台鐵管理層準備「上刑場」

本來唔想再講普悠瑪反車事件,真係講到口都臭,想轉講熊匪永達又叫香港道路改用左軚單嘢。但過去廿四小時,台灣傳媒連掟幾粒核彈「炸」台灣鐵路局,但台鐵都仲未肯投降而仲要死撐唔肯承擔責任,仲要夾埋台灣蘋果日報同列車司機索K舊賬出嚟,意圖 Spin 「唔係一個好司機來的」轉移公眾視線,或最起碼 buy time 睇下點樣鋤死個列車司機,就真係火山爆發,要再出手「炸」台鐵多兩嘢。先此聲明,唔係話列車司機有索K「案底」係啱,但台鐵無乜理由唔知道佢接受緊治療,是否派佢「上司機位」要諗清諗楚。再者,事隔八個月撩返出嚟,時間上巧合得好難解釋。

首先睇返台灣傳媒掟咗乜嘢核彈:
1. 三立電視台去到宜蘭車站做偵查,唔止確認出事列車去到宜蘭站根本無進行過任何維修,仲要無寫記錄落 log book;
2. 普遍視為中國國民黨黨報的《聯合報》爆出出事列車與控制中心嘅通話內容,確認台鐵控制中心知道列車有問題、關閉 ATP 行車;調度員有催促追回延誤時間的說話;與及宜蘭站站長只管問「是否能開行」。可睇以下capture。

綜合兩粒「核彈」,可以百份百肯定宜蘭站的職員只圖「打發」有故障嘅列車離開車站,唔想因為列車故障增加額外工作量,卸責卸到離晒大譜。同我之前估計嘅情況完全吻合。另外就確定台鐵毫不理會列車故障要求繼續行駛至花蓮先至再算。已經可以肯定這場18死近200人傷的災難嘅責任唔單純响司機身上。

前文已經提出宜蘭站職員嘅仆街所為,唔再重覆;如今亦確定了控制中心 / 檢務人員都有不可推卸嘅責任。再追落去嘅問題就係佢哋基於乜嘢動機同原因會咁樣做,同埋點解無人會落決定將列車停駛。

停駛將會引發嘅問題就係服務延誤。須知道6432次後面仲有一大堆列車,勢必引起乘客投訴,然後遷怒於台鐵。相反地繼續行駛,假設無發生今次災難,就可以「過咗海就神仙」。呢個除咗係心態問題之外,承如前文所講,其實可以利用宜蘭站2B站台將影響盡量減低,可是 SOP 有無寫可以咁做,當然係問題。而 SOP 係由台鐵管理層編寫,按此推論即係台鐵管理層根本無諗過要訂立一啲突發應變措施。可見台鐵管理層只係一堆尸位素餐嘅仆街。另外,調度員「提醒」司機晚點,檢查員要列車司機邊揸車邊做檢查同修復,好明顯係一種「追時間」嘅舉措。一定程度上確定咗台鐵有「準點為先」嘅觀念,甚至係營運管理準則。呢啲觀念同準則會係乜嘢人搞出嚟,都唔駛再多講。台鐵管理層有近乎終極嘅責任,可以話無得走。

點解會有「準備為先」嘅觀念,無錯可以話「奧客」太多。但「奧客」的煉成,除咗教育及社會意識嘅變質之外,台鐵一直以來嘅營運管理可有自視過高的態度,以致頻頻出錯而招來話柄,台鐵可有認真面對同反省過?若說欠缺司機人手,莫講今次災難只顧將責任推向司機,平常時台鐵嘅管理層如對待司機和其他前線基層員工,有無提供具吸引力的待遇之外,有無「尊重」兩個字?人工又唔係好,有事就只會要員工「背黑鍋」,香港俗語「搵鬼做啦」。另外,列車路線時刻表規劃有無效率,又是值得商榷。例如七堵至彰化、基隆至嘉義之類超長途嘅區間車,有幾多人會咁多時間搭全程?其實可以分拆成兩段,例如基隆-中壢 / 桃園 – 嘉義…… 只不過除咗人手編班之外,單是編排時刻表都要諗到爆晒頭;相反地「一抽車過」就簡單直接易辦事,再衰啲講就係「開四至五小時都係司機,第二日先至可以返屋企嘅都係司機」,管理層完全置身事外。

今次災難,台鐵管理層根本責無旁貸。慶幸今次所見台灣民眾總算有返啲理智,唔會跟隨傳媒嘅風向只會針對列車司機,奉勸一個二個台鐵管理層唔好打算逃脫,那管鹿潔身辭職獲批都唔好諗住跑路。另外,台鐵嘅責任唔單止在於今次災難嘅發生,亦因為今次災難將台鐵千瘡百孔嘅管理曝露出來,更見台鐵服務有必要作出徹底改革,甚至可能爛得要砍掉重煉。解散台鐵重組似乎勢在必行。

後記:台灣人這次懂得劍指台鐵而未有只會針對司機,確實值得贊賞。但希望台灣人能同時反思一點,要是尤振仲兄不顧上級要繼續行車的指令,以個人判斷的安全問題停駛列車,然後引致北迴至花東一連串延誤,會否只會遷怒於他?公民修養質素,就是要這樣培養出來。

返回主頁

Be the first to comment

Leave a Reply

Your email address will not be published.


*