陳清木醫生出山,新加坡政壇風起雲湧

香港大堆南洋政治半桶水成日亂噏廿四,搞到香港地好多人誤以為新加坡得人民行動黨一個政黨。查實新加坡有多個政黨,其中工人黨 (Workers’ Party。簡稱WP) 仲早過 PAP 出現。只不過所有在野政黨在1970年代中後期自甘墮落淪為街頭戰士而「泡沫化」,先至搞到人民行動黨一黨獨大。

幾十年來,因為缺乏政治組織嘅競爭,雖然使新加坡嘅經濟同社會發展迅速,但就使 PAP 在李光耀不再擔任總理之後嘅「後李光耀時代」嘅管治能力每況愈下。本來,在劉程強出任工人黨秘書長之後進行改革,並在大選取得國會議席,對 PAP 產生一啲壓力,但 WP 始終甩不掉「街頭戰士」嘅本質,未能對 PAP 產生足夠嘅競爭威脅;加上新加坡政府內部充斥精英主義,由管治衍生嘅社會問題陸續浮現。新加坡嘅「太平盛世」其實得個殼。

陳清木醫生本來都係 PAP 黨員,由1980年至2006年擔任國會議員;到2011年參選總統選舉得根據新加坡法例而退黨,但以不足1%差距輸咗俾陳慶炎。新加坡近十年同香港一樣,面對來自中国進入嘅人口造成大量社會問題,出現 Singaporeans First 捍衛本土權益嘅意識主張。而陳清木醫生早在1999年就提出「新加坡人優先」嘅主張,認為必須在就業同經濟成果分享以新加坡國民為先;仲同當時身為國務資政嘅李光耀和時任貿易及工業部長楊榮文「大打出手」,連李光耀都退避三舍,佢嘅戰鬥力絕對唔講得少!

陳清木嗰套「新加坡人優先」主張唔單止食正當前新加坡人嘅「口味」,仲因為可以話係最早提出嗰個人,因而有更堅實嘅論述根基;更重要嘅係 PAP 嘅組成本來就係捍衛新加坡本土利益為基礎,但如今因為外來人口 (尤其是來自中国) 搞到新加坡社會亂七八糟,更顯得 PAP 嘅不知所謂,已經對 PAP 構成一股新嘅政治壓力。而根據新加坡憲法,明年(2020)將會舉行國會大選,單純從選舉角度嚟講,PAP 已經有排頭痕。

佢新籌組嘅政黨名為新加坡前進黨 (Progress Singapore Party。簡稱PSP) ,同新加坡國歌歌名 Majulah Singapura,華文名稱《前進吧,新加坡》「撞到應一應」。呢個可以理解成陳清木醫生要佔據「政治道德喜瑪拉雅山」;對應返 PAP 由「捍衛新加坡本土利益」而組成演變到今時今日鼓吹輸入外來人口嘅施政方向,PSP 呢個名簡直亂棍狂毆 PAP 無乜分別。

最「攞命」嘅係,陳清木本來就是 PAP 黨員,好清楚 PAP 黨內到底有乜亂象。除咗1999年同李光耀「互劈」之外,2011年總統選舉,佢對 PAP「斬到血流成河」,就可以預計 PSP 隨時能夠對 PAP 嘅執政問題作出嘅批判「刀刀見骨」。單純講選舉工程,PAP 好大可能失唔少分。而且,佢同 PAP 嘅「打鬥」戰績,或多或少能成為其他在野政黨嘅學習對象。只要學到一招半式同夠膽運用出嚟,以依家 PAP 嘅實力,唔「斬頭」都可以「爆缸」。當然,學唔學到就另外一回事,但漣漪效應嘅可能性確實存在。

集中講預計明年嘅大選。陳清木原本嘅選區亞逸拉惹單選區 (Ayer Rajah SMC) 响2011年拼入西海岸集選區 (West Coast GRC),範圍東起亞逸拉惹沿住海岸連綿至裕廊。而陳清木醫生嘅診所集團主要集中响文禮、裕廊,照牌面有足夠地區樁腳,起碼有相當嘅地區政治勢力。

西海岸集選區由亞逸拉惹至金文泰嘅「東部」,係新加坡其中一個中產區,普遍選民有較高學歷,對「新加坡人優先」主張有較高嘅認同及支持。至於「西部」的文禮同裕廊,雖然主要係基層家庭,但 PAP 近十幾年响該區嘅地方事務可以話除咗起樓俾人住就乜都唔識,管治質素相對其他區份比較遜色,選民對 PAP 有一定不滿情緒。無錯,新加坡人係保守,甚至係死板,但過去皆因在PAP以外無乜好選擇因而只好變相啞忍。而如今陳清木醫生「楝旗」要捍衛新加坡人嘅優先權益,仲要清楚晒 PAP 嘅「死穴」,照估計唔難俾選民睇到 There is another choice may better than PAP。當然,目前嚟講對 PAP 造成嘅威脅尚係未知之數,但一定對 PAP 構成一定政治壓力;

雖然 WP 過去未有對 PAP 構成嘅巨大嘅競爭威脅,但總算响新加坡東部站穩陣腳;而 PSP 嘅出現,並先响西海岸區域「亮劍」,PAP 嘅「基本盤」已有一啲危機。最重要嘅問題係 PAP 嘅執政質素,嚴格嚟講真係「無眼睇」,尤其是涉及外來人口嘅政策,根本可以話係火藥庫,只不過十幾年來都只係2013年場示威有過一場「大火」,未有真正「大爆炸」,但 PAP 仲唔認真去撥亂反正,就是只講出年選舉,就算唔輸過半都睇怕唔駛旨意議席 2/3 絕對大多數。

返回主頁

Be the first to comment

Leave a Reply

Your email address will not be published.


*