豐田 Hiace 大改款

先啟:今次唔講「豐田霸權」呢四個字,純粹車評講吓市場分析。

平心而論純粹以車論車,Toyota 唔係無好嘢。至少 Camry vs. Nissan Teana 我會揀 Camry;又或者我返鄉下古晉租車自駕,係揀香港無嘅 Vios 而唔揀睇見個樣就想嘔嘅日產 Almera (即係煤氣公司嗰隻日產 Sunny,你話係咪嘔吖)。

今次先講最新鮮滾熱辣嘅 Hiace 改款「傳聞」。

到撰文嘅呢一刻,日本豐田車廠或香港皇冠都未發表官方公告關於新一代 Hiace 客貨車嘅消息,但從網上流傳嘅相片,都似層層架喇。

查實 Hiace 改款消息由2017年中開始傳出,事關豐田聯同法國PSA集團,即係 Peugeot 同 Citroën 嘅母公司,繼 Aygo / Peugeot 108 / Citroën C1 之後响2016年再度合作設計開發出一款新的客貨車,各自掛上自己嘅品牌 ── Peugeot Traveller, Citroën SpaceTourer, Toyota Proace 在歐洲銷售。

其中,豐田 Proace 係入替歐洲版 Hiace (即係香港有見過的 Granvia / Regius 七人車同一個車殼),就有風聲指今代 Hiace (200系) 將會停產,由 Proace 完全取代。

當然,呢個消息一直無法證實;而我嘅睇法係「日本版」Hiace 唔符合歐盟 class M1 / N1 嘅 ECE-R94 前方撞擊保護規則,美國亦有類似嘅規定,在商言商嘅原則之下,應該「統一天下」唔分開兩個車款以節省開發及生產成本,所以相信同預計個傳聞會成真嘅可能性頗大。

之後到2018年年中,台灣嘅汽車媒體就有消息報導,指 Hiace 將會重返台灣市場,我就開始比較留意有關嘅消。事關台灣交通部將 ECE-R94 納入道路法規,所以大家响台灣無見到香港周街都係嘅「日版」Hiace。如果 Hiace 能重返台灣市場,即係會引入「歐規」型號;又是在商言商角度,無可能只係台灣賣「歐規」Hiace 而應該成個亞太市場都係賣「歐洲版」。既然有 Proace 呢隻現成產品,又無理由花錢另外做 R&D,我就開始相信個傳聞會係真嘅。即係香港都準備「大改款」。

同一時間,日本嘅汽車資訊網站亦有消息,全部都係「確認」今代200系 Hiace 將會在2019年停產,推出全新的300系,並且言之鑿鑿話要符合歐洲安全標準而將會係以 Proace 改返用 Hiace 呢個名推出市場。即係我一直响心中、只同少數朋友吹水講開嘅推測應該「走唔甩」。

暫擱近日流傳嘅「諜照」外觀上同 Proace 差天共地,維持就是歐洲的 Proace 取代 Hiace 嘅揣測去分析。Proace 嘅可取之處就係符合 ECE-R94 嘅設計,呢個對駕駛者同前排乘客嘅安全係非常重要。事關「日版」設計,車頭一撞,司機同前排乘客就保證一定要等消防員到場先可以被救出。只不過對於揸慣 Hiace 或 日產 Urvan 嘅人嚟講,歐式凸頭設計「好黑人憎」;而且因為凸頭設計,尾廂空間一係縮短,一係就全車長度超過5米 (例如平治 Vito、福特 Transit,總長達5.3米),想泊錶位都頭痕,於是唔少人話「如果 Hiace 改到咁就唔再買,轉買歐洲車喇」。

事實上,當平治 Vito 116 淨車價大約34萬,Full option 齊料只係掂住 40萬,而 200系 Hiace 淨車價都接近32萬,已有唔少人話「假假地都叫做有粒 BENZ 星照吓吖」而放下慣性收視。另外,同 Proace 「根本係同一架車」嘅 Peugeot Traveller 早已在香港有售,淨車價大約31萬。部份「膽大包天」夠薑品嚐「法蘭西硬膠」嘅車主,用過之後嘅評價算是中上。Hiace 改款之後仲有幾大優勢真係好難講。

如果係嚟 Proace 改名的 Hiace,因為同 Peugeot Traveller 嘅規格相同,售後零件供應唔駛擔心。港府亦大手買入逾200部,而根據政府嘅招標條款,森娜美响售後服務點都要撐到行不容有失。但可惜根據「諜照」同流傳緊嘅機械規格可以話係「200系駁長個車頭」,啲修理佬嗰句「豐田唔會無零件」嘅口頭禪就似乎「凍過水」。因此,我唔係好明日本仔做乜唔直接引入 Proace 嘅設計同生產線;除非豐田同 PSA 有協議 Proace 只能在歐洲銷售,但我又唔覺得呢個可能性好大囉。如今豐田廠方既要花費 R&D 「日本版」Hiace 300系,又另到香港失去「慣性收視」嘅條件,皇冠車行嘅往後業績會點,只能用「走著看」呢三個字吧。

後記:我嘅自家資訊平台嚟緊會有變革,敬請大家密切留意。

返回主頁

Be the first to comment

Leave a Reply

Your email address will not be published.


*