司機多柒頭，因為運輸署憨鳩

上一篇講九巴製造蠢材司機，提到九巴的硬膠管理手法是原因。但是，要考取巴士、中/重型貨車等商用車駕駛執照的先決條件，是要持有私家車(1) /輕型貨車(2) 執照三年。但呢三年無揸過車，即俗稱「雪藏牌」的，也可以應考。以這邏輯，是「蠢材司機」另一個成因之外，也增加道路安全風險。

即使是「P牌」制度，也僅是應用於考到1, 2 牌之後的一年；要是「新手牌」在第二年才駕車，也無需掛上「口水肩」。即係話，無論係乜嘢車，坐响司機位嘅隨時都係零路面經驗的柒頭。

看到這處，是否覺得香港馬路其實係好狠恐怖嗎？

或者你會諗到點解運輸署會容許「雪藏牌」司機出現，甚至可以駕駛運載近100條人命嘅巴士；點解唔可以設立一個好似飛機師考核制度，規定要有實質駕駛記錄、肯定累積相當路面經驗才可以應考巴士、中/重型貨車牌照？撇除「中國人」愛鑽空子、走法律罅做假，要真係有效執行，有非常多的資料核對工作，例如揸過嘅車牌號碼係咪真、登記車主同個「新手牌」係乜嘢關係，而且要做的記錄隨時三五七年….. 行政成本會非常高。簡單啲講：根本唔可行。言下之意，豈不是「新手牌」、「雪藏牌」的道路安全危機風險無辦法解除？

揸開車或者乘搭公共交通公具，見到前面有一部「學神」蟻躝式行駛、响路口慢幾十拍先駛出，總會覺得佢哋阻住晒、不耐煩。這就是「新手牌」、「雪藏牌」的問題根源。即係點？
眾所周知，香港負責交通運輸的官員總有著一套「慢就是安全」的思想，並認為「學神」乜都唔識，所以應該慢上加慢。所以學車、考牌時車速只能在大約30km/h，出路口要望到完全Clear 先可以駛出，甚至「停 STOP」標誌一定要拉手制……

但實際駕駛情況，莫說在快速公路行慢啲都不斷俾車「冚」，即使在彌敦道「順燈」車速隨時60km/h以上；出路口、入迴旋處時望到兩邊嚟緊嘅車仲有6-7個車位已經抽出去。甚至以小弟身為過來人，揸住一架載滿 66個乘客長12m 的旅遊巴士，在快速公路「定油」輕踩油門維持穩定行駛，車速隨時超過80km/h；要守法唔超過70km/h，就要「縮腳」，即係經常要鬆開油門腳踏，搞到會chok 過林峯。

試問考牌同實際駕駛是完全兩回事，「新手牌」、「雪藏牌」點會唔係一個柒頭司機?!所謂「慢就是安全」的思想，不單是柒頭司機的根源問題，亦與今時今日嘅汽車科技同性能表現完全脫節。香港嘅考牌制度的要求，以至負責交通運輸的官員的腦袋是非常落後。

現時嘅考牌制度根本只在考核是否懂得操作汽車，而不是在馬路上駕駛汽車。一日唔改變呢種做法，一日都只會繼續周街都係製造道路危機嘅柒頭司機。至於要點改，還是哪句「我不是支取運輸署署長薪水」！最多補充一句「仲係繼續『慢就是安全』就必定繼續出事」。仲有，現今重型車的手動波箱已經有晒 Synchronize gear，上高波唔駛「兩腳極力子」架喇，唔該啲官個腦唔好再停留响半個世紀前啦！