「反送中」水炮車 真係無堅不摧殺人唔眨眼?

反送中抗爭延綿逾一個半月,林鄭月娥、李家超、盧偉聰利用武裝實力形同軍隊嘅香港警察組成嘅軍政府,以為向示威者濫權濫捕、甚至打算濫殺就可以將港人前所未有咁實淨士氣同鬥志徹底徹底壓倒。另一直有傳三架水炮車會出動,引起唔少人嘅擔心、恐懼;雖然連立法會被志士攻破都仲未出動,有啲人認為得個嚇字,係「狼來了」,但始終呢三架嘢嘅殺傷力強大得可致人於死,又或是《兵法》有云「兵不厭詐」,大家都唔知林李盧軍政府想做出幾瘋狂嘅事,還是要小心啲好。

確實的,水炮車有多枝超高壓水炮,但所謂「最鋒利嘅刀都有生銹嘅一日」,或是從工程學角度「最犀利嘅武器都一定有弱點」,响理論上水炮車唔會真係無堅不摧。咁到底有乜「弱點」?為咗避免已經俾我用香港法例第232章《警隊條例》搞到近乎心臟病發兼被啲伙記暗中恥笑嘅盧偉聰、與及無嗱端端辣我嘅「仲未交Form RN 退出英籍」嘅英國人周融等土共打算攝位郁我意圖煽動乜乜物物或「教唆他人刑事毁壞」,必須強調本文內容純粹以汽車技術、機械工程角度去分析、研究、探討水炮車。一於帶返頂頭盔先!

我呢個既識得揸大巴士、大貨車兼做過「瞓車底」嘅濕鳩評論員對「水炮車」嘅第一個睇法t其實係:

丟,咪一架 平治 Actros 3348 貨車裝上一個水缸+水泵+噴槍嘅貨斗嘅貨車!

先原諒我講得咁串。事實上,响商用汽車買賣同技術方面,真係咁嘅睇法。因為任何貨車响出廠時,都係一個「底盤+駕駛室」嘅物體 (即如下圖嘅例子)

然後响香港行內俗稱「屋仔」嘅駕駛室後面嘅底盤上裝個「貨斗」上去;只不過因應買家嘅用途需要,個「貨斗」會有唔同嘅設計、裝設不同嘅附加設備。例如鋁板/鋼板嘅密封貨廂、歐洲叫 Flat platform 而香港叫「街斗」嘅平板貨台、冷藏櫃、油缸車、田螺車等等;車尾升降台、吊雞 (仲要有分「頭雞」定「尾雞」;仲未講噸數)……

水炮車要裝嘅係一個「水缸加一個推動入水水泵、驅動射水裝置嘅引擎、同埋啲『水炮』之類嘅設備」响個「貨斗」上面囉!再唔係,對應返港共公安部呢三架「貨車」,就改裝埋「屋仔」,除咗原有嘅駕駛設備之外,容納埋一個操控「一炮射死你班仆街暴徒冚家鏟」嘅控制室。

根據黃世澤搵到嘅車輛基本資料,呢三部「貨車」係以 Mercedes Benz Actros 3348 貨車為基礎,由奧地利 Rosenbauer AG 安裝「貨斗」同改裝「屋仔」等工序而成的 Wasserwerfer 10000 水炮車。

Rosenbauer AG 呢間主要生產消防車嘅廠商响香港一啲都唔陌生,事關消防處部份雲梯車、「長臂猿」升降台車,「貨斗」部份就係 Rosenbauer AG 嘅出品。仲有駐守於赤鱲角機場停機坪消防局專門撲救飛機火警的 Panther 6×6 噴泡車,都係呢間廠嘅出品。

而概念上,水炮車只不過係一部配備消防車嘅高壓噴水裝置、要嚟殺人而唔係救火救人嘅貨車而已。事實上,係有類似嘅車款响歐洲作消防用途,主要係撲救森林大火。

要明白,基於環保同生態保護,撲救森林大火只能用清水,絕不能用撲救飛機大火嘅化學泡沫,因此需要超高水壓嘅水量、速度同壓力嘅「水炮」。但正如廚師刀既可以煮飯亦可以殺人,如何使用「水炮車」先至係重點中之重點,所以唔能夠質疑點解會有廠家生產呢啲「殺人武器」。

雖然我同世澤已經努力循多個途徑想搵到 Exactly 港共公安响大約2011年訂購嘅呢三架「貨車」嘅規格資料而直到香港時間2019-7-20凌晨仍未能搵到,但德國警方有同型號 (Wasserwerfer 10000) 嘅水炮車嘅資料,尚且都足夠分析。而且,我將港、德嘅車款做過對比,可以講港共公安部買呢三架比德國 Polizei 嗰啲「削」咗啲囉。

雖然德、港兩地嘅都係 平治 Actros 3348 貨車 base,但德國 Polizei 的「屋仔」進行過大幅度改裝,外觀上德國嘅該會係「盧覺強至愛」嘅裝甲駕駛室 (Armor Cab)(如下圖),而港共公安呢三部該只係「強化駕駛室」+ 防護鐵網。

我再對比過德、港兩地所裝設嘅「水炮」,外觀上港共公安呢三架「細碌」過德國嗰啲。但當然實際殺傷力唔能夠單憑外觀就可以判斷,所以大家還是要小心注意。

不過,赤鱲角機場嗰部 Panther 6×6 價值 1400萬港紙,港共公安三架合計先至1600萬港紙,即係每架價值533萬。平治 Actros 3348 貨車底盤 (連駕駛室) 車價大約110萬港紙,即係「貨斗」部份嘅造價大約400萬 (運費由奧地利嚟香港大約 USD10,000)。你話 Rosenbauer AG 會俾啲乜嘢料過港共公安吖!

再仲有,德國 Polizei 嘅 Actros 係軍用版AK/42/6×6,港共公安嘅前輪 Wheel Hub 判斷應該只係民用版 6×4…… (比較下面兩張相箭咀指住嗰度)

容許我好撚串啲講,香港警務處根本就買咗幾部垃圾返嚟囉!

姑且就以德國 Polizei 嗰啲「森林消防車」為基礎,假設「消防喉」嘅水壓、出水量係相同 ── 兩枝前炮 20bar ~ 1200L/min;一枝尾炮 20bar ~ 900L/min。即係如果開齊三枝炮 full power,每分鐘合共射出3300L。水缸容量10000L ── 10000÷3300=3.03…… 三分鐘就射晒,快過第一代黃毓民「轉世靈童」任亮憲。

當然,無論邊個國家,水炮車一定唔會 Full Power 長開,通常間斷式射10秒8秒,仲要唔會Full Power。就假設「讓半臂」50% 威力:1200÷2÷60=10L/sec。即係每枝炮每一下射咗100L,斷斷續續咁射,頂盡20分鐘乜都射晒!

仲有,除咗三枝「消防喉」,車身四邊仲有响消防角度要嚟防止火焰辣到車身嘅「花灑式龍頭」不停射水。雖然就無搵到嗰啲花灑式龍頭嘅出水量,但嗰啲水都係來自嗰個容量 10000L 嘅水缸。即係話最樂觀估計,三架「貨車」15分鐘就「射晒,舒服晒」。只要無即時供水補級,撇除好似仲可以射催淚水劑/胡椒噴霧,呢三架嘢就會變成真正的貨車了!

除咗行車嗰副 OM471LA 引擎,「消防喉系統」係由另一副獨立引擎驅動,以德國嗰部規格為例,水泵系統引擎係 Deutz TCD2012L6。憑外觀判斷,應該係响車身中部「百頁窗」嗰度。

事關引擎安裝空間必須有最少一個通風位,予冷卻水箱散熱,同利用氣流原理排走引擎運作時產生嘅熱力,所以我估計响上圖紅色 marking 嗰度。唔信我唔緊要,响街留意下啲巴士車尾,右側甚至左側都有大型散熱口。即管行近啲,水箱嘅表面溫度至少70°C,蒸熟你都得呀!

而任何引擎,最前端都有最少一條皮帶連接位幾隻一般人理解嘅滑輪;嗰幾隻滑輪其實係引擎運作必要嘅組件,分別為水泵、機油泵、發電機,甚至會是柴油泵。若果條皮帶斷咗,副引擎就無辦法運行 ── 車就行唔到或者「消防喉」噴唔到。所以,正式嘅專業「揸車佬」响每日開車之前都應該檢查吓條皮帶,睇吓有無披口、斷痕,甚至識得的話仲要檢查吓鬆緊。

另外俾多個冷知識大家:汽車引擎冷卻水箱普遍係鋁合金鑄造 (都有銅金屬造,但已經因為重量同耐用程度低而好少車廠採用);風扇就保證100% 係塑膠。所以好多時私家車發生交通意外而車頭損毁,水箱、風扇都必定報銷。

講開副「消防喉」引擎,留意個「百葉窗」係唔可以用太厚、剛度太強嘅金屬製造。通常車廠用1.5mm 鋼板;鋁合金板頂盡2.0mm。太厚太硬沖床係無辦法處理屈摺成形個百葉窗。

除咗「屋仔」只係強化保護而唔係「盧覺強至愛」,同埋 (疑似) 水炮驅動引擎嘅「百葉窗」都好似好削之外,車轆都似係「普通料」……

軍用防彈車胎係實心硬膠,只能採用有如砌模型拼合而成嘅車呤;

但睇相所見港共公安嗰部嘅頭、中、尾轆嘅車呤外形,同普通貨車、巴士採用的壓鑄成形鋼材車呤近乎相同,即係只能用普通車胎,或是頂多採用軍用加厚充氣車胎,都係萬一拮到釘雖然唔會即刻爆胎但都會漏氣。不過,要知道每條車胎承受最少3噸重量,漏氣嘅速度會比私家車、貨VAN、小巴快好多。

再仲有的,根據維基百科網站,德國警方都投訴好多 Defects,例如一般人稱作「防彈玻璃」嘅聚碳酸 (Poly-carbonate) 車窗容易損壞;水缸有少少雜質、污垢,枝「消防喉」會失靈……

無可否認,如果「開炮」真係可以攞命,但以「修理佬」角度,唔係完全百毒不侵、無堅不摧囉。

嗱,再講多一次,以上只係純粹從汽車技術、機械工程角度去分析、研究、探討水炮車。盧偉聰唔好諗住老屈,俾心機花時間諗清楚、叫 EMSD 幫手檢查清楚先啦。仲有,請緊記歐盟已經向香港實施咗武器禁運,除非叫你舊老細孟宏偉以至頂頭大老闆習近平幫手搵啲「非正式途徑」,或者考慮吓將其中一部當作「零件車」,否則架車有乜壞咗都唔駛旨意搵到零件。仲有「仲未交Form RN 退出英籍」嘅英國人周融睇實你本 British Citizen 護照好撚過啦,伊斯蘭國新娘 is an good, significant example for you!

返回主頁

3 Trackbacks / Pingbacks

  1. 水炮車 規格揸流攤 - 林離盡誌 Jacky Lim Commentating
  2. 水砲車係威係勢? 車胎爆咗如去勢? - 汽車台 HK Car Channel
  3. 2020 有氣無訂抖 - 林離盡誌 Jacky Lim Commentating

Leave a Reply

Your email address will not be published.


*