碧桂園死撐,港燦唔抵爭

噚日馬來西亞首相宣佈會禁止「新加坡一河之隔」嘅碧桂園森林城市賣俾外國人、唔會向買家發出居留簽證之後,碧桂園發出聲明話只係傳聞、「未有確實消息肯定有關措施」死撐,好多港燦、五毛就起勢話「禁售」只係老吹老作云云、或是保守少少跟風話「傳聞」大家唔駛緊張。雖然馬來西亞政府真係未發出官方文件確認,但只要清楚馬來西亞嘅移民政策,根本唔會選擇相信碧桂園嘅聲明,甚至一早唔會落搭買呢個樓盤。

縱使到依家都仲未見大馬政府嘅官方文件,一切都只係建基於傳媒報導。香港嘅傳媒多數引述 Reuters。路透社一貫唔會亂「賣稿」,而本身嘅「消息」都係來自當地嘅傳媒。我睇返噚日嘅「消息」發佈時序,最早嘅係新加坡 Channel News Asia。「森林城市」所構成响政治方面嘅威脅,新加坡係有份承受,即係話「傳聞」嘅可信性係存在,或最起碼「唔會流得去邊」。

更要知道 Channel News Asia 係新加坡政府有份嘅 Media Corporation 旗下嘅傳媒機構,即係話「傳聞」有官方加持。响呢個條件之下,仲選擇信香港傳媒狂推嘅「碧桂園否認『傳聞』」嘅友仔,唔係傻嘅就係無腦啦。只不過港燦習慣地「我討厭政治」同國際視野係零,再加埋總是「祖国很強大」嘅潛意識,咪信「只係傳聞」囉!

再推前返去個樓盤聲稱「永久居留權」嘅宣傳技倆,相對馬來西亞最原本嘅移民政策,其實係除非基於家庭因素,例如已故香港藝人陳儀馨嗰隻,否則無得移居入籍,係只能「定居」,無公民權,即係連教育、醫療等社會福利都唔會有;或是近年好多人吹捧嘅「第二家園計劃」(MM2H),更講到明唔會有得入籍,根本可以意會到碧桂園有可能呃神騙鬼。試諗下馬來西亞政府點會無端端因為一個樓盤而改變政策?你話信嗰個係咪個腦有問題吖!

我有聽過有啲友仔話納吉同中国關係「友好」,提供啲「優惠」俾中国有乜出奇。道理上好似講得通,但對比返最原本嘅移民政策,根本係名不正言不順;掉返轉,相對於MM2H,其他樓盤嘅買家見到,撇除「狗衝」,條氣一定唔順。引發以 MM2H 定居嘅人嘅不滿情緒事少,隨時搞到 MM2H 都話要爭取有得入籍/永久定居,即係馬來西亞分分鐘要大開中門,咁仲得掂嘅?! 可以睇到馬哈迪「斬」嘅原因,亦睇到有言論指納吉係「引清兵入關」嘅賣國賊真係無講錯,另同時睇到啲俾楊國強父女 tum 落搭嘅人係幾咁憨鳩白痴無腦!

另外,做返啲「考古」,小弟响兩年前已經發出警告訊號小心唔好俾人昆,呢個樓盤可會係一個騙局、甚至爛尾;雖然以馬哈迪嘅宣告內容嚟講,「爛尾」嘅成因有別於當初我所預計的,但掉返轉講,如果當初有聽我「鳩吹」,依家咪唔駛準備做苦主囉。而由今次碧桂園森林城市嘅事件可以見到,港燦真係唔抵可憐,甚至可以話死有餘辜。

碧桂園今日股價中午收市下跌42仙,報$11.72。雖未至於插水式下跌,但後市仲有幾多承托力,自行判斷啦。

申報:本人未持有碧桂園任何股份,或各類投資產品。

返回主頁

Be the first to comment

Leave a Reply

Your email address will not be published.


*