡社會資源，先至稍微調整移民、留學生有關嘅政策。

直接啲講，中国响新加坡國內造成嘅影響李顯龍都得過且過，佢會 take side on 香港人呢邊？don’t be silly la, ah dee ah mui uncle auntie！

可是 PRC Nationals (新加坡人對中国移民、留學生嘅統稱) 的確响新加坡搞到七國咁亂而民怨充天，具體情況就摷我嘅舊文睇。李顯龍以至成個 PAP 唔係唔知要處理，但礙於「國策」而似乎無得快速而有效處理，結果就催生 PSP 呢個政黨，仲要俾 PSP 陳清木醫生兜口兜面鬧「依家嘅PAP 唔再係李光耀時會捍衛新加坡人權益嘅 PAP」，你估李顯龍唔知大難臨頭呀！講白啲，李顯龍面對最少兩個「大難」── 1. 嚟緊呢次大選就算唔輸甩褲，都好大機會輸咗 2/3 絕對多數；2. 民怨响政黨政治有更實在嘅宣洩出口，但實際問題仍未解決，有大爆發風險。

輸大選呢個「大難」可以話避都避唔到，甚至不排除發生 「李顯龍大戰李顯揚於宏茂橋」(我真係樂觀其成)、以至親妹李瑋玲披甲上陣。但民怨大爆發呢個「大難」，佢仲以為可以避。實際上就完全無得避，甚至無辦法控制幾時爆、邊度爆、點樣爆。唔係 PSP 會煽風點火，事實上亦唔可能，而係民怨已經接近谷爆邊緣。

想像一下，新加坡坊間對於反送中抗爭場面嘅反應係咁：
「港仔無NS (服兵役)，無槍又無炮竟然夠膽同差人打過，仲要捱得咁耐，真厲害！」
「港仔連槍都無枝竟然有膽同可以出坦克大炮嘅共產黨反抗！」
「一瓶水一個碟 knock out 一隻 tear gas bomb！」
「Throw back a tear gas bomb like on tennis court!!!!!」

更是我 9月初返古晉過境新加坡時响 Hawker Centre 親身經歷 ── 幾個攤檔檔主都表示知道黑警濫捕濫殺 TG 放題，what happened 721元朗 831太子……

如果你係李顯龍會諗乜吖?! 仲講啲會 Favour 到你班「暴徒」嘅說話？咪撚傻啦！仲有呀，新加坡有兵役制度，幾乎人人識揸槍……

正如前述新加坡對中国嘅「國策」同 PAP 黨內派系問題，唔可以講真正嘅公道說話；但為勢所迫接二連三「辣」香港人，根本阻擋唔到新加坡人接收香港當前呢場革命嘅資訊，甚至加快香港「輸出革命」到新加坡嘅速度…… 呢啲橫又死掂又死嘅局面，李顯龍收嗲而留返啲精神處理 PRC 嘅問題好過啦。

後記：以往新加坡/馬來西亞有乜大新聞而且涉及到香港，傳媒都會嚟搵我攞料甚至講兩句，但呢兩日對李顯龍嘅輿論嘈到拆天，我未收過一個電話 / Email / PM。

唔係酸，其實都已經習慣。而且，早陣子有已離開傳媒嘅朋友同我咁講：
咁多年嚟，你每次出聲/寫嘢都係吓吓一嘢篤到應一應，就好似6月7日粒汽油彈咁…… Quote 咗你，啲報館電視台用開嗰堆有朵有牌頭嘅名人點算呀？
你專長嗰啲Topic無其他人講到？咪直頭唔搵人 Comment 空白咗佢囉。
你嘅弱點就係無 U-grad，唔鍾意應酬唔肯埋堆，所以冚世界就用學歷同「牌頭」嚟排除你。
搵個有朵有牌頭嘅鳩噏錯晒，俾你搵到千萬個錯處又點？香港人係金魚腦嚟㗎咋！

聽完佢咁講，唔止當堂明白晒，仲可以對香港傳媒徹底死心。香港果然已經變成有如共匪治區講關係嘅一個中国城市。