台灣嘅演唱會票務制度可以全盤照抄

劉德華演唱會門票開售,有血案發生,主辦單位臨急臨忙更改所謂公開發售的方式,取消票房排隊銷售,全部改為網上或 APPS 訂購,搞到啲排隊黨見財化水就梗係唔高興,有長者話「唔識用電腦」一樣唔開心。另一方面,有電腦專家指出,URBTIX 系統隨時不勝負荷,再加埋黃牛黨用有如僵屍電腦「攻擊式」的進行訂購,就分分鐘搞到冧晒機而黃牛黨成為最大贏家。然後的,再有人提出要實名購票杜絕黃牛黨嘅問題。的確,諗得好理想,但正如我之前講過,演唱會門票炒賣根本係一個產業鍊,要能成功將黃牛黨「破功」係要好有系統、好週詳籌劃同實行;而且在目前香港坊間就「實名制」所提出的概念方案,在執行上亦有一啲技術問題 (我亦都講過,例如臨時有事去唔到就會「累街坊」)。到底可以點做,幾個月以來都無一個好完整嘅意見。

我响今年五月底去咗台灣睇「平民天后」徐懷鈺的「只為鈺見你演唱會」,由訂票開始到入場,我所經驗到及觀察嘅票務安排,可以分享一下。

首先,台灣嘅演藝或體育活動嘅票務代理有好幾間。YUKI 演唱會委託嘅 寬宏 KHAM。另外仲有拓元售票 tixCraft、ibon 等等。最起碼比香港多。除咗可以「分擔」銷售嘅系統負荷之外,仲可以「有競爭」而唔會濫抽佣,對歌手藝人多一重保障。

講返我訂 Yuki 演唱會嘅過程。必須在 KHAM 網站登記做會員,登記過程必須輸入身份證號碼 (台灣人) 或護照號碼 (外國人)。完成登記後24小時先可以訂票。開買當日,看圖識字揀選座位,然後用信用卡俾錢。確認好晒之後,KHAM 會將 confirmation 發送電郵過嚟。由於我係國外訂票,領取門票嘅選項只得演唱會現場大堂服務櫃檯;至於台灣本地人,據台灣嘅朋友講,可以選擇寄到屋企/指定地址,又或者寄去指定嘅7-11、全家、萊富爾便利店又得。至於無或借唔到信用卡、又或者好似香港新聞訪問有個阿伯話「唔識用電腦」,可以去便利店用現金或其他電子支付(悠遊卡、一卡通)購買,事關便利店部「收銀機」可以連接票務代理嘅訂票系統,而買嘅時候亦係要出示身份證/護照,予店員輸入號碼。又是據台灣的朋友講,其實每一間票務代理都有咁嘅安排。

由台灣嘅銷售安排,除咗睇到已經實行緊「實名制」之外,亦照顧埋無信用卡嘅人。可見台灣做得比香港完善得多!

到演唱會當日入場,會場職員驗票就唔會檢查證件核對。大家睇到呢度應係咪想講「唓,咁即係仲可以炒啦」,表面上係嘅;事實上,台灣嘅黃牛黨問題亦都幾猖獗。不過,因為每張門票都有購買人嘅身份證資料,即係話只要有人放蛇同黃牛黨交易,係可以追查到張票嘅購買人資料而斷正。過去台灣警方都捉過唔少黃牛黨,都係循呢個方法作出檢控並且法庭裁定罪名成立。但又當然,總會有人心甘命抵俾黃牛黨「劏」啦,咁呢個係經濟右派嘅思維 ── 一個願打一個願捱,吹佢哋唔脹。但至少睇到黃牛黨响法律責任方面嘅風險唔係細。另外,入場無核對證件,亦避免咗「臨時有事去唔到」所引起嘅麻煩。

另一方面,台灣亦設有退票制度,通常演唱會首場前5-14日不等為限(視乎主辦單位而訂),限期前可以退票,但當然要扣手續費。以返徐懷鈺演唱會為例,退票期限為5日前。退票制度對消費者嚟講係一重保障。另外就係使黃牛黨要「膽搏膽」,事關如果買唔到門票嘅人可以等退票 Deadline 過咗先至「執死雞」而唔向黃牛黨低頭。雖然,退票制度亦為黃牛黨提供「止蝕位」,但就是堅持「等執死雞」的話,黃牛黨就必定要輸手續費離場。

可以見到,台灣嘅演藝活動嘅票務銷售安排,既為不同人士提供方便,亦在一定程度上有足夠的預防措施壓制黃牛黨嘅活動。香港其實可以全盤照抄,以我嘅經驗及觀察,係直頭可以Copy & paste。只不過,長氣啲講,演唱會黃牛黨係一個產業鍊,再對比返台灣、新加坡、馬來西亞嘅門票價格,香港嘅票價根本只係向黃牛黨提供「水位」可以進行炒賣。所以大家都唔好期待在可見將來會出現我呢啲諗法。

後記:
1. 演唱會講到尾都係講求歌手嘅表現質素,但香港嘅流行音樂市場嘅質素…… 我唔想再講喇。票價唔 keep 住低水,啲垃圾有撚得做歌星咩;
2. 小弟嘅舅父今年89歲,佢唔止識得用 Whatsapp 同我聯絡,平時識得用 PAD、响屋企部 Samsung Smart TV 上網睇 netflix;馬來西亞首相馬哈迪93歲,仲會「飛車」;新加坡建國總理李光耀76歲仲會學電腦用email…… 好心香港啲長者唔好一味恃老賣老做藉口而乜嘢科技嘢都唔學啦

返回主頁

Be the first to comment

Leave a Reply

Your email address will not be published.


*