砂朥越獨立

港獨 (好似) 唔講得,就講下我鄉下 ── 砂朥越獨立。

對香港人嚟講,砂朥越始終係比較陌生嘅地方,唔清楚發生乜嘢事,但响馬來西亞嘅傳媒已經炒到火紅火綠。試 Google 輸入 Sarawak 現今較常用的華文名稱「砂拉越」,會搵到唔少有關嘅消息報導。只不過多數未用到「獨立運動」或「爭取獨立」嘅字眼,而係「爭取主權」之類嘅用字咁解。

早响四年前,當歐洲吹起一片「獨」風,先後有蘇格蘭同加泰隆尼亞獨立公投,我已經撰文講述砂朥越爭取舉行主權公投,即係話「砂獨」問題其實已經蘊釀咗起碼四年。

砂朥越爭取脫離馬來西亞嘅背景成因,表面都係一貫「中央」vs「地方」之間嘅不和,唔多唔少都同利益分配不公有關。的確,砂朥越同馬來西亞聯邦嘅不和嘅起因就係石油。早在1882年,砂朥越王國响美里 (Miri) 已經發現石油,但承如前文《722砂朥越國慶日》提及,馬來亞藉住新加坡想加入聯邦嘅訴求,想從英國佬手上吞併埋砂朥越 (同埋沙巴)。然而,本來 Malaysia Agreement 1963 關於砂朥越嘅條款,綜合概括去講,吉隆坡對砂朥越 (同沙巴) 擁有憲法管轄權、軍事防衛權、聯邦法律終審裁決權;另相反地,吉隆坡不能將伊斯蘭教(包括宗教本身及伊斯蘭律法)施加於砂朥越及沙巴並保證宗教信仰自由、承認英語及十多個土著語言的法定地位、承認獨立入境管制權而不得將馬來亞人口置入,甚至寫明砂、沙的石油、礦產、森林木材所產生的收益,聯邦中央政府頂到盡只能拎10%。

首先要明白「憲法管轄權」唔等如擁有主權,即是支那共匪成日講嗰句「自古以來領土」嗰種觀念唔適用於砂朥越,以至整個馬來西亞聯邦。須知道根據 Malaysia Agreement 1963 同相關的 Malaysia Act 1963,馬來西亞係一個條約協議組成嘅國家,由馬來亞聯合邦、砂朥越、北婆羅洲及新加坡共同組成。用最淺白嘅講法,就係呢四個地方同意走埋一齊組成一個叫馬來西亞嘅國家。引伸返去砂朥越,即是砂朥越係馬來西亞呢個組合嘅成員。

但巫統班大賊,利用選舉舞弊手段得到修憲權力,不斷蠶食砂朥越同沙巴由 Malaysia Agreement 1963 所擁有嘅權利 (巫統班大賊口中嘅特權),尤其是石油、礦產、森林木材所產生的收益由原本只能攞 10% 變成 95%;甚至將原屬沙巴嘅產油納閩 (Labuan) 「升格」做聯邦直轄區,連剩低俾沙巴嗰 5% 「餅碎」都搶埋。並且集中火力响砂朥越抽取石油,而將半島吉蘭丹、登嘉樓嘅油田「閒置」,即係擺明居馬要抽乾砂朥越。你話砂朥越人點會唔心底裡係火山爆發!

引伸返去 Malaysia Agreement 1963 ,單係石油開採問題,巫統即係撕毀協議;另外再加埋削弱英語的法定地位,伊斯蘭黨堆痴線佬耐唔時就對砂朥越嘅宗教問題說三道四,再仲有馬哈迪「鼓勵」佢依家個土著團結黨要東渡拓張…… 砂朥越唔止話要公投,甚至乎直接嗌 SAREXIT ,真係正常不過。

換另一個角度去睇 Malaysia Agreement 1963。份協議係由五方簽署,馬來亞聯合邦、砂朥越、北婆羅洲及新加坡之外,仲有英國。又是前文《722砂朥越國慶日》提過,英國為求「保送」新加坡同馬來亞合併,就將砂朥越同北婆羅洲做「陪嫁妹仔」送俾巫統班大賊。呢個就係砂朥越人提出 SAREXIT 背後嘅訴求係要求英國佬返嚟收拾爛攤子嘅原因之一。再者,就是英國有份簽署 Malaysia Agreement 1963,即係英國係協議嘅締約國,依照過去55年巫統嘅所作所為形同撕毁條約,但英國殖民走狗不單視若無睹,甚至當新加坡在1965年被驅逐之後,砂、沙兩地其實出現過一輪脫離馬來西亞嘅呼聲,英國就或明或暗撳住。

甚至到1974年巫統修改法令收回石油開採權,擺明違反協議;1976年巫統修憲將砂朥越同沙巴降格做州,直頭係將 Malaysia Agreement 1963 掉落垃圾桶,都無因為締約國身份做嘢而只係袖手旁觀。唔單止再一次證明砂朥越人要英國殖民走狗躝返去收拾殘局嘅怒氣之外,某程度仲反映英國對於國際條約嘅重視程度仲係咪邱吉爾年代,實在使人懷疑。而呢個情況,某程度上可以套用返响香港,撇除港燦對國際政治嘅無知,好難怪「英國佬走咗仲點會理香港」呢句說話點解會咁普遍。

再甚至了解返英國撤出婆羅州嘅其中一個考慮,就係支那共匪响當地嘅勢力發展。雖然在1959-62年期間,英國政府嘅軍事力量打到砂共文銘權、黃紀作班共匪一仆一碌,但接續往後共匪嘅殘餘力量,英國就擺明想洗手不幹。連同埋香港過去近四十年嘅情況,英國殖民走狗都彷彿唔想同支那共匪有正面衝突,甚至再衰啲講只圖享漁人之利。可以話在一定程度上,唔好寄望單憑英國佬可以做得出啲乜嘢花樣,不論係香港定砂朥越都係,必須要有其他外國勢力响其中,先至會可能搞得掂。

始終砂朥越嘅歷史、主權因素比香港複雜。砂朥越嘅前路會係點,客觀講尚係未知之數,但至少可以睇到砂朥越人有「據理力爭」嘅意識,同埋睇到有實在嘅論述,甚至有所行動。又最起碼迫到馬來西亞聯邦中央無得唔面對呢件事,馬哈迪要在國際公開場合回應應酬一下。

返回主頁

Be the first to comment

Leave a Reply

Your email address will not be published.


*