怪獸家長黐膠花

今日小一派位放榜,唔少傳媒為咗「名校」衍生嘅 sound-bite 四出走訪,當然訪問到唔少家長嗰份「喜悅」,其中我覺得最誇張嗰個,就係「開心過結婚」嘅師奶。但恕我黑心啲講,十幾廿年嚟唔少學童自行了斷嘅新聞,都係呢啲怪獸家長有份促成,睇吓幾時輪到佢哋咁解。仔細拆解呢啲現象嘅成因,計有傳媒嘅吹捧、港共傀儡政權嘅垃圾教育政策,歸根究底一切都係啲怪獸家長嘅小農奴隸基因所致。此話何解?

首先了解返「小農奴隸基因」看待子女嘅觀念同態度。古語有云:「身體髮膚受諸父母」、「君臣父子長幼有序」呢兩句嘢,前者之意係將「細路係老豆老母嘅資產」作合理化解說,後者則是「細路必須聽命於父母」。綜合之說即係細路要受父母擺布就是「真理」。如是者唔少家長會認為「細路仔乜都唔識、唔知乜嘢叫好定唔好,梗係由老豆老母作主話事㗎啦」。

然後的,又有所謂「望子成龍、望女成鳳」,簡單講,即係希望仔女能夠出人頭地,或至少唔好低人一等。而响當前港共傀儡政權管治之下嘅教育制度只著重背誦同考試成績,啲怪獸家長只會認定成績、名校就是衡量指標,於是乎就由「興趣班」開始催谷佢哋嘅資產,以使入到名校同攞到好成績。

繼而呢,要明白古代嘅科舉制度,如果啲仔女中咗狀元就好威威、光宗耀祖對得住列祖列宗,引伸到今時今日,啲怪獸家長就會渴望啲「資產」可以成為自己要嚟炫耀嘅工具。唔好話有傳媒追訪「過吓明星癮」,淨係農曆新年有得响啲姨媽姑爹三姑六婆七叔公八表伯面前耀武揚威,都已經滿足到啲怪獸家長嘅弱小心靈。而嗰個話要擺返十圍慶祝嘅雌人,計我話根本就係咁嘅心態。

更重要嘅係,佢哋只不過視仔女為資產、要嚟向親友炫耀嘅工具,嚴重但直接啲講,佢哋根本就無當過啲仔女係人,因而從來唔會由個細路嘅角度去諗,唔好話讀嘅學校適唔適合,就係受唔受得住啲催谷都無囉。承如前說,好多學童自殺事件嘅發生,學校方面當然有責任,但啲怪獸家長更加有責任。即使唔講「人命」嘅問題,就是瘋狂補習、濫用 Ritalin,已經可以睇到啲怪獸家長係黐線。甚至乎睇返一單個女童自殺之後個老母發晒花癲狂鬧「唔好諗住死咗就無事,不斷燒習作要佢做」嘅新聞,簡直喪心病狂到醫返都嘥藥費。

無錯,港共傀儡政權嘅教育制度係禍源,但無怪獸家長「腦袋停於古代」,港共傀儡政權可以陰謀得逞嗎?只不過又係「小農奴隸基因」之君要臣死臣不得不死,那管政策有多不合理,為咗食飯疴屎瞓覺生仔,就只會不加思索照單全收,然後咪強塞俾啲「資產」受囉。

後記:徐懷鈺首《怪獸》嘅歌詞唔止適合形容啲死纏爛打或對女友自信心係零嘅毒男,原來對啲怪獸家長都形容得好貼切。

返回主頁

Be the first to comment

Leave a Reply

Your email address will not be published.


*