運輸署夠膽死都包庇豐田小巴非法改裝

噚日有報章報導豐田Coaster B70 小巴改裝槽鐵泵把問題,提到運輸署發言人回覆「現時法例沒有規定小巴不可改動泵把,若改動泵把,其裝置必須安裝穩固及不可有利角,其車身尺寸亦不可超出法例要求」,雖然仲有話「年檢時若發現改動的泵把不符要求,則會被評為不合格」,但我可以講九龍灣驗車中心啲驗車官十居其九隻眼開隻眼閉,即係擺明車馬包庇犯法行為,簡直令人髮指,亦睇到當下港共傀儡政權敗壞得有幾不堪。

雖然之前有寫過小巴改裝泵把嘅情況有乜嘢問題,但都不厭其煩响度再講多一次。

首先對比 B40/B50 同 B70 兩代Coaster 嘅泵把

原裝頭泵把

原裝尾泵把

小巴佬改成點???

集中講新款 B70 系,頭泵把換裝就有最少兩個版本

仲有「加多一條」嘅版本

車尾亦係可以改,又可以加

簡單講解「泵把」响技術及安全方面的論點。雖然泵把學術名稱叫做「防撞桿」,但唔係真係防止碰撞,而係減低萬一發生碰撞造成傷害嘅程度。好耐好耐以前,汽車科技對防撞嘅觀念係鬥頂鬥撐,但之後發現基於中學物理科有講嘅 “Action = Reaction” 理論嘅泵把造成嘅傷害唔細,尤其是對行人、單車、電單車造成嚴重受傷,特別係腿部骨折;另發現 “Energy absorption” 雖然增加咗車輛嘅損毁程度,但反而更有效保障司機、乘客與及行人,於是乎世界各國車廠改變泵把以至車頭部份結構嘅設計。

但就因為呢種新概念在萬一發生意外車輛嘅損毁會更嚴重,香港以至世界各地唔少車主/司機都試圖加強泵把嘅硬度。但除咗北美、澳洲及紐西蘭因為大型野外生物,全世界各先進國家都禁止車主加強泵把硬度嘅改裝,或加裝提高車頭剛性防撞設備 (例如俗稱牛欄)。香港响1980年代曾經盛行加裝俗稱牛欄嘅剛性防撞架,但到1980年代尾至1990年代初,亦因為嗰一堆學術研究,全面禁止並取締,要求所有車主拆除牛欄。

香港過去除咗小巴,仲有唔少貨車都有改裝槽鐵泵把嘅「喜好」,但貨車近年已經少見改裝,唯獨小巴至今仍然大行其道。小巴佬改裝或加裝泵把嘅原因,亦係唔想萬一發生意外時自己架車損毀得更嚴重。至於對其他車輛、行人、單車、電單車嘅破壞,有小巴佬給我嘅回答竟然係「人哋架車爛關我鬼事,最緊要我架車仲行到做生意」,可以睇到佢哋有幾自私自利。

講返响法例執行方面,依家少見到貨車改裝槽鐵,我估計應該係運輸署嘅驗車程序指引有關 (呢個我無認真查找過,純粹基於見到依家街上少見貨車改裝槽鐵泵把作出嘅推測)。不過,收過唔少 Hiace 或 Urvan 客貨車改泵把就驗車肥佬嘅報料。情況係換上日本生產而材料一如原廠的ABS塑膠或玻璃纖維「改料」泵把,硬度無大變化,但新九龍灣驗車中心就以「改料」影響安全氣袋感應器運作而評為不合格。我唔肯定嗰啲「改料」係咪影響安全氣袋感應器,但客觀講算係考慮到司機嘅安全問題,算係合理的。但點解小巴改裝泵把會影響到其他車輛、行人、單車、電單車嘅安全,運輸署竟然話無問題呢??

另一方面,留意返前面嘅原裝泵把相片 (尤其是B70),頭尾泵把都係對齊前後幅沙板,無凸出嚟;唔好話「加裝」,任何一種改裝方案都有稍凸出車頭車尾,即係成架車嘅長度已經唔係「原裝」,運輸署竟然話唔係非法改裝?

前段提到 Hiace 改泵把都「肥」,大家或會質疑包庇「豐田霸權」嘅講法;有睇開我嘅文章都會見到「豐田霸權」只係集中响小巴同的士,客貨車就無响其中。三菱 Rosa 真係改唔,或只能「加裝」,太礙眼而太容易被發現。容許豐田 Coaster 改泵把,啱晒食古不化兼自私自利嘅小巴佬嘅思維,姑且上綱上線咁講可以話係一種低調曲線嘅促銷所為

再講一次,「泵把」呢件事涉及到其他車輛、行人、單車、電單車嘅安全,我真係好想睇吓運輸署車輛安全及標準部總機電工程師(車輛安全及標準) 岑毅安、車輛安全分部高級工程師(車輛安全) 楊詠豐有乜砌詞狡辯。

或者咁講,依據官場文化,岑生同楊生都係聽下面班工程師/驗車主任老點,事實上班工程師/驗車主任真係乜都鳩噏得出。姑且漏單料俾大家知,以了解吓佢哋嘅鳩噏有幾咁厲害。舊年抵港嘅平治低地台小巴到依家仲未行街街,就係有工程師/驗車主任玩緊嘢,仲玩得非常精彩。

其中一項雞蛋裡挑骨頭就如下面張相

乘客上落車門响正司機位左側,但一位姓楊嘅我唔撚知exactly職級係乜春工程師嘅仆街,以 Cap. 374A sect. 39(2A)

每部公共巴士、私家巴士、公共小巴及私家小巴,均須至少配備1塊鏡子,而該塊鏡子須裝配在車輛前左側的外面,其大小、構造及裝配須足以令駕駛人在看該塊鏡子時能全面而清楚地看見任何正在下車的乘客

要求改咗左邊睹後鏡喎……

城巴單門都普Trident、九巴單門 E200 以至全香港所有旅遊巴士是如何通過驗車?? 即係有案例 of 只有一扇車門在司機左側就可以視為合格。姓楊呢條撚樣依然向我擺出串串貢「我係官,你奈得我乜嘢何」嘅醜惡笑容 (呢款車同我有乜關係,日後會詳細交代)。我唔知呢位姓楊嘅粉腸同皇冠車行有乜關係,但呢個例子對應返篇報導 ── 豐田嘅車有唔合法都可以話無問題 vs. 唔係豐田嘅車就算合法/有先例可援而視為合法都「挑剔」話唔合法,實實在在反映運輸署車輛安全及標準部班仆街唔係偏幫豐田真係搵鬼信!

再再重申一次,我話之豐田 Coaster 定三菱 Rosa 定乜春款式嘅小巴,改裝槽鐵泵把危害其他車輛、行人、單車、電單車嘅安全,運輸署必須立即收回有關報導嘅言論,並責成車輛安全及標準部和九龍灣驗車中心做嘢,一如其他車輛全部換返晒原裝泵把。

後記:《東方日報》cap 我圖又唔通知,仲要打格用「網民」。雖則我唔鍾意出名,但連基本尊重都無。從此以後,東方報業集團唔駛再搵我,與及唔駛旨意响我打理嘅Facebook Page 或網站攞料。

返回主頁

Be the first to comment

Leave a Reply

Your email address will not be published.


*