九巴覺得老屈你,對唔住囉,不過……

6月10日及6月22日凌晨九巴開「特車」件事,有人話「Too 陰謀論」,又有人引述九巴職員話因為被屈而好唔開心,無諗到竟然「好心著雷劈」,覺得小弟好不負責任云云。我好明白呢種心情,但好老實,九巴管理層咁多過氣港共公安,尤其是隻有足夠理據作合理懷疑响2014年9月28日晚上大約七點打算真槍實彈屠城嘅禿鷹响度,作為必須不能感情用事嘅濕鳩評論員KOL,好難唔祭出「瓜田李下」呢句四字成語。

而就算撇除所有「政治元素」,純粹响營運角度,其實都有好多「疑點」响度。

第一,八達通數據。無錯,九巴話唔會KEEP、會遵守私隱條例,响公關角度叫做「交足戲」,算係有交代。而事實上,每一部巴士夜晚返到車廠,車長一撳個制 send data 去公司嘅電腦系統,巴士上部機就無晒啲資料。然後的,九巴就將所有「嘟卡」數據傳去八達通嘅中央結算系統,原則上又係九巴一 send 就亦都無晒啲資料。再跟住的,八達通就跟據收到嘅數據,通知銀行過數俾九巴。問題在於,九巴無 KEEP 嗰啲數據,但八達通公司呢?

第二,無論搭巴士、港鐵,去七仔、M記食嘢,或是過隧道、泊停車場,八達通都會收集卡號碼、時間、交易金額、交易設備編號。其中交易設備編號,套用於搭巴士,就係 allocate 到車牌同路線,甚至對應交易時間更可以知道上車地點,更何況巴士公司嗰套機係有駁埋GPS。八達通公司部大電腦入面有晒呢啲數據,就可以做 Tracking。

第三,最仆街咁講,當晚啲「特車」係邊幾部車行,乜嘢車牌,對返個交易設備編號,然後做駭客又好、打龍通 access 部電腦都好,就可以即刻「勾」到「目標人物」嘅八達通卡編號,再然後……. 你懂的。

講到呢度,或者可以理解成件事好似真係唔關九巴事,好似我真係屈錯人。但係除咗曾偉雄,仲有一個叫彭樹雄嘅過氣差佬;而且彭生係副車務總監,有權直接指令啲車要出街…… GOT IT?!

我都唔想、亦唔會立亂屈人,但實在太多疑點。就算唔睇啲「過氣差佬」、唔要「政治化」「陰謀論」,淨係一如前文已經提過呢類「特車」唔係巴士公司想開就開,係必須事前通知運輸署 (嚴格講嘅用詞係「申請」,但正常的話運輸署一定批准)。除非九巴拎到張申請信出嚟,否則6月10日及6月22日凌晨啲「特車」無古惑嘢?姑且唔用好衰嘅字眼,就是「好難使人釋疑」。而如果九巴可以攞到封申請信出嚟,我絕對願意公開道歉。

返回主頁

Be the first to comment

Leave a Reply

Your email address will not be published.


*