冠忠唔好賴傳媒同諗住拖政府落水

星期五清晨單旅遊巴意外,我炮轟嘅主要集中冠忠呢間公司同無良柏,對於傳媒揭發「無A04 做員工接送」嘅醜聞,我都無踩多腳撥火,唔係想放生冠忠同無良柏,而係考慮到機場職員嘅通勤需要問題,真係要好小心處理,作為曾經係機場地勤,唔想累到佢哋返工放工有大問題;同埋核心問題嘅根源係來自運輸署。不過,肇事嘅旅遊巴無 A04 批註,錯就係錯,冠忠同無良柏唔應該亦唔可以拖運輸署落水做替死鬼或墊屍底。

冠忠做呢組「國泰員工」班車唔係近期嘅事,而係自赤鱲角機場啟用以嚟已經做緊。路線唔止得蘋果日報 / 有線新聞台放蛇嘅呢一條,係遍及香港九龍新界。做咗接近20年,都唔去運輸署辦理 A04 申報手續,呢個好明顯係冠忠集團嘅自己嘅責任。或許有做申報,但可能只係「冠忠遊覽車有限公司」或 「泰豐遊覽車有限公司」。但肇事嗰部車估計係所屬的「環島旅運有限公司」,係早在1997年以前收購過嚟;而明知編更部一定將冠忠 / 泰豐 / 環島啲車「撈亂嚟用」,就應該一早做好啲手續,而唔係諗住「無事發生就唔駛理」而「偷雞」。直接啲講,「晾」咗20年嘅行政工作,仲可以點樣推卸俾其他人?!

無錯,客運營業證批註嘅申請同審批,運輸署公共車輛組班人真係可以玩晒嘢,招數出神入化、無窮無盡,仆街程度不亞於驗車組班貪官;就算撇除「玩嘢」純粹講正常嘅申請手續,都真係麻煩個乜。就以返冠忠 / 泰豐 / 環島嘅例子,假設同國泰簽約嘅係冠忠,份合約係唔可以作為俾泰豐或環島拎去做申請嘅Supporting Documents,即係唔可以拎車主名係泰豐或環島嘅車行駛。再仲有更憨鳩嘅事就係,TD 可能要冠忠報車牌,指定邊架車先可以做呢條路線;TD 仲會「計數」冠忠有無報多咗用車數目。運輸署嘅立場係美其名「嚴謹監管、杜絕濫用」,但就搞到如果壞車、交通問題等要臨時調車的話,就變成違規行駛。

再講一次,唔係同冠忠或無良柏解圍,想講嘅係運輸署呢啲習性都唔係今時今日嘅事。事實上運輸署確實係一個極度仆街冚家鏟嘅部門,有齊理據同佢哋「拗數」都可以四個大字關人撚事,堆砌海量嘅理由籍口推搪、拖延、拒絕。但無良柏有無用合適嘅方法同手段去要求運輸署作出改革吖?定還是只係諗住「運輸署啲嘢唔會變架喇」就算,然後就「無事發生就唔駛理」但求繼續做到個柯打有錢收就算,我諗唔駛我再多講。

至於蘋果日報及有線新聞台放蛇並非職員都可以乘搭,無良柏真係更加無嘢好講。國泰或太古集團同冠忠簽訂嘅合約嘅條款係點,當然我都唔會清楚,但既然公開所講嘅係「國泰員工專享」,冠忠就有責任把關。但另一方面,機場職員嘅通勤問題真係「好撚柒鳩大問題」,尤其是深夜淩晨時份簡直慘無人道。冠忠唔會唔知有並非國泰或太古集團嘅職員上車,有時在「人情」角度難免要隻眼開隻眼閉,但作為非專利巴士嘅龍頭、同機管局有密切關係嘅公司,有無同特區政府及機管局溝通,睇下點樣可以將呢項服務做得完善啲?又無錯的,如果一同政府或機管局講,就隨時「多個香爐多隻鬼」,於是乎在人性角度及生意角度,真係會選擇隻眼開隻眼閉算數。但就要「抽水」講「金鐘道禁制令」單嘢,無良柏講到咁大聲「反對違法佔領」,但原來廿年嚟做緊違法嘢,知唔知個醜字點寫呀。運輸署訂埋啲仆街規矩,佢自己就僭越;共匪訂埋啲仆街規矩,市民行動佢就鬧人「犯法」,如今佢俾全香港人圍住嚟屌,佢真係無撚得好怨。

再講多少少運輸署方面,非專營巴士嘅監管制度根本千瘡百孔、錯漏百出。業界向政府講咗好多嘢,但港共傀儡政權為咗保住「除了鐵路以外你們不可以有別的交通交具」,就意見照受一切照舊,亦係事實。問題在於無良柏等業界有無用適當嘅方法同政府講數之外,在無奈地焗住陽奉陰違之下,又有無「做好自己本份」免招人口實,唔好話爭取市民支持,最起碼唔好產生負面嘅輿論。唔計「金鐘道禁制令」咁政治化,單純是非專營巴士嘅日常營運管理,俾市民大眾乜嘢印象?

最簡單的,就是《道路交通(車輛構造及保養)規例》Cap. 374A sect.73 訂明座椅闊度最少380mm,而用雙眼都望到+用個腦都諗到根本容納唔到一個正常身形嘅成年人,都仲係要裝3+2位,搞到迫迫夾夾;61座都仲嫌唔夠皮,計數得出12米車有足夠空間裝多一排到66位,已經反映非專營巴士業界有幾唔尊重乘客。問佢哋「啲客坐得唔舒服咩」,佢哋個態度就係「啲客坐之嘛,又唔係我坐」,總之多一個位就收多一個錢!咁嘅情況之下,就算沒有無良柏大嗌「還我道路使用權」,市民點可能企响旅遊巴士業界嗰邊!

事到如今,冠忠除咗要妥當處理善後、向死傷者作出賠償之外,黃良柏唔該好好反省一下點解會被全成圍剿,同埋楔高枕頭諗清楚過去對政府嘅陽奉陰違及阿諛奉承,係咪正確嘅做法。姑同當同佢老人家「提水」,最徹底解決呢場公關災難嘅唯一方法,就係對禁制令一事公開向全香港市民導歉謝罪,否則一定繼續俾人針對落去。要再凶狠又大迷信咁講:錢就搵唔晒,錢亦唔係咁搵;所謂「瘟疫來冤枉去」,前日嘅意外隨時只係開始。

返回主頁

Be the first to comment

Leave a Reply

Your email address will not be published.


*