九巴冧機痴膠花

今早九巴派更系統 Total lost,搞到要人手派更,然後導致早上繁忙時間嚴重脫班。件事最荒謬之處在於 HK BUS CHANNEL 嘅 Facebook Page 朝早7點幾已經爆料出街,九巴竟然唔出聲,直到各家傳媒見到爆料然後問九巴,先至响大約 0830 承認件事,仲要嗰一刻先至夠膽死承認响 0350 已經知道出事。嗰四個半鐘頭九巴搞乜?咪想臭屎密冚囉!

入戲肉狂抦九巴之前要先鬧爆啲港燦港豬。第一,有港燦港豬話九巴冧電腦出唔到車嘅咩。喂阿燦阿豬,唔好話九巴成三千幾部車,單單係一條會行屯門公路或者吐露港公路嘅巴士線,派車數目十幾廿部,啲司機真係求其攞架車出街呀?
第二,講實在啲嘅例子,就以屯門為例,邊個司機行全日60X、邊個260B 出到尖沙咀喜來登清客轉 60X 或 260X 甚至吉車返荃灣掛60M,又係是但攞部車就得呀。你哋都霎憨嘅!
第三,是但攞部車出街,但攞著部原來編咗要留廠保維修保養嘅點算?維修部屌老母話搞亂檔事少,行行吓擺街嗰陣點呀?
第四,你哋啲燦呀豬呀返寫字樓工都會「射波」或者唔知醒啦,巴士公司一樣有咁嘅情況出現,就算唔駛臨時調車、改更表,都要知道邊個司機今朝開唔到工,要計糧呀。

仲有的,壞地鐵嗰陣唔見你哋咁樣狂屌喪鬧?係囉,地鐵沿線物業,有港鐵層樓值錢啲所以唔鬧吖嘛。俾心機背誦「除了鐵路以外你們不可以有別的交通工具,你要盡心盡力盡性盡意愛鐵路猶如愛自己,敬畏鐵路萬能俠是智慧的開端」呢三句十戒嘅二次創作啦!

講返九巴,抵抦之處之第一,就係未夠鐘開始派更已經知道電腦出事。以我所知,早更車長大約 0430 開始返到車廠「攞飛」然後出車。起碼有半個鐘時間諗 Contingency Plan 但無人做,搞乜呀?! 仲要講緊派更電腦近期唔係第一次冧機,之前而冧親都會即刻改人手「飛紙」,但今朝點解搞唔切吖?係人嘅問題定係公司制度出咗問題?唔好問我,唔好問「巴士判官」,問李澤昌啦!

第二抵抦嘅就係,點解 HK BUS CHANNEL 爆咗料出街都仲諗住臭屎密冚?當「巴士台」臭四唔緊要,但就算傳媒唔透過嗰度攞料,網絡世界就係一傳十、十傳百,仲要一大朝早個個趕住「我好鍾意返工呀」嘅嗰陣等極都無車嚟,必定上網昅吓有無八到乜嘢料,跟住就宇宙大爆炸。當啲報館、電台、電視台八到,就梗係唔會放過你九巴;而傳媒報得,就即係政府都會知道。掉返轉講,如果 0350 知道出事,當你 0415 「Call 陳帆起身疴夜尿」,運輸署都仲算係夠時間做嘢。去到朝早八點幾都仲有巴士未出車擺响廠,點救你呀。所以陳帆响傍晚向九巴「執一劑」,再到夜晚十點幾運輸署話要捉九巴照肺,完全係抵撚死唔駛恨。

第三要抦嘅係比政府更官僚嘅作風。承如前說,冧機都唔係第一次而之前都會即刻改人手派更,但點解今朝好似無咁做?尤其是屯門廠。具體嘅我就仲未八卦到,但正如過往我提過「大塞車都唔俾司機執生自己改路」嘅情況,唔排除係啲死板到極嘅行政程序,唔俾派更部擅自改人手派更。呢個可能性我估唔細囉。員工只顧「少做少錯,若然有錯都係程序指引錯,話之出面啲咸魚無車搭,又唔係我無車搭」嘅巴士公司,執柒咗佢好過啦。

第四,係要最大力去抦。講緊嘅係「巴士台」响中午左右再收到報料,話車廠貼咗嚴禁影相嘅通告出嚟。

言下之意即係好話啲伙記「爆料」出街,搞到「家醜外傳」啦!你老味李澤昌你班仆街,好學唔學學埋機管局嗰啲仆街嘢,以為臭屎可以密冚就無事發生,心諗你哋都憨撚柒鳩嘅。條街少咗巴士,一定有人掘料發生乜嘢事,到時咪一撚樣「爆」。今日嘅情況已經證明,臭臭係點冚都冚唔到架!

最後,成件事好大可能同炒咗堆 IT 狗搞外判有關。具體嘅技術嘢我就唔講喇,就是國泰又係炒 IT 狗搞到出晒事,已經有版你李澤昌睇啦。仲唔明就攞本《孫子兵法》出嚟,讀多幾次「三軍未動,糧草先行」「養兵千日,用在一時」啦。

九巴再咁搞落去,遲早變中巴咁嘅收場!

返回主頁

Be the first to comment

Leave a Reply

Your email address will not be published.


*