「反送中」馬來西亞 五毛海嘯

反送中抗爭以來,世界各地傳媒爭相大幅報導,多國人民都表示關注同支持香港人,而破口大罵嘅除咗支那匪區之外,仲有馬來西亞。好多人(尤其是關注過2013同2018年大選嗰啲) 唔明白馬來西亞人為爭取民主、為求推翻巫統為首嘅國民陣線嘅統治不斷抗爭,為何對香港「反送中」抗爭就鬧到狗血淋頭,甚至比支那共匪五毛党更五毛。

雖然大馬當地傳媒有過多篇評論分析,指出當地華人嘅思想不過是「大中華膠」,所以反對「反送中」,但都無深入剖析骨子裡箇中成因,更當然無乜「從香港人角度」嘅觀察,事關南洋政治來來去去就只得黃世澤同小弟真正懂得寫 (沈旭暉及其黨羽?躝返去大灣區啦!)。而只要明白馬來西亞因乜事搞成咁,既可「放棄」馬來西亞,又可以搵到一啲「彈藥」同港共傀儡政權及支那共匪「駁火」。

華人的身份認同還是中華民族

華人遷徙至現今馬來西亞嘅歷史最早可以追溯至「鄭和下西洋」,但最大規模嘅遷入係大清帝國同治帝之後嘅日子開始,即係鴉片戰爭之後,一直到民國北洋軍閥時期 (1930年代初)。本來普遍的只係打算「搵夠就返鄉下」,但一係就「搵極都唔夠」想返都無能力或「無面子」返去,或者一係發覺「鄉下已經七國咁亂」就無謂返,於是就响當地落地生根。

到二次大戰日本佔領,生活當然苦不堪言,到戰後隨住所謂反殖浪潮,萌生厭惡英國殖民走狗之念,當然有認為「英國佬抵抗日本蘿蔔頭不力」嘅諗法;再適逢支那共匪之興起,透過陳平的馬來亞共產黨 / 文銘權的砂朥越共產黨於馬來半島、婆羅洲進行「輸出革命」,催化華人「認祖歸宗」之念。除咗導致數十萬人離鄉別井走上「南洋愛國僑胞」的不歸路之外,另因為馬來亞獨立(1957年)、馬來西亞成立(1963年) 嘅過程,更使華人既討厭英國又唔滿意馬來人,再覺得自己係被遺棄、被受忽視嘅一群,於是乎就算無「投奔祖国懷抱」心底裡還是認為自己係中國人,或最起碼認為自己的「根」在中國。

另一方面,雖然馬來半島在英國當「監護人」期間,英國佬都重用華人,特別在經濟方面。可是在馬來亞獨立嘅過程當中,英國政府只集中同馬來人政黨巫統商議、近乎完全排拒華人嘅參與,極其量只同巫統講掂數安排華人負責「同錢有關」政府工作 (第一任財政部長李孝式爵士,第一任貿易與工業部長及第二任財相陳修信)。加上全名「馬來民族統一機構」嘅巫統就係以民族主義組成,一開始就已經採取敵視華人嘅態度同立場,與及全面主導獨立過程而且草擬憲法訂明馬來人擁有特權、或相反角度而言就係壓制華人,就使華人更加認為自己是「受到打壓的一群」,心態上渴望「救世主」嘅出現。

(注意:香港地太濫用「殖民地」呢個字眼。但「殖民地」之意的基礎係宣稱擁有主權,而馬來半島除咗檳城、馬六甲及新加坡,其餘現今馬來西亞的九個州,英國並沒有作出主權宣稱;英國只係充當有如保安公司/管理顧問公司嘅角色,關係、地位、國籍上,該九個州只係「保護國」。所以我用「監護人」呢個形容詞/代名詞)

華人沒有融入馬來西亞嘅意式同渠道

其實响馬來亞獨立嘅過程當中,華人亦並非沒有參與,但好可惜,係馬共以鬥爭甚至武裝行動為主軸,結果就導致英國同巫統均將華人拒諸門外嘅因由。無錯,從歷史宏觀角度,無馬共陳平嘅「鬥爭」,英國唔可能急急腳在1957年離開馬來亞。呢個係馬來亞華人認為英國佬同巫統「欠咗佢哋」嘅說法。可是即使撇除共產主義,陳平嘅手段造成更大嘅社會秩序危機,平心而論根本無人可以接受。但是,馬來亞華人只顧堅持「爭取獨立有功」,無視馬共造成嘅破壞嘅歷史真相,甚至堅定不移認為陳平係歷史英雄……試問馬來人點可能信任華人!

甚至是馬共唆使華人「投向祖國懷抱」所衍生出國家效忠嘅問題,巫統點可能唔抱持「非我族者,其心必異」嘅道理看待華人,然後進行打壓?! 而在相反角度,華人心底裡總懷有對「祖國」嘅盼望,望住當前身處嘅南洋受盡「好食懶飛」嘅馬拉佬白眼,好自然地心理上會出現「只要中國走向強大」就是「救世主降臨」嘅意識。

華人拒絕融入馬來亞,巫統亦只顧打壓華人,結果就無人處理呢個問題。相對新加坡,李光耀不單基於國家安全嘅政治考慮心狠手辣怒劈散播「大中華主義」嘅華文傳媒,亦進行軟性「洗腦」驅使華人切斷同中國的「根」,例如電視劇《霧鎖南洋》,使新加坡華人不再是 Singapore Chinese 而是 Singaporean (頂多加上 Ethics Chinese 作為描述),就更清楚見到馬來亞華人嘅問題所在。

除咗無切斷同中國的「根」,另因為覺得受到馬來人、巫統政權排擠,華人不單生活聚居自成一角,再加上「根在中國」嘅觀念,認為學校教育都要有自己的一套,就出現所謂「獨中」(香港習慣叫法「私立中學」) 。除咗因為「國策」而會教授 Bahasa Melayu,其餘科目主要以華語授課。但最「攞命」嘅係歷史科竟然唔係讀馬來西亞史或東南亞史,而係讀「中國歷史」,仲要用來自台灣具老K背景出版社嘅課本同教材!

我以前都寫過好多篇講過「國民黨特色中國歷史」就係以「中華民族」民族主義為基礎,宣揚大一統。大佬呀,細路讀埋啲咁嘅嘢,點會唔變「中国人」吖!然後的又回到前一部份的「身份認同」問題,結果華人咪世世代代都認為係「中國人」,或是「來自中國的馬來西亞華人」囉!

或者大家想反駁我「林冠英咪認咗我係馬來西亞人囉」,但你都識得講係「林冠英」啦…… 佢以至成個DAP,只係成個馬來西亞嘅少數。最重要嘅係林吉祥到林冠英唔係讀華校獨中,係受英文教育的。試吓去啲鄉下地方搵間 Mama Stalk 叫杯 Kopi 同嗰度啲華人吹水吖,我敢保證你一係想講粗口、甚至想打人,或者學 Donald Trump 响河內咁 walk out 呀!

留意呢兩部份嘅用字係「馬來亞華人」,相對於「馬來西亞」還包括俗稱東馬嘅沙巴及砂朥越,像是闡述呢個問題較集中發生於馬來半島。的確,就以「反送中」為例,砂朥越華人都有「鬧」,但無好似半島鬧得咁犀利、咁瘋狂。除咗因為砂朥越都有主權爭議以至獨立運動興起,因而抗拒西馬嗰一套意識形態之外,歷史上砂朥越於馬來西亞係一個絕對異數 ── 曾為獨立國家 (1841-1946),期間的官方語言及教育制度係英語;主要宗教係基督教而非回教;砂朥越華人多數祖先原藉是客家人,客家人本質就係習慣漂泊,而且砂朥越隔離嘅印尼西加里曼丹省坤甸,就係亞洲第一個共和政體「蘭芳共和國」首都,而「蘭芳共和國」就係由客家人建立的。

至於沙巴,其實對反送中都「鬧」得犀利,只不過1976年「被降格」之後,連出入境管制權都被收歸中央,巫統政治勢力大舉進入,因而可以話「鬧」得犀利嘅原因都係由巫統一手造成,所以就是「馬來亞華人」。

「強國堀起」就是「救世主」出現了

1974年馬來西亞同中华人民共和国建交,當地華人 (尤其是半島) 嘅意識認為「終於同祖國聯繫上了」,但骨子裡所渴望的是馬共嘅「解放」得以實現,可是馬來亞革命之聲電台在1981年關閉,結果成為泡影。另一邊廂於大馬國內,馬哈迪上台推行國家現代化政策嘅同時,進一步打壓華人,就使華人縱使生命沒受到威脅,但開始感到「翻身無望」。

到8964北京大屠殺之後,本來更感到絕望,但承如學運領袖王丹所言,國際社會憨鳩鳩地以為可以透過推動中国經濟發展促成中国和平演變步向民主嘅大形勢出現,大馬華人一方面開始對中国嘅經濟利益「流口水」,另一方面就重現「救世主降臨」嘅希望。

再進入2000年之後的「強國堀起」勢頭,尤其是納吉擔任首相之後採取全面靠攏中国嘅外交及經濟方針,大馬華人認定「救世主」終於降臨了!因為從中国取得實利,意識上認為是「馬共神話」的延續,就認為只要維持同「救世主」的良好關係,就可以無往而不利;甚至以為「巫統都要睇中国面色做人」而唔會再欺負華人,於是乎就對中共的一切意識形態、觀念,不加思索照單全收,覺得「跟隨黨的路線」就得到永生,阿們。然後的,但凡同中國呢個「彌賽亞」作對的就是撒旦,必須除之而後快。

所以,大馬華人 (尤其是馬來亞的華人) 鬧反送中鬧得咁凶狠、狼過華秀隻狗、比五毛黨更五毛,就係咁解。另外,加上馬華公會不過是「中國國民黨馬來亞支部」嘅本質,所以大馬華人普遍地反對台獨,甚至乎因為「國共第 N 次合作」,更認為中共呢個「彌賽亞」是最堅定可信的。

中共繼續向馬來西亞輸出革命統戰華人

除咗「馬共神話」的延續深深植根於華人心中之外,中共以經濟利誘為基礎,又當然唔少得意識形態滲透統戰,繼續向馬來西亞「輸出革命」。

意識形態滲透當然唔再係陳平、文銘權嗰種,使用嘅「工具」亦與時並進,除咗五毛黨,就有一個同香港人息息相關的 ── CCTVB。

悠久以來,馬來西亞都沒有華人語言嘅電視廣播,直到1996年,Astro Holdings SDN. BHD 成立,並隨即同 TVB 簽約設立「Astro 華麗台」轉播無綫嘅電視節目 (2010年起以衛星同步播放新聞部以外的節目,另配合原有的轉播)。雖然仲有 Astro AEC 華語電視 (Ch. 301,Ch. 306 高清),但 TVB 實在太深入華人人心,甚至可謂「當神咁拜」,又因為在此之前,華人到影音店租借無綫「賣埠」嘅劇集、電視節目錄影帶回家觀看,大馬華人極度倚賴 TVB 接收香港的資訊。

雖然 Astro 華麗台沒有袁志偉的洗腦新聞,但就有鳳凰衛視。另外,馬來西亞最大的全國發行報紙《星洲日報》,同香港《明報》同屬張曉卿嘅世界華文媒體集團。事實上,《星洲日報》關於香港的報導,不論新聞版還是娛樂版,都係同《明報》攞稿。直接啲講,睇星洲即係睇明報。而且張曉卿所控制嘅報章仲有《南洋商報》、《中國報》同埋《光明日報》;剩低《東方日報》連同《詩華日報》二合一計全國發行報紙。

响以上嘅電視同報紙嘅情況,馬來西亞華人會接收到有關香港嘅新聞資訊係乜料子,都唔駛我再多講啦。再者,仲有大量中共豢養嘅五毛黨式網站傳媒响馬來西亞肆虐,例如大榴槤網、榴槤台…… 試問馬來西亞華人點會唔個個都五毛上身吖!

爭取大馬民主但反對香港爭取民主咁「人格分裂」?

先要明白,真係講得好難聽,馬來西亞華人看待「民主」嘅基礎觀念只係基於「幾十年來受盡巫統班馬拉佬打壓,要爭返一口氣」嘅面子問題,甚至講得更衰 ── 小農基因嗰種「光宗耀祖」「為祖先同班馬拉佬出返啖氣」嘅諗法,而唔係香港或台灣人嗰種。

加上視中共係「彌賽亞」,然後又基於接收有關香港嘅新聞資訊嘅情況,覺得香港人又唔係無飯食無工做,做乜要同中国作對?於是就認為香港爭取民主、反送中,不過是「變節的天使」,即係魔鬼、撒旦。明白未?!

順便講關於台灣。大馬華人除咗都係「做乜要同中国作對?」之外,就仲有因為「中國國民黨馬來亞支部」主導咗關於台灣嘅輿論,搞到成個馬來西亞都係「一片藍天」,所以但凡台灣選舉都話要支持國民黨,與及台獨主張係歇斯底里地反對。

—————————————————————————————

近呢兩個月以嚟,有朋友問我,點解馬來西亞嗰邊嘅輿論咁嘅情況但都唔出手,就係因為我太知道大馬華人 (尤其是馬來亞華人) 個腦乜嘢構造、點解會有咁嘅構造,同埋尤其是身份認同嗰一部份嘅問題,四年前因為曹格响支那匪區電視節目「認祖歸宗」,我响《東方日報》寫過幾篇指出當中嘅問題,仲要係挖返馬共、「南洋愛國僑胞」歷史出嚟,告誡要小心中共,要反思「點解馬拉佬唔信你班唐人」嘅原因,結果招致「五毛黨」以 MP5 級數還擊。但四年過去,班「馬來西亞中國人」不單無作出任何改變,甚至變本加厲,咁我仲做乜要嘥呢啲時間同精神。

市儈啲講,《東方日報》咁多年嚟 1 ringgit 稿費都未俾過我,都唔緊要喇,有時候志在產生輿論效果;但就是連輿論效果都無,甚至被掉轉槍頭。我仲寫?傻的嗎!

但點解寫呢一篇,係俾返香港人睇返馬來西亞到底乜嘢情況、點解「五毛黨」到咁嘅地步;同埋了解返「馬來西亞中國人」嘅憨鳩同禍源,引以為鑑並探索得到跟住落去對付支那共匪嘅方向同方法。仲有就係,香港得我獨家講嘅砂朥越主權爭議,就是砂、港同病相憐,香港人其實有需要 line up 砂朥越表態支持。

返回主頁

Be the first to comment

Leave a Reply

Your email address will not be published.


*