如果香港天下太平……..

好耐無寫過啲軟性嘢,趁今日有啲時間同心情就寫返吓。

一盒絕版嘅 Iveco 拖頭模型;Iveco 响香港嘅中文譯名叫「歐霸」,但呢個來自意大利嘅商用車牌子,有齊意大利車响香港嘅「水土不服」嘅問題,所以運輸行業有句爛Gag「想放假,揸歐霸」。呢盒模型我仲未郁手,但加埋個爛Gag,該好貼切形容大部份香港人嘅心情 ── 想抖吓氣都唔得。

當下嘅香港夠晒亂七八糟,唔好話我呢啲「濕鳩評論員」日日睇新聞睇到「爆血管」咁滯,就算係一般平民都要為咗供樓交租食飯…… 生活係咪真係過得好,大家心裡有數。有評論話香港人「我好鍾意返工呀」不過是一種逃避現實嘅表現,我諗諗吓都相當認同。事關古語有云「用工作麻醉自己」嘛!但大家有無諗過,如果香港天下太平,依家會做緊乜,過緊啲乜嘢生活呢?

就講我自己先啦。我第一件事諗到嘅係,我一定唔駛食呢啲藥

唔怕講,近幾個月sense 到自己有啲唔多妥,早陣子返去羅世安醫生度覆診,確認情緒病復發,不過就唔係好嚴重,大家可以放心。

我呢啲「濕鳩評論員」日日睇新聞,好難唔會導致精神有問題。但除此之外,我同一般香港人一樣都要面對各種生活壓力。大家不妨留意吓响身邊嘅人,或多或少都有情緒問題,甚至有可能有一兩個家人或朋友好似我咁要睇醫生食藥。而再細心諗返吓,响97前,撇除香港社會對情緒病嘅認知匱乏,有幾多人嘅生活有咁大壓力吖!

就是無咁大生活壓力,或至少叫做一切正常,今日係星期日,我諗我應該做緊啲放假做嘅嘢。例如砌緊模型。

眾所周知我係模型痴,屋企仲有大量存貨响度,成日諗唔知幾時砌得晒。但要砌模型除咗要時間,仲要精神同心機。响生活於咁嘅環境之下,會有幾多心機先得㗎。

又或者唔砌模型,可能係睇緊電視,唔係《講清講楚》《城市論壇》呢啲,而可能係睇電影、National Geographic Channel 之類。總之就係迤嗰隻。又或者 erotics 一啲,我應該結咗婚 (但未必有細路),同老婆「大戰連場」…… 唔想留响屋企的話,就揸架車出去遊車河;或者搭巴士出去行街 shopping 之類。

至於去返星期一至五嘅「現實」,可能都係打緊工,但每晚頂盡 18:00 收工,有時間約 Friend 食飯,或者幾乎肯定可以買餸返歸煮飯。又或者去返學堅係讀返個LLB。

再諗闊少少,我應該有去過真正嘅旅行 (唔計返古晉探親嗰種啦),日本、澳洲、歐洲、加拿大呢啲熱門地方必定去過。

可能大家所諗到嘅都係差唔多,但香港地又有幾多人真係實踐得到呢啲諗法呢?最簡單一樣嘢,18:00離開 office 可以話痴人說夢話啦!同老公老婆「大戰」喎,撇除「耶撚mode」或者有細路,有幾多情侶夫婦真係有咁嘅 mood 吖!家陣 weekend 揸車,唔好話周街柒頭司機隨時揩揩碰碰,淨係搵車位泊車都爆過嘔茄。行街 shopping 喎,家陣啲商場有乜春嘢睇呀!去旅行喇喎,講真嗰句大家只係想離開香港呢個地獄而已,而唔係真係存心去玩嗰隻。

無奈現實就係得個諗字。有啲人選擇認命,甚至更委屈的「逆來順受」,頂多做阿Q;有啲人渴望改變,但唔知能否改變。要知道「改變」係唔會從天而降,無付出係唔會有收獲。但要一個社會出現「改變」,唔係一個人可以做得到,而係要人人都去付出。唔係叫你學梁天琦、黃台仰佢哋咁「搵命搏」,而係每個人都要做一點點,最起碼要知道當前嘅香港發生緊乜嘢事,同埋唔好「小農奴隸基因」之「皇命不可違」。最終能否成功改變得到,唔好用「聽天由命」咁負面,所謂「天助人人自助」,齋想無用㗎,做啦香港人。

返回主頁

Be the first to comment

Leave a Reply

Your email address will not be published.


*