聖誕文告2018

循例祝各位聖誕快樂。基於約定俗成,聖誕節除咗係基督教紀念耶穌基督降生之外,亦係商業化嘅世界大舉進行消費活動嘅日子。現今嘅香港,耶撚肆虐,使呢個節日在宏觀的宗教意義變得黯然失色;玩樂主意,其實在不其然間使社會各類矛盾問題變得尖銳。

耶撚嘅問題,兩年前已經講過,今年唔想再講咁多。因為,耶穌基督响「登山寶訓」所講「為甚麼你只看見弟兄眼中的刺,卻看不見自己眼中的樑木」,從來都耶撚只會朗朗上口、卻鮮有實踐的聖經金句。俗啲講,講嚟都嘥氣。

唔係話購物消費吃喝玩樂係錯,但做任何事情卻是盲目地做,甚至失去理性的去做,就是問題所在。事實上,香港人嘅盲目,並不止在聖誕節。

就如最近期終於紙包唔住火嘅香港航空 (HX) 財政危機,唔少香港人依然覺得只係一時三刻的事,好快就能夠「雨過天清」;再追溯返其母公司海南航空集團的負債問題曝光以來接近一年半的光陰,可有幾多人意識到危機的存在?

確實的,2018年香港社會各類型危機浮現,由可謂對市民最切身攸關嘅港鐵沙中線工程失誤醜聞,到反映本港政治及法治危機嘅律政司司長僭建醜聞、3月及11月兩場其實唔應該出現嘅立法會補選、外國記者協會第一副主席馬凱 (Victor Mallet) 被驅逐,香港人普遍地採取事不關己己不勞心嘅態度,甚至是「阿爺話點就點啦,有得反對咩」嘅思想,徹頭徹尾地小農奴隸「只顧門前三畂田」,對身邊以外周遭事物漠不關心。莫講更高層次的美中貿易戰對香港造成甚麼影響,到底香港人係咪真係覺得除咗吃喝玩樂、食玩買瞓扑之外,其餘事情可以唔駛理呢?

或許香港人覺得為生活已經忙得不可開交,為買樓只得顧住搵食,但有幾多人會思考現今香港生活質素差到如斯地步,買嘅樓、租嘅房越來越「唔撚係人住」,到底點解會搞成咁呢?事不關己、己不勞心係咪就可以繼續生存到?再甚至乎地鐵「全壘打」故障颱風山竹吹襲之後市面一片狼藉,交通完全無法恢復,香港人都只係一味「我好鍾意返工」。呢種根本就唔係生活,連生存都有如蠻荒世界的狀況,除咗屈從、屈就、盲目的持續,似乎無乜人想有改變。

舊約聖經記載,以色列人在埃及為奴為婢,摩西希望帶領「同胞」遠離法老王嘅迫害,最終成事。但將之放諸於今日嘅香港,相當於摩西嘅角色並非不存在,但一眾草民不單彷彿不願意接受拯救,甚至認為繼續在埃及甘願為奴雖然無飽飯但起碼餓唔死就算,指斥摩西「激嬲法老王無運行」。如此狀況,你還會認為香港呢處地方、香港人仲有得救嗎?更是香港人仍然普遍地無知白痴的以為「背靠祖国機會無限」,見尚有丁點利益小恩小惠而「投向祖国懷抱」,就如十二門徒的猶大見凱撒的懸紅就雙眼發光,但有幾多香港人仲會顧慮「見利忘義」的報應?或者真係「良心值幾錢斤」,就是普遍香港人心中最真實的答案。

有人話,其實當前香港社會呢一切現象,不過是香港人的無力感,我不完全認同呢種講法。因為當今香港社會的現況,都是香港人近二十年來自己一手造成,如今以「無力」推卸責任,根本就是講唔過去。或者香港太多「耶穌復活後的多馬」,或再直接啲講就是勝利球迷,只圖等待結果將近出現而能歡呼欣喜而已。

最後,新約聖經《啟示錄》記載大量「末日異象」警示信徒,「末日」之後將有「大審判」;當前的國際局勢亦確實存在大量將會發生巨變的景象,信不信由你。但請緊記「路係自己揀,仆街唔好喊」,香港人自己諗掂佢。

願上帝的恩典與眾人同在。阿門。

返回主頁

Be the first to comment

Leave a Reply

Your email address will not be published.


*