安全帶唔係話裝就裝

每逢有嚴重交通意外,尤其是涉及到巴士,政客、傳媒通通都 Spin 「快就是危險,慢就是安全,」然後話要收緊車速限制,同埋以為「安全帶是萬能的」,郁啲就話要加強規管乘客使用安全帶,而對於巴士,就話要加裝安全帶云云。真係聽到好狠厭。

唔係話安全帶對保障乘客安全無用,但剩係受傷乘客自己解唔到安全帶要等消防員到場剪帶,形同導致阻礙救援,班政客已經唔曉,更唔好話安全帶其實仲有其他問題。只不過佢哋而係啲政客一個二個以為萬能,諗住講咗就「無死錯人」而可以甩身唔駛負責任。

又另外呢,每一次巴士意外之後,啲政客都話要巴士公司買新車要有安全帶之餘,連舊車都要响所有座椅加裝安全帶。巴士公司話有技術困難好難落實,但班政客硬係以為巴士公司呃鳩佢哋,到下一次意外又繼續拎嚟講,真係頂佢哋唔順。到上星期五青衣單意外之後,又繼續講之餘,旅遊巴業界同政府開完會之後都同意新車加裝,但又係認為舊車唔太可行。到今朝商業一台「在晴朗的一天出發」,旅遊巴業界代表接受訪問,講到現役車輛要加裝安全帶有唔少技術問題,涉及嘅成本比新車高一倍或以上,陳志雲同陳聰就以為政府資助就可以搞掂,我就聽到火山爆發。

雖然我恥笑啲白痴政客嘅「安全帶是萬能的」諗法,但就認同旅遊巴要裝安全帶。第一個原因係旅遊巴呢類車種响歐洲係規定一定要有,唔似雙層巴係可有可無;第二個原因係乘客逗留响旅遊巴車廂嘅時間通常較長。只不過,安全呢樣嘢真係唔是一條安全帶可以搞掂晒。

講返安全帶本身。安全帶嘅概念係萬一車輛前方受到撞擊,將乘客固定响座椅上避免拋出車外。根據中學物理科有教嘅 Action = reaction 同 momentum,車輛受到撞擊而乘客向前俯衝,安全帶固定乘客所產生嘅能量,就會傳到座椅,再由座椅傳落去車身。如果座椅結構唔夠強,就會成張櫈變形;再又如果座椅連接車身嘅結構唔夠強,座椅就會同車身分離,結果就會連人帶櫈做炮彈飛人飛出街。所以,任何汽車要裝設有安全帶,必須要確保當車輛前方受到撞擊嘅時候,座椅唔可以過度變形,與及連接車身嘅結構能承受一定衝擊力而唔會分離。呢個就係「安全帶支點強度要求」嘅概念。歐盟根據呢個概念,就訂立 ECE-R80 同 ECE-R14 兩項安全標準規則。另配合安全帶不能斷裂及要有裝置產生相當於衝擊感應,將司機或乘客「鎖緊」於座椅上的ECE-R16 規則,防止「炮彈飛人」嘅發生。

巴士要做到 ECE-R80 同 ECE-R14 兩項標準,首先要有經測試符合結構強度嘅座椅,然後參照歐盟議會建議所採用的材料及安裝零件,強化與座椅安裝有關的車身結構,同埋座椅的安裝方法,話難唔難話易唔易。下圖簡單說明。

地台下嗰條槽鐵同側邊嗰條槽鐵或鋼板,要燒焊落車身骨架固定,或用M10規格(即絲牙直徑最少10mm) 或更粗的高拉力鏍絲固定响車身主結構上。鋪地台木板之後,再將鋁合金路軌對正條槽鐵然後密集式用鏍絲固定,然後先用M10或以上規格的鏍絲將座椅固定。內側都係類似嘅工序。先至在理論上符合 ECE-R14 嘅強度要求。新車進行呢啲工序當然無乜問題,但「舊車」要進行呢啲工序,一定要將車廂「拆通」,先至可以進行。已經證明業界代表今朝响商台講「成本高一倍」唔係吹水呃錢。另外,呢啲「結構強化」唔係就咁燒焊或上鏍絲就得,仲要睇返車身原本個「棚」嘅材料同設計,是否容許咁做。唔得就唔得,無得勉強。所以,「舊車」未必裝到,亦唔係呃人。

有人同我講,小巴裝咗咁多年,都係有乘客唔用啦;一架旅遊巴嘅乘客人數係小巴嘅幾倍,司機更加無符。呢個真係事實。响歐洲,直頭授權司機 / 乘務人員,响準備上高速公路之前檢查乘客有無扣安全帶,你估啲鬼佬鬼婆個個都咁聽話咩,但歐洲嘅法例都係「閣下自理」。基於呢個概念原則,根本管唔到咁多。我反而覺得香港現行法例要求巴士乘客座椅最少闊度380mm,先至大問題

3+2座椅佈局嘅旅遊巴士,或三菱ROSA / 豐田 Coaster 2+2 佈局,座椅闊度就是只有380mm。就算港女嘅身形,都坐到迫迫夾夾咁;唔好話梁文轁咁大份,體重65kg 以上嘅港男,相對380mm座椅根本就 oversize,點扣安全帶呀!

歐盟規例嘅乘客座椅闊度最少要400mm,車身闊度逾2.35m 更是450mm。一般座椅 OEM 生產商嘅產品係 440-450mm,即係目前專利巴士採用嘅乘客座椅。另外,同一條法例 (Cap. 374A sect. 73),小巴嘅座椅闊度空間最少450mm。巴士唔順便改例跟歐盟或者同小巴睇齊,根本就好難裝埋安全帶。只不過除咗運輸署班友懶過乜之外,一部12米長嘅旅遊巴嘅最高座位數目由66跌返落去53甚至49,旅遊巴業界見「一架車載少十幾廿人,一班『R仔』搵少幾百蚊」,唔牙痛咁聲呀!

可以講,既然歐洲對同類車種有咁嘅規定,實在應該引用嚟香港同執行。但在實際執行上,運輸署又係製造大量麻煩。ECE-R14規則本身係要進行測試,香港有幾間呢啲測試機構,問題不大;套規則响歐洲嘅執行,係有一個叫「生產一致性」(Compliance of Production。簡稱 COP) 嘅抽樣檢測要求程序。但歐洲嘅做法係同一個車身結構,話之係裝响Scania、MAN、Benz、Iveco….. 底盤,都視為同一個「型號」,或正確啲嘅講法係「同一個認證編號」;但香港運輸署班官,除咗貪之外,最叻就係製造無謂嘅工作量以防止自己變成冗員,搞到 Scania K280 一個file、 Scania K360 又一個file、MAN 又另一個 file…… 搞到 COP 程序响歐洲可能只係做咗10次而香港要做50次。車身廠、旅遊巴公司要使錢之餘,仲要因為 COP 拖慢晒出車進度。呢樣嘢就唔該陳美寶要搞修例嘅同時,捉晒車輛安全及標準部班友照肺,叫佢哋唔好浪費公帑嘥時間。順便講,香港成堆汽車代理對驗車程序慢過乜,同驗車過程肆意「釋法」,已經好狠唔滿意架喇。

返回主頁

Be the first to comment

Leave a Reply

Your email address will not be published.


*