保護猴硐貓,應該要實施遊客人數限制

剛由台北返港。今次過去本來有啲公事處理,但落飛機先至知道「228 紀念」連假四日,老貓燒鬚…… 多咗一日出嚟就搵地方去吓。本來打算去平溪,但响瑞芳車站迫上去平溪嘅火車,人多到以為香港放工時間金鐘站就打消念頭,搭咗一個站响猴硐落車,睇貓之餘實地了解一下,發覺對喵星人嚟講真係災難。人多唔在講,不論在文化保育或動物權益角度,猴硐有好多問題存在。

猴硐嘅歷史背景係荒廢咗嘅瑞三煤礦。以歷史為基礎推動旅遊業,除非加入一些人工元素,否則其實無 Selling point。而且,原本的煤礦運輸工廠都冧晒,爛嘅程度係以為係受戰火摧毁,莫講話修復建築,連最最最基本的清理都無,就咁圍咗鐵絲網禁止進入就算,根本算不上有足夠的安全措施;雜草叢生其實衍生衛生問題。根本就唔適合推動作為旅遊點。

因為礦場歷史遺留落嚟嘅貓群,逐漸演變成觀光項目,其實無話唔得,但根據我响好多年前講過嘅 Tourism Sustainability 理論原則,涉及野外動物方面,必須保障佢哋嘅生活及生存不受到過份滋擾。但睇返新北市政府觀光旅遊局統計報告,2017年猴硐遊客接近100萬,即係平均每日有接近3000人次。唔好話貓,要你呢啲人類每日要接觸3000個陌生人都怕怕啦。

最大問題係,熟悉貓嘅習性嘅人都知道有好多事唔應該做,但對於啲去到只求搵啲貓嚟「娛樂」嘅人,就算楝晒告示牌 DOs & DON’Ts,都依然闊佬懶理。

點解唔好摸?成個山頭幾十隻甚至幾百隻貓,本來各據山頭互不干涉,各自嘅身體如果有無乜問題亦未必會傳到其他貓身上;但你摸完一隻又摸第二隻、第三隻….. 第N隻,就做咗「傳染媒介」。諗住「貓貓好可愛呀」就摸,隨時害晒成個猴硐啲貓呀!台灣方面已經話出現「疫情」而好大可能係因為「你又摸我又摸」而導致。


點解唔好餵嘢食?貓嘅消化系統同人類係天淵之別,雖然「你又餵我又餵」啲貓都食到雜晒,但養開貓嘅都知道貓食得越雜腸胃越易有問題。

但最辣慶我而要寫文「開火」就係有晒告示叫咗唔好帶狗,都有人帶狗去。

狗嘅天性就係會追貓。無錯,車站前嘅舖頭都有隻大狗,但照我嘅觀察,嗰隻灰白色大狗應該好似「一齊養」嗰隻而無見到有襲擊啲貓。但外人帶去嗰啲唔係吖嘛!

減低訪客人數嘅目的,就係減少對當地貓群嘅滋擾,所指嘅唔止係量,仲有係質嘅方面。要知道貓呢種生物嘅習性嘅自我保護意識,同人類之間嘅互動唔係必然。車站附近出沒嘅貓應該「見慣大場面」而表面上唔怕人,但唔代表佢哋真係唔怕人。

另外,就算唔講貓,純粹响旅遊規劃方面,猴硐嘅對外交通絕對唔可以話方便。巴士得一條線出返去瑞芳,仲要只係 Toyota Coaster 嘅小巴來的。火車每日(來回總計) 約90班,其中40班係平溪線,向台北方向只係去到瑞芳;直駛往返台北就有大約50班。計算返即係大約一小時先至一班火車出返基隆(七堵)、台北,根本唔太適合有太多遊客。

要實施遊客數目限制可以從火車站管理入手,但猴硐只係三等站,台鐵編制人手第二少嘅車站級別,又無正式票務閘機。即係要提升設備同增加人手,最起碼要安裝閘機,先至有得搞。另外仲要搵方法實施車輛管制,呢吓更加頭都痛。

但在侯友宜市長諗到方法之前,就真係只能靠教育同自律。要記住,貓唔係人類嘅玩具,無必要就唔好去。

返回主頁

Be the first to comment

Leave a Reply

Your email address will not be published.


*