買黃牛飛隨時就係不歸路

劉德華抱恙取消12月28至30日三場演唱會,稍後將安排退票。有人話用 $6000 幫襯黃牛黨購買原價 $980 的門票,又聯絡唔到隻黃牛,就算退到票都要勁蝕 $5020,喊得一句句。隨之而來大量落井下石言論,我就梗係幫腳踩埋一份。無錯,成件事嘅根源當然係同售票制度有關,但自由市場之下,就是有強姦無焗賭,無人揸住枝槍迫伙幫襯黃牛黨,所以根本無得怨。而睇返售票安排,買黃牛飛嘅唔好諗住攞得返錢,隨時一如證監會嗰句「投資者可能蒙受全部損失」。

今次劉德華演唱會嘅售票安排,除咗所謂「內部認購」,公開發售嘅部份全部係網上訂購。即是黃牛黨有兩個基本「貨源」。不過,「內部認購」除咗主辦單位同贊助商嘅「派發」之外,仲有「信用卡優先訂購」。如果買到嘅黃牛來自「派發」的話,或者仲有可能退到門票面值嗰筆錢,但都唔係100%肯定;但如果「貨源」來自信用卡優先訂購或公開發售的話,就準備一個仙都攞唔返。

因為除咗贊助商嗰啲之外,其餘嘅購票付款係有晒記錄,如果退票安排係揸住張票就可以拎返錢,主辦機構就有可能被當日碌卡嗰個追討。所以正常、亦事實上大多以信用卡付款購買產品或服務嘅退款安排,都係入返條數落去張信用卡,因而好大可能唔會係「見票科水」,亦因此如果買黃牛飛嘅可以疊埋心水準備Total lost。

至於所謂贊助商「派發」嘅嗰啲「內部認購」門票仲麻煩,因為張飛嘅錢唔係你直接俾主辦機構,就算只係原價,你都係俾錢「派」嗰個單位;主辦機構唔會知道贊助商到底係免費派發、定係另行以任何方法要求領取門票嘅人支付代價。

綜合而言,只有係使用自己張信用卡付款購買門票,先至可以100%保證能夠取回退票嘅款項;透過其他渠道買到飛嘅人,不論係原價買到來自贊助商嘅內部認購嘅門票,以至係話之只係原價加一百嘅黃牛黨嘅飛,除非主辦機構另作特別安排,否則在現有機制及過往宏觀的慣例,唔好旨意可以攞得返錢。

當然,亦有一個可能嘅做法就係「見票科水」,但就要簽訂一大堆文件,將退票款項及原來碌卡付款嘅債權責任留返俾退票者同購票付款者自行處理、唔關主辦機構事。但在法律角度而言,無形中建立咗數以百計、甚至千計潛在民事訴訟嘅風險。主辦單位確係可以甩身,但小額錢債審裁處班法官同法庭文員就真係「多謝劉德華」!

還原基本步去睇今次取消演唱會事件,售票制度嘅問題完完整整浮現晒出嚟,可是港燦港豬漠視售票制度相對黃牛黨嘅問題,以嗰種「姣婆遇上脂粉客」看待黃牛黨嘅態度同思想,今次就自食其果。售票制度有乜問題,可以有乜解決方法,包括小弟在內唔少人都有提出過(詳見 延伸閱讀 清單),但港燦港豬硬係耳邊風,咪今鋪受吓囉。一張飛唔見五千銀,當俾劉德華睇醫生囉!

延伸閱讀:
台灣嘅演唱會票務制度可以全盤照抄
解決演唱會黃牛黨,還原基本步先再講
解決演唱會黃牛黨唔係加強執法就得

返回主頁

Be the first to comment

Leave a Reply

Your email address will not be published.


*