馬哈迪戰略理論對付東大嶼山填海

上文講到推倒東大嶼山填海嘅策略概念,一定要在普羅大眾層次嚟講夠「貼身」而唔好講埋啲懶係崇高嘅理念論述。點解會講到馬哈迪?因為响今年5月嘅大選時,希望聯盟亦係採取類似手法,就連 Kampong (馬拉話「鄉村」) 本來係巫統/國陣票倉嘅範圍都成功攻下而取得執政權。

响大選前,馬來西亞最大嘅兩個議題,一個係 1MDB 貪污逾420億令吉,另一個係銷售及服務稅 GST 導致物價上升。

比著响香港班左賊習慣曲高和寡講啲「高層次」議題,一定係拎住 1MDB 案嚟狂砌納吉。但馬哈迪同希盟就主打 GST 問題。以 GST 導致百物騰貴而民不聊生,特別响普遍較落後而貧窮嘅 Kampong 就更加痛苦。

希盟嘅講法亦唔係話巫統政權從 GST cap錢有乜春不公義咁空泛,而係講國陣政府嘅管治「洗腳唔抹腳」所以要收 GST,因而導致物價上升;只要「換政府」改變政府嘅運作同管治,盡可能減省開支,就可以改革稅制 (取消GST) 而收少啲稅,減輕生活負擔。提到 1MDB 嘅比例好少,亦都係 link up with 「洗腳唔抹腳」嚟到講。呢種講法嘅好處就係對選民嚟講夠「貼身」,容易引起共鳴。

或者對於香港班左賊嚟講,只會覺得馬哈迪、希盟嘅手法「好cheap兜」。但問題係選舉工程嘅目標就係要選民投你一票,而要選民將手上嘅一票投俾你,就係要使選民認同你。要如何得到選民嘅相信認同,就係要選民對你產生共鳴。要取得共鳴,就要講述選民覺得重要嘅事。而所謂「覺得重要」,放諸天下皆準的就是「貼身」。這就是現實!

馬哈迪响勝出大選後接受訪問,有提及整個選舉工程嘅策略鋪排。佢講到點解主打 GST 反而將更大問題嘅 1MDB 擺响次要位置,原因係對於普羅大眾嚟講,420億唔關佢事,相反地420令吉就是生活困難嘅主因;420億講唔到點解生活越嚟越苦,反之由420令吉開始就可以扯到去420億。

引伸出嚟而套用返响東大嶼山填海,5000億定10000億唔係同港人無關,但又要講稅收、政府財政呢啲咁複雜嘅公共行政問題,講得明白都「蚊瞓」。直接啲講同「趕客」無分別。但如果搵到一啲「拆細」嘅論述,並與普羅公眾切身利益有關,就正如馬哈迪「420令吉」咁,就能增加成推倒填海計劃嘅機會。甚至扯遠少少講,其實任何議題都可以循呢個方向去「打」。事實上,呢一種手法概念响當年保衛尖沙咀碼頭巴士總站用過,當年擺街站嗌咪內容只係「無車搭、無船搭」;又或者係限奶令戰役,都係集中講「撲奶粉」嘅困難。恕我囂張講句證明係有效。

就算唔睇小弟嘅「戰績」,馬哈迪响5月大選所採用嘅戰略理論,就成功創造歷史。學吓佢,唔會錯得去邊。

返回主頁

Be the first to comment

Leave a Reply

Your email address will not be published.


*