Uber 危險,的士仲危險

上星期深夜旺角一宗導致有人死亡的交通意外,肇事的私家車被揭發正在「做緊 Uber」,第三保保險疑似出問題引發爭議之外,有政客趁機「抽水」指 Uber 好危險。確實的,不論任何車種,交通意外一單都嫌多,但是的士嘅意外數字,不論有無人傷亡或輕微碰撞意外,幾乎無日無之。再者,若說 Uber 唔合法,的士佬更根本日日都在犯法。中共香港支部、工賊會嗰班只圖維護譚惠珠及其利益集團嘅粉皮真係一百步笑五十步。

的士狗劏客唔駛多解釋犯咗乜嘢法例;「冚旗」(法例辭彙「暫停載客」)即向路人示意不應截車要求乘搭,雖然按照現行法例司機如果容許乘客上車是沒有法律責任,因而「吹的士佬佢哋唔漲」,但好明顯是的士佬利用呢個法律灰色地帶進行影響公眾使用的士服務的權益,甚至藉以意圖「劏客」作違法行徑,就是不爭的事實。班土共成日開口埋口叫人守法,但縱容的士佬「走法律罅」,簡直不知所謂。

除咗以上呢啲直接涉及乘客權益、服務質素有關的事之外,的士構成道路危機嘅行為仲有大把可以「數家珍」。例如駕駛者經常遇到的士狗轉線唔打燈甚至「硬 Cut」,其實係構成「不小心駕駛」罪行。又或者「折扣黨」响錶板擺住幾呀部電話,唔好話行車期間「篤電話派柯打」已構成「駕駛期間使用電話」以至「不小心駕駛」嘅罪行,就是可以根據《道路交通(公共服務車輛)規例》 Cap. 374D 第44條 ── 須確保車輛保持整齊清潔,已經可以「鋤」佢;

仲有一個非常明顯,但往往遭人忽略、或好多時無為意係違反法例嘅情況,就係出入機場、港澳碼頭或中港碼頭等路段,經常見到因為擺放行李而尾箱蓋未能關閉,的士佬用條橡筋繩將尾箱蓋勾住車身。

「尾冚閂唔埋」最少觸犯兩條法例:

  • 《道路交通(交通管制)規例》(Cap. 374G) 第57(a) 條 ── 已適當地固定在該車輛上或已盛載在該車輛上或該車輛內。
    一條橡筋繩可以保證「適當地固定」?咪玩啦!
  • 然後就是第58(1) 條 ── 無論何時均不會對在該汽車或拖車上的人或對在道路上或附近的任何人造成或相當可能造成危險,亦不會對道路或對公共或私人財產造成或相當可能造成損害。
    一條橡筋繩可以保證唔會跌落路面,整爛乘客個喼(私人財產)、危及其他道路使用者?

即使的士佬識得搵「專家證人」證明行李唔會跌落路面,尾冚閂唔埋而車尾個車牌「向咗天」,已經可以因為「快相機」有可能影唔到車牌而視為違反《道路交通(車輛登記及領牌)規例》(Cap. 374E) 第8(3) 條 ── 登記號碼在任何情況下不得被掩蔽或不易辨認。最高罰款 HK$2,000。

大家可以每逢見到呢種情況,就影相或準備車 Cam 片然後寄去香港郵政總局郵政信箱999號,千祈唔好同佢哋客氣。唔只係向的士狗出氣,仲有係維護旅客對香港的形象。所以值得做,快啲做,密密做。

也許的士佬睇到呢一樣就想發爛咋,或起碼發嚕囌「你估我哋想尾冚閂唔埋,架車係咁設計吖嘛」。無錯,豐田Crown Comfort 尾箱設計就係咁廢,但除咗佔領時期大大聲鬧「唔守法」而應該以身作則之外,幾乎成街都係「金豐的士」咪又係你哋成個行業一手造成!

想當年(大約2000年),陸恭蕙、莫偉全一聲令下要全面轉用石油氣車,你哋成堆的士狗剩係識得望住「燒氣平好多喎」流晒口水。成個行頭只係得已故的黎銘洪出嚟鬧或好言相勸要小心排隊入氣,車行、氣站壟斷問題,但你哋仲要或明或暗鬧黎秘書「多鳩事」。你哋唔好話唔記得呢件事呀!

日產 Cedric (Y31) 嘅設計好撚落後係事實,但就是修理佬一句「無雜廠件,下下返廠買貴到喊」仲有「換個風格都麻鳩煩過豐田」,就冚世界話之円紙跌但皇冠車行加價(最大差距10萬) 就頂多呻兩句然後繼續「咪埋眼狗衝」。就算近年有 Ford Transit 同日產 NV200 車款,你哋班的士狗咪又係嫌「零件貴」再加修理佬又係嗰句「整慣豐田,唔柒識整其他車」,而繼續狗衝去進貢俾皇冠車行。如果市民堅係「開拖」玩你哋「尾冚閂唔埋」,唔好怨天尤人,一切都係你哋自作孽。

Fine…. 就算豐田將會出新款 JPN Taxi,尾箱空間好似大咗 (利申:我未睇過,亦唔可能有機會睇,無法確定行李容量係咪比 Comfort 多)。你哋班的士狗睇過款新車之後雖然嫌三嫌四,但夠膽放棄「除了豐田以外沒有別的牌子」嘅思想咩!

奉勸的士佬唔好掛住針對 Uber,又或者針對客貨車「載客取酬」搞事搞幹。整章《道路交通條例》就「貨物」沒有清晰訂義,就是事實到連張炳良、邱誠武都曾經响立法會俾人問到口都啞埋;但「尾冚閂唔埋」就有清楚明確的法例可以「鋤」你哋就係事實。

返回主頁

1 Comment

  1. 老友,尾冚閂唔埋係的士佬錯?咪玩啦聰明人。
    四五個人坐的士入機場,拖四個大喼就係因為你屎忽痕告尾冚閂唔到,搞到坐的士既人就冇得坐的士搭去機場,咁坐車乜鳩呀?自己揸車呀泊機場幾晚都貴過張機票啦!搭巴士同地鐵?我住西貢村屋呀你老闆,點拖住四個大喼上山落山搭車出市區再轉巴士地鐵晨早6點入到機場呀!出post瞓醒未呀?
    的士有狗有仆街有害群之馬好撚正常,你告濫收告亂cut線我贊成,但係你告的士冇閂尾冚,唔通啲司機尊登?你搞著搭的士既普羅大眾,小市民,你是咪on9老友,尾冚閂唔埋係的士佬錯?咪玩啦聰明人。
    四五個人坐的士入機場,拖四個大喼就係因為你屎忽痕告尾冚閂唔到,搞到坐的士既人就冇得坐的士搭去機場,咁坐車乜鳩呀?自己揸車呀泊機場幾晚都貴過張機票啦!搭巴士同地鐵?我住西貢村屋呀你老闆,點拖住四個大喼上山落山搭車出市區再轉車晨早5點入到機場呀!
    的士有狗有仆街有害群之馬好撚正常,你告濫收告亂cut線我贊成,但係你搞著搭的士既普羅大眾,小市民,你是咪on9

Leave a Reply

Your email address will not be published.


*