兼職巴士司機就是危機?

2月10日大埔公路大埔滘段雙層巴士反車的嚴重意外,在傳媒欠缺駕駛及汽車知識、與及只會搵啲「有朵有牌頭」連9,10牌都無嘅所謂專家說三道四,合力繼續以「慢就是安全」 Spin 車速之外,又搵到職工盟轄下巴士業職工會聯盟副主席郭偉光 (行內俗稱「綠簿仔」) 俾到個「兼職車長缺乏經驗,比較危險」嘅 Sound-bite,搞到全香港遷怒於兼職巴士司機,繼而九巴斬腳趾避沙蟲勒令為數209名兼職車長停工,導致初一至初三九巴各線班次脫班情況惡化。另一邊廂,兼職車長通過各種渠道「圍剿」郭偉光,嚴斥佢「扑爛飯碗」、以為咁就可以保住全職車長的利益是白痴思想所為,同時地全職車長亦因為人手不足致工作量增加而埋怨公司「兼職停工」是錯誤決定,加上傳媒一味集中講車速問題而本來可以開快少少嘅路段都唔敢「踩咁盡」導致休息時間減少,與及乘客「加強『監察』」的無形壓力增加,怨氣充天。可以先見到「勒令兼職停工」已變成一場公關災難,且同時是對外及公司對內,九巴今鋪有排拆。

無可否認,近年唔少新入職的兼職車長的駕駛技術、工作態度以至心態係有啲問題,確係有部份抱住「玩玩下」嘅態度坐上駕駛座,但呢個問題係人事部招聘過程沒有嚴謹審視申請者所產生的情況,是稍有管理經驗知識都能一眼發現的問題。只不過運輸業人手不足是普遍問題,而巴士公司還要顧及司機人手短缺導致班次失準招致投訴的問題,自然地管理層要人事部「跑數」。管理學上確有所謂「量」同「質」反比關係理論,但並非無辦法解決,只不過要時間同更多行政管理工作。

雖然「樹大有枯枝」係事實,但被停工的逾二百位車長又係咪全部都係大族中的乞兒,除咗被巴士業界圈子尊稱為「阿爺」嘅城巴創辦人李日新先生斷言否定之外,小弟亦認識幾位被停工的兼職車長其駕駛技術及態度絕對唔差。由此可見,向兼職「一刀切」根本是大錯特錯!更是從公關角度去睇,九巴管理層對輿論「為應酬而應酬」的低B公關手段,甚至可以直言是反映佢哋嘅無能。

有輿論認為兼職司機除了其自身的問題之外,訓練不足就將駕駛技術問題進一步惡化。表面睇好似係事實,尤其是行內俗稱「操線」嘅路線訓練,確實不可能單純「睇片」就能做好。但是,這可會是九巴的訓練制度以至管理制度出咗問題,過去十日無人考究過。以小弟所知,九巴的「操線」係一條路線為基礎單位,每位新入職全職車長頭三個月「操線」最多三條線 (輔助線/班次例如46X及46P計一條線)、兼職就「派更」前兩日操一條線,而不是按區域劃分一次過「操線」多條路程接近的路線 (例如46X加47X及48X),既引致編更及前線車務調派欠缺靈活,影響班次服務質素,亦導致車長缺乏更廣闊的路面知識形成的信心。更是九巴的ISO9001訂定的管理制度是「假設車長只懂駕駛接受過路線訓練的路線」,連突發情況「執生」改道都唔得,一定要等稽查到場指揮,形同當車長係「白痴」,形成人事管理學上「員工才能發揮受限」衍生的「員工自我價值」進一步受壓嘅 atmospheres,點可能唔出事呀!

無錯,每條巴士線的行駛路線都不同,甚至即使行駛同一條道路但中途站位置都有差別 (例如彌敦道,2,6 vs. 102,104,112),但如果訓練及管理制度得宜,車長早已有概念,起碼對九龍區的路段有基本認識,不就是可以提高「操線」效率、同時提升人事管理學對於車長駕駛方面的心理質素嗎?! 駕駛訓練同「操線」的重點並非視車長如機械人,只需知道行駛路線及車站位置就算,仲要俾車長心底裡明白自己的職責,同埋基於知識上可採取的 Contingencies。例如日前有車長駕駛112往蘇屋時在灣仔行錯路幾乎要 call 上台求救,如果「操線」內容唔係死板、又如果管理制度唔係當車長係白痴,就唔會搞成咁。

或者好多人還是堅持駕駛訓練只需要揸得郁部巴士、「操線」識行駛某條路線就得啦,然後認為無接受過訓練就駕駛某款車、行駛某條路線是很危險的事,小弟就分享下過去全職/兼職揸旅遊巴士搵食的經驗,睇下「有幾危險」。

須知道揸旅遊巴士的行駛路線比專利巴士更變化萬千,單係酒店已經幾十間,仲隨時一轉接機要「派站」三、四間酒店。但任何一間旅遊巴公司都無做一般人同傳媒所想像的「路線訓練」,俾司機熟悉由赤鱲角機場出嚟去每一間酒店要點樣行法。夠危險未吖,港燦??? 又或者行內所謂「開 Island Tour」,不同國籍旅客的行程略有差別,有啲就直接上太平山頂,有啲就搭纜車上山然後在山頂上返巴士再過南區,再有啲就先去上環文武廟然後再上山頂…… 都係無做過「路線訓練」。以港燦同傳媒嘅思維,唔是要擔心「危害旅客安全,影響香港形象」嗎!甚至乎日本、星馬泰印(尼) 通常早上有行程去酒樓飲茶,然後先「開 Tour」,按照港燦同傳媒嘅思維而要做「路線訓練」要做幾多百次先得呢?!

要講「無做路線訓練好危險」,小弟仲想講下响2009年東亞運動會嘅經驗。東亞運動會嘅比賽場地係「去都未去過」,甚至「聽都未聽過」,例如赤柱的香港航海訓練學校,平日「做 Tour」都係行赤柱灘道去到赤柱巴士總站側邊,落客後駛過去佳美道赤柱廣場或沿赤柱村道兜返上山去赤柱灘道或赤柱崗道泊車,或上客之後就向香港仔方向「走人」,會行走東頭灣道嘅機會係零。夠危險未呀?! 我做過呀,仲要當時只係攞到巴士牌一年左右,又唔見我撞車!

又其中北韓隊住宿於荃灣曹公潭戶外康樂中心,往常工作係無機會行荃錦公路,負責北韓隊接送嗰位同事仲要揸部下圖咁嘅「爆炸品」!

點解當年無人質疑小弟同班舊師兄弟「做埋啲咁危險嘅嘢」?點解無記者問霍震霆「啲司機有無 Train 過?唔擔心威脅運動員安全咩?點解唔同啲司機做足訓練呀?」

反過來講,唔少人結婚「大龍鳳」都會租旅遊巴接載兄弟姊妹團,或散席接載親友返歸,司機都無响事前做「路線訓練」,啲兄弟姊妹團 / 親友講一句要去邊,司機就要去,點解你哋啲港燦唔會驚呀!奉勸大家,結婚唔好租車,講緊唔只唔好租旅遊巴,連花車都唔好租,司機一定無做過「路線訓練」架,無謂紅事變白事啦!男女家、行禮、擺酒全部安排响同一間酒店,或頂多「行幾步路就到」嘅地方就算啦!

小弟唔係要炫耀手車有幾得,而係要引證巴士公司嘅訓練到底有何問題,為改良「操線」提供參考;引證港燦响一大片基於無知嘅輿論聲音而產生嘅思想係幾咁不知所謂!小弟強調,唔係話訓練無需要,而係現時巴士公司嘅訓練內容並唔足夠,同埋「咸魚」思維無助巴士公司作出改善,反令到巴士公司只顧應付輿論壓力去頭痛醫頭而沒有時間同空間去搵出對症下藥嘅改善方法。都係臭串啲嗰句:「無巴士牌就出少句聲無人話你哋啞!」

利申:小弟現時並未有受聘於九巴。近三年只偶爾「客串」揸旅遊巴。

返回主頁

Be the first to comment

Leave a Reply

Your email address will not be published.


*